The Weekend က Squid Game မင်းသမီး ဂျောင်ဟိုယွန်း...

နာမည်ကျော် ကနေဒါအဆိုတော် The Weekend က ကိုရီးယား ဒရာမာဇာတ်လမ်းတွဲ Squid Game သရုပ်ဆောင်မင်းသမီး ဂျောင်ဟိုယွန်းပါဝင်သရုပ်ဆောင်ထားသည့် တေးသီချင်းဗီဒီယိုသစ်မှ ဓာတ်ပုံတစ်ပုံကို ထုတ်ပြန်ခဲ့သည်။ The Weekend သည် ဓာတ်လှေကားဟုယူဆရသောနေရာတွင် တောက်ပစွာ ပြုံးနေသည့် ဂျောင်ဟိုယွန်းနှင့် လက်တွဲထားသည့် ၎င်း၏ တေးသီချင်းဗီဒီယိုသစ်မှ ဇာတ်ဝင်ခန်းတစ်ခန်းပုံကို လူမှုမီဒီယာတွင် တင်ထားခဲ့ခြင်းဖြစ်သည်။ ဓာတ်ပုံ၏စာသားကိုမူ “out of time : thuesday” ဟု ရေးသားဖော်ပြထားသည်။ ထို့ပြင် The Weekend က သဲနာရီပုံအီမိုဂျီကိုထည့်ထားပြီး မင်းသမီးဂျောင်ဟိုယွန်းကို tag တွဲထားသည်။ ထို့ပြင် The Weekend က Instagram Story တွင် ယင်းတေးသီချင်းဗီဒီယိုထဲမှ နောက်ထပ်ဇာတ်ဝင်ခန်းတစ်ခု၏ ဓာတ်ပုံကို မျှဝေခဲ့သေးသည်။ မင်းသမီးဂျောင်ဟိုယွန်းကလည်း The Weekend ၏ ပိုစ့်ကို ၎င်း၏ Instagram Story တွင် ပြန်လည်မျှဝေခဲ့သည်။ “Out of Time” သည် The Weedend ၏ ငါးခုမြောက် စတူဒီယို အယ်လ်ဘမ် “Dawn FM” တွင် ပါဝင်သည့် တေးသီချင်းတစ်ပုဒ်၏အမည်ဖြစ်သည်။ ယင်းတေးသီချင်းဗီဒီယိုသည် ဧပြီ ၅ ရက်တွင် တရားဝင်ထွက်ရှိလာမည်ဟုလည်း သိရသည်။.