အသစ်တွေ့ရှိသည့် ပိုးနားသန်မျိုးစိတ်ကို အဆိုတော် တေလာဆွစ်၏အမည်...
အမေရိကန်အဆိုတော် တေလာဆွစ်သည် ၎င်း၏ ကျော်ကြားသော တေးဂီတအနု ပညာအတွက် ဆုပေါင်းများစွာ ရရှိထားသူ ဖြစ်သော်လည်း လက်ရှိတွင် နောက်ထပ်ဂုဏ် သတင်းတစ်ရပ်အဖြစ် အသစ်တွေ့ရှိခဲ့သည့် ပိုးနားသန်မျိုးစိတ်ကို ၎င်း၏အမည် ထည့်သွင်း သတ်မှတ်ခဲ့သည်ဟု သိရသည်။ အသစ်တွေ့ရှိခဲ့သည့် ပိုးနားသန်မျိုးစိတ်အား နန်နာရီယာဆွစ်တေး သို့မဟုတ် ဆွစ်ကောက်ကွေးသောလက်သည်းများရှိသည့် ပိုးနားသန်ဟု ခေါ်တွင်ခဲ့ကာ ယင်းသည် ဗာဂျီးနီးယား နည်းပညာသိပ္ပံပညာရှင်များဖြစ်သည့် ဒဲရတ်ဟန်နန်၊ ဂျက်ဆန်မင်းစ်နှင့် ပေါလ်မား ရတ်တို့က ZooKeys ဂျာနယ်တွင် ရေးသား ဖော်ပြထားသော မျိုးစိတ်အသစ်အမည် ၁၆ မျိုးထဲမှ တစ်မျိုးဖြစ်သည်ဟုဆိုသည်။ သိပ္ပံပညာရှင် ဟန်နန်သည် တေလာဆွစ်၏ အမာခံပရိသတ်တစ်ဦးဖြစ်ပြီး ၎င်းသဘောကျသော အနုပညာရှင်ကို ဂုဏ်ပြုလိုသည့်အတွက်ကြောင့် ယင်းအမည်ကို ရွေးချယ်ခဲ့ခြင်းဖြစ်သည်။ ယင်းပိုးနားသန်မျိုးစိတ်ကို တေလာဆွစ်၏ အနုပညာလုပ်ငန်းစတင်သည့် တန်နက်ဆီ ပြည်နယ်တွင် တွေ့ရှိခဲ့သောကြောင့် ဆွစ်၏ အမည်ကို ထည့်သွင်းမှည့်ခေါ်ရန် ရွေးချယ်ခဲ့ခြင်းဖြစ်သည်ဟု ၎င်းကဆိုသည်။ “မျိုးစိတ်တွေကို အမည်ပေးရတဲ့ သိပ္ပံပညာရှင် တစ်ယောက်အတွက် တစ်စုံတစ်ယောက်ကို ဂုဏ်ပြုလိုတဲ့ရည်ရွယ်ချက်အပေါ် သူ့ (တေလာဆွစ်)အနေနဲ့ အကောင်းမြင်လိမ့်မယ်လို့ ကျွန်တော်မျှော်လင့်ပါတယ်”ဟု ဟန်နန်က ပြောကြားခဲ့သည်။ ဟန်နန်က ဆွစ်၏သီချင်းများဖြင့် ၎င်းဘဝတွင် ခက်ခဲသည့်အချိန်ကာလအချို့ကို ဖြတ်ကျော်ခဲ့ကြောင်းနှင့် ယင်းအတွက် ၎င်းအနေဖြင့် ကျေးဇူးတင်ရှိပြီး ဂုဏ်ပြုပေးနိုင်သည့် ကိစ္စရပ်တစ်ခုကို လုပ်ဆောင်ခဲ့ခြင်းဖြစ်သည် ဟုလည်း ပြောကြားခဲ့သည်။.
