ဆူပူအုံကြွမှုများနှင့် ပတ်သက်၍ အတိုက်အခံများကို...

အစိုးရအလုပ်အကိုင် ခွဲတမ်းသတ်မှတ်ချက်အပေါ် ကျောင်းသားများဦးဆောင်၍ ဆန္ဒပြမှုများအတွင်း လူသေဆုံးမှုများ ဖြစ်စေသည့် အဓိကရုဏ်းအခြေအနေများအတွက် ဘင်္ဂလားဒေ့ရှ်ဝန်ကြီးချုပ်ရှိတ်ဟာဆီနာက အတိုက်အခံများကို အပြစ်တင်ခဲ့ပြီးကာဖျူးထုတ်ပြန်ထားခြင်းကိုလည်း အခြေအနေတိုးတက်လာမှသာ ပြန်ရုပ်သိမ်းမည်ဟု ပြောကြားခဲ့သည်။ ဘင်္ဂလားဒေ့ရှ်တွင် ဆန္ဒပြသူများနှင့် လုံခြုံရေးတပ်ဖွဲ့ဝင်များအကြား ရက်အတန်ကြာ ရုန်းရင်းဆန်ခတ် ဖြစ်ပွားခဲ့ပြီး ရက်ပိုင်းအကြာ၊ ဇူလိုင် ၂၁ ရက်တွင် ဘင်္ဂလားဒေ့ရှ်၏ ထိပ်တန်းတရားရုံးက အစိုးရအလုပ်အကိုင် နေရာများကို အခွင့်ထူးခံအုပ်စုများအတွက် ခွဲတမ်းချထားသည့် ပမာဏကို လျှော့ချပေးခဲ့သည်။ ယခင်ခွဲတမ်းစနစ်အရ ၁၉၇၁ ခုနှစ် ဘင်္ဂလားဒေ့ရှ် လွတ်လပ်ရေးတိုက်ပွဲဝင် သူရဲကောင်းများ၏ သားသမီးများ အပါအဝင် အခွင့်ထူးခံ အုပ်စုအတွက် လစာကောင်းသော အစိုးရရာထူးနေရာများ၏ ထက်ဝက်ကျော်ကို သီးသန့်ဖယ်ထားခြင်းဖြစ်သည်။ ဘင်္ဂလားဒေ့ရှ်တွင် အဓိကရုဏ်းအခြေအနေများကြောင့် အင်တာနက်လိုင်းများကို ပိတ်ထားရပြီး ကာဖျူးထုတ်ပြန်ထားကာ စစ်တပ်ကိုလည်း ဖြန့်ကြက်ထားသည်။ အဓိကရုဏ်း အခြေအနေများအတွင်း ရဲတပ်ဖွဲ့ဝင်များအပါအဝင် သေဆုံးသူ ၁၇၄ ဦးထက်မနည်းရှိလာခဲ့ပြီး မကြာသေးမီနှစ်များအတွင်း အဆိုးရွားဆုံး အဓိကရုဏ်း အခြေအနေတစ်ရပ်နှင့် ကြုံတွေ့ရလျက်ရှိသည်။ ၇၆ နှစ်အရွယ်ဝန်ကြီးချုပ်ဟာဆီနာသည် အဓိကအတိုက်အခံပါတီက သပိတ်မှောက်ထားသည့် ဇန်နဝါရီလ ရွေးကောက်ပွဲတွင် သက်တမ်းလေးကြိမ်ဆက် အနိုင်ရခဲ့သည်။ “မီးရှို့တိုက်ခိုက်တဲ့ အကြမ်းဖက်မှုတွေ စတင်ပေါ်ပေါက်ချိန်က အဲဒီိကိစ္စက သူတို့နဲ့မပတ်သက်ဘူးလို့ ဆန္ဒပြကျောင်းသားတွေက ပြောခဲ့တယ်”ဟု မြို့တော်ဒါကာတွင် စီးပွားရေးနယ်ပယ်မှ ခေါင်းဆောင်များကို မိန့်ခွန်းပြောကြားစဉ် ဟာဆီနာက ထည့်သွင်းပြောဆိုခဲ့သည်။ ယင်းသည် ဇူလိုင် ၁၉ ရက်တွင် အစိုးရက ကာဖျူးထုတ်ပြန်ပြီးနောက်ပိုင်း ဟာဆီနာ၏ မှတ်ချက်ပေးမှု ပထမဆုံးအကြိမ်ထွက်ပေါ်လာခြင်းဖြစ်သည်။ “ပြည်သူတွေရဲ့ အသက်အိုးအိမ်စည်းစိမ်ကို ကာကွယ်စောင့်ရှောက်ဖို့ မလွှဲသာဘဲကာဖျူးထုတ်ပြန်ခဲ့ရပါတယ်။ ကျွန်မ အဲဒီလိုလုံးဝမလုပ်ချင်ပါဘူး။ အခြေအနေတွေ ပြန်ပြီးတည်ငြိမ်တော့မှ ကာဖျူးထုတ်ပြန်ထားတာကို ပြန်ရုပ်သိမ်းမှာပါ” ဟု ၎င်းက ပြောကြားခဲ့သည်။ ပြီးခဲ့သည့် သီတင်းပတ်က စတင်ဖြစ်ပွားခဲ့သည့် အဓိကရုဏ်းအခြေအနေများနှင့် ပတ်သက်၍ဟာဆီနာက အဓိကအတိုက်အခံ အင်အားစုများဖြစ်သော ဘင်္ဂလားဒေ့ရှ်အမျိုးသားရေးပါတီ၊ Jamaat-e-Islami ပါတီနှင့် ၎င်း၏ ကျောင်းသားအစည်းအရုံးတို့ကို အပြစ်တင်ခဲ့သည်။ ပုဂ္ဂလိကကဏ္ဍတွင် အလုပ်အကိုင် အခွင့်အလမ်း တိုးတက်ကောင်းမွန်မှုမရှိဘဲရပ်တန့်နေပြီး လူငယ်များ အလုပ်လက်မဲ့နှုန်းမြင့်တက်လျက်ရှိရာ လစာနှုန်းထားပုံမှန်တိုး ပြီး အခြားအခွင့်အရေးများလည်း ရရှိနိုင်သည့် အစိုးရအလုပ်အကိုင်များအပေါ် ပိုမိုစိတ်ဝင်စားလာခြင်းကြောင့် ယခုကဲ့သို့ ဆူပူအုံကြွမှုများ ပေါ်ပေါက်လာခြင်းဖြစ်သည်ဟု ကျွမ်းကျင်သူများက သုံးသပ်သည်။ ၎င်းတို့၏ တောင်းဆိုချက်အသစ်များကို လိုက်လျောပေးရန် ဆန္ဒပြခေါင်းဆောင်များက အစိုးရကို ၄၈ နာရီ အချိန်ပေးထားသော်လည်း ပုံမှန်ဆန္ဒပြမှုများ ဖြစ်ပွားခဲ့သည့် မြို့များတွင် အများစုက ကာဖျူးထုတ်ပြန်မှုကို လိုက်နာခဲ့ဖွယ်ရှိကြောင်း သိရသည်။ ဘင်္ဂလားဒေ့ရှ်တွင် အဓိကရုဏ်းအခြေအနေများနှင့် ပတ်သက်၍ ဖမ်းဆီးခံရသူ ၂,၅၀၀ ကျော် ရှိလာသည်ဟု AFP သတင်းဌာနက ဖော်ပြခဲ့သည်။ အခြေအနေကို ထိန်းချုပ်နိုင်ပြီဟု စစ်တပ်အကြီးအကဲက ပြောဆိုထား သော်လည်းကန့်သတ်ပိတ်ပင်မှုများကို ချမှတ်ထားဆဲဖြစ်သည်။.