ခွင့်မတောင်းဘဲ ဓာတ်ပုံရိုက်မှုဖြင့်...
ကမ္ဘာလှည့်ဖျော်ဖြေရန် လတ်တလောဟောင်ကောင်တွင် ရောက်နေသည့် ကေပေ့ါအဖွဲ့ Blackpink ၏ ကိုယ်ရံတော်များနှင့် ပရိသတ်အချို့ ဓာတ်ပုံရိုက်ယူသည့်ကိစ္စဖြင့် ဟောင်ကောင်စားသောက်ဆိုင်တစ်ဆိုင်တွင် အငြင်းအခုံဖြစ်ခဲ့ကြသည်။ ကျော်ကြားသူများဖြစ်သော်ငြား ပြည်ပနိုင်ငံတစ်ခုသို့ရောက်လျှင် အသစ်အဆန်းများကို လှည့်လည်စူးစမ်းတတ်သည့် ထုံးစံအတိုင်း Blackpink အဖွဲ့သည်လည်း Temple Street ရှိ နာမည်ကျော် ပင်လယ်စာဆိုင်တစ်ဆိုင်ကို သွားစားကြရာ သီးသန့်အခန်းလည်းမရှိ၊ စားသုံးသူများနေချိန်လည်း ဖြစ်သည့်အတွက် ၎င်းတို့လေးဦးက မြင်သာနေခဲ့ကာ စားသုံးသူများက ဓာတ်ပုံများ ရိုက်လာကြသည်။ ထို့နောက် Blackpink ၏ကိုယ်ရံတော်များက ဓာတ်ပုံရိုက်ကြသူများ၏လက်ကိုင်ဖုန်းများကို စစ်ဆေးရန်နှင့် ဓာတ်ပုံ၊ ဗီဒီယိုများကို ဖျက်မည်ဟု တောင်းဆိုလာသည်။ ယင်းကိစ္စဖြင့် နှစ်ဖွဲ့အချေအတင်ဖြစ်ကြပြီး ဆိုင်ပိုင်ရှင်လည်း ပါဝင်လာကာ၊ နောက်ဆုံး ဓာတ်ပုံ၊ ဗီဒီယိုရိုက်သူများက အားလုံးဖျက်ပေးမည်ဟု သဘောတူလိုက်သဖြင့် ပြဿနာပြေလည်သွားခဲ့သည်။ သို့သော်လည်း ကိုယ်ရံတော်များက ၎င်းတို့ဖုန်းကို ယူငင်စစ်ဆေးရန် ဘာအကြောင်းမှ မရှိဟုလည်း ဖျက်ပေးသူများက ပြောသည်။ ကမ္ဘာလှည့်ဖျော်ဖြေမှုတစ်စိတ်တစ်ပိုင်းအဖြစ် Blackpink က ဟောင်ကောင်တွင် ဇန်နဝါရီ ၁၃၊ ၁၄၊ ၁၅ ရက်များက ဖျော်ဖြေခဲ့ပြီး ဇန်နဝါရီ ၂၈ ရက်တွင် အာရပ်စော်ဘွားများနိုင်ငံ၏မြို့တော် အဘူဒါဘီ၌ ဖျော်ဖြေသွားမည်။.
