Mcdonald ၏ ထုပ်ပိုးမှုပုံစံအသစ်ကို ကာညေးဝက်စ်က...
အမေရိကန်ရက်ပ်အဆိုတော်၊ဖက်ရှင် ဒီဇိုင်နာဖြစ်သူ အသက် ၄၄ နှစ်အရွယ် ကာ ညေးဝက်စ်က Mcdonald ၏ထုပ်ပိုးမှုပုံစံသစ်ကို ဖန်တီးရာတွင် သူလည်းပါဝင်ထားကြောင်း အင်စတာဂရမ်တွင် ဖော်ပြထားသည်။ ရန်လိုသည့်အရေးအသားပို့စ်များ ကြောင့် အင်စတာဂရမ်အကောင့် ယာယီအပိတ်ခံရပြီးနောက်၊ ကာညေး (Ye ဟု တရားဝင်နာမည်ပြောင်းထား) က Mcdonald ၏ အစားအစာထုပ်ပိုးမှုဒီဇိုင်းပုံစံသစ်ကို အင်စတာဂရမ်တွင် ယခုတစ်ပတ်တွင်တင်ခဲ့သည်။ ပုံနှင့်အတူ Ye နှင့် နာမည်ကျော်ဂျပန် ဒီဇိုင်နာ နာအိုတို ဖူကာဆာဝါတို့ ပူးပေါင်းပြီး Mcdonald ထုပ်ပိုးမှုပုံစံသစ်ကို ဖန်တီးထားသည်ဟုလည်း ရေးသားထားသည်။ Mcdonald ဘက်ကမူ ထိုကိစ္စကို တစ်စုံတစ်ရာအတည်ပြုတုံ့ပြန်လာခြင်း မရှိသေးပေ။ သို့သော် ထုပ်ပိုးမှုပုံစံသစ်က သန့်လည်း သန့်ရှင်း ၊ ရိုးလည်းရိုးရှင်းဟုဆိုကာ သဘောကျသူများ ရှိနေကြသည်။ ကာညေးဝက်စ်နှင့် ဇနီးကင်ကာဒါရှီ ယန် (ယခုကွဲသွားပြီဖြစ်)တို့ ၏ အကြိုက်ဆုံး အစားအသောက်များကို ၂၀၂၀ ခုနှစ်တွင် Mcdonald ၏ အင်စတာဂရမ်ပို့စ်တစ်ခုတွင် ဖော်ပြခဲ့ဖူးသည်။ ကာညေးဝက်စ်က မစ်ရှိတ်၊ အာလူးချောင်းကြော်၊ ကြက်သားကြွပ်ကြော်၊ Tangy ဆော့စ်တို့ကိုကြိုက်ပြီး ကာဒါရှီယန်က ကြက်သားကြွပ်ကြော်၊ မစ်ရှိတ်၊ အာလူးချောင်းကြော်၊ ဟမ်ဘာဂါနှင့် Apple Pie မုန့်တို့ ကြိုက်သည်။ ကာညေးဝက်စ်သည် ဇနီးဟောင်းကာဒါ ရှီယန်နှင့် ပိဒေးဗစ်ဆင်(လက်ရှိတွဲနေသူ) တို့အတွဲ ၊ ရုပ်သံအစီအစဉ်တင်ဆက်သူထရက် ဗာနိုရာတို့ကို အင်စတာဂရမ်မှ တိုက်ခိုက်ရေးသားခဲ့သည့်အတွက် အကောင့်ယာယီ အပိတ်ခံလိုက်ရသည်။ အင်စတာဂရမ်၏မိခင်ကုမ္ပဏီဖြစ်သည့် Meta မှ ပြောရေးဆိုခွင့် ရှိသူက ကာညေး၏ပို့စ်များသည် အမုန်းစကားဖြန့်ဝေမှု၊ နိုင်ထက်စီးနင်းပြုမှုဆိုင်ရာ မူဝါဒများကို ချိုးဖောက်သည်ဟု တုံ့ပြန်ထားသည်။ ကာညေးက ဒေးဗစ်ဆင်ကြောင့် ကာဒါရှီယန်ဆေးစွဲမှာကို သူတကယ်စိုးရိမ်သည်ဟု ရေးတင်ခဲ့သလို၊ သူနှင့်ကာဒါရှီယန်တို့မပြေလည်မှုအကြောင်းကို The Daily Show အစီအစဉ်တွင် ထည့်ပြောခဲ့သည့် တင်ဆက်သူ ထရက်ဗာနိုရာကို အခဲမကျေကာ ဆိုရှယ်မီဒီယာမှ တိုက်ခိုက်ခဲ့ခြင်းဖြစ်သည်။.
