ရည်းစားသစ်နှင့် လက်ထပ်တော့မည့်သတင်းအပြင် မိသားစုဝင်...
တောင်ကိုရီးယားနိုင်ငံ၏ ဒိတ်ဒိတ်ကြဲမင်းသားတစ်ဦးဖြစ်သည့် ဆောင်ဂျွန်ကီက ဗြိတိန်နိုင်ငံသူရည်းစားသစ်နှင့် လက်ထပ်တော့မည့်အကြောင်း အွန်လိုင်းမှတရားဝင် ကြေညာလိုက်ပြီဖြစ်သည်။ ၎င်း၏ပရိသတ်များနှင့်ဆုံစည်းရာ Fan site တစ်ခုတွင် ဆောင်ဂျွန်ကီက ကြေညာခဲ့ခြင်းဖြစ်ပြီး လက်ထပ်မည့်သတင်းအပြင် ၎င်းတို့စုံတွဲ၌ ရင်သွေးလေးရှိနေပြီဟုလည်း မင်းသားက သတင်းကောင်းပေးခဲ့သည်။ ဆောင်ဂျွန်ကီ ဗြိတိန်နိုင်ငံသူတစ်ဦးနှင့် တွဲနေသည့်သတင်း ဒီဇင်ဘာ ၂၆ ရက်က သေချာသွားပြီး ကိုရီးယားအွန်လိုင်းပရိသတ်များ၏ ရှာဖွေချက်များအရ ဆောင်၏ချစ်သူ ကေတီလူးဝစ်ဆောင်ဒါသည် ရုပ်ရှင်မင်းသမီးဟောင်းဖြစ်ပြီး ၁၀ နှစ်အရွယ်ခန့် သမီးတစ်ဦးရှိသည်ဟု ယူဆကြသည်။ ထိုသို့ယူဆခြင်းမှာ ကေတီ ကိုယ်ဝန်ဆောင်ချိန်ကဟု ယူဆရသည့်ပုံများ၊ ကလေးတစ်ဦးတွဲပါနေသည့်ဓာတ်ပုံများစွာကို ရှာတွေ့ခဲ့ခြင်းကြောင့် ဖြစ်သည်။ ယခုကြေညာမှုတွင် ဆောင်က ကေတီသည် ၎င်း၏ဘေးတွင်အားပေးလာသူ၊ တန်ဖိုးရှိသည့်အချိန်များကို အတူဖြတ်သန်းလာသူဟုဆိုပြီး ကြင်နာတတ်သူ၊ ၎င်းလေးစားမိသည်အထိ အ့ံသြစရာကောင်းသူဟုလည်း အမွှမ်းတင်ပြောထားသည်။ ပျော်စရာကောင်းသည့် မိသားစုဘဝကို နှစ်ဦးအတူ ဖန်တီးရန် စိတ်ကူးရှိပြီး တစ်ဦးနှင့် တစ်ဦးပေးထားသည့်ကတိများ အမှန်တကယ်ဖြစ်လာအောင် အများကြီးကြိုးစားခဲ့ရသည်ဟုလည်း ဆောင်က ဆိုပြီး ၎င်းတို့ဘဝထဲကို နောက်ဘဝတစ်ခု တိုးဝင်လာပြီဟု ပရိသတ်များကို အသိပေးခဲ့သည်။ မည်သို့ပင်ဖြစ်နေပါစေ ၎င်းကိုအားပေး မပျက်သည့် ပရိသတ်အားလုံးကို ကျေးဇူးတင်ပါကြောင်းလည်း ဆောင်ဂျွန်ကီကပြောသည်။ ဆောင်သည် ချစ်သူသစ်ကို ဒီဇင်ဘာ ၇ ရက်က စင်ကာပူသတင်းစာရှင်းလင်းပွဲတစ်ခုတွင် မိတ်ဆက်ပေးခဲ့သည်။ Dispatch သတင်းအရ ကေတီသည် ၂၀၂၂ ခုနှစ်၊ နွေဦးတွင် ကိုရီးယားသို့ရောက်လာကာ ဆိုးလ်၏ လူကုံထံဟန်းနမ်းရပ်ကွက်အတွင်းရှိ အိမ်တွင် ဆောင်နှင့်အတူနေထိုင်ပြီး ပတ်ဝန်းကျင်ကိုဂရုမစိုက်ဘဲ သွားသွားလာလာရှိခဲ့သည်ဟု သိရသည်။ ဆောင်သည် ဆောင်းဟေကိုနှင့် အိမ်ထောင်သက်နှစ်နှစ်အကြာ ၂၀၁၉ ခုနှစ်တွင် ကွာရှင်းခဲ့ပြီး ဆောင်းဟေကိုက အရင်ကွာရှင်းခွင့်လျှောက်တင်ခဲ့ခြင်းဖြစ်သည်။.
