မာဗယ်ဇာတ်ကားသစ် ရုံတင်ပြသခွင့်နှင့်ပတ်သက်ပြီး ဆော်ဒီအာရေဗျနှင့်...
နောက်ဆုံးထွက်ထားသည့် မာဗယ်စူပါ ဟီးရိုးဇာတ်ကားသစ်ကို နိုင်ငံတစ်ဝန်းရုံတင် မပြသမီ ဇာတ်ကားထဲမှ LGBTQ နှင့်ပတ်သက်သည့်ဇာတ်ဝင်ခန်းများကို ဖြတ်တောက်ပေးရန် ဆော်ဒီအာရေဗျက ဒစ္စနေကုမ္ပဏီကို တောင်းဆိုခဲ့သည်။ သို့သော် ဒစ္စနေဘက်က ထိုတောင်းဆိုမှုကို ယခုထိ လက်မခံသေးပေ။ Doctor Strange in the Multiverse of Madness ဇာတ်ကားကို မေလဆန်းတွင် စတင်ပြသရန် ဒစ္စနေက စီစဉ်ထားပြီး ဇာတ်ကားထဲတွင် အမေရိကချားဗတ်ဇ်ဆိုသည့် အမျိုးသမီးဇာတ်ကောင်က သူ့မိခင်နှစ်ဦးအ ကြောင်းပြောဆိုသည့် ၁၂ စက္ကန့်စာမျှအခန်းကို ဖြတ်တောက်ပေးရန် ဆော်ဒီဘက်က တောင်းဆိုထားခြင်းဖြစ်သည်။ “သူ့အမေတွေအကြောင်း ပြောတဲ့ အခန်းလေးတင်ပါ။ ဘာလို့လဲဆိုတော့ သူ့မှာ အမေက နှစ်ဦးဖြစ်နေတယ်။ အရှေ့အလယ်ပိုင်းမှာ ဒါမျိုးကိုပြခွင့်ပြုဖို့က တော်တော်မလွယ်လို့ပါ။ ဒစ္စနေကတော့ သူတို့ဘက်က အဲဒီလို လိုက်လျောပေးဖို့ ဆန္ဒမရှိဘူးဆိုပြီး အကြောင်းပြန်တယ်” ဟု ဆော်ဒီရုပ်ရှင်ရုံများဆိုင်ရာ ကြီးကြပ်ရေးမှူးချုပ် နာဝပ်ဖ်အယ် ဆာဘန်က AFP သတင်းဌာနသို့ ပြောသည်။ သို့သော်ထိုဇာတ်ကားပြသခွင့် လုံးဝ ပိတ်လိုက်ပြီဆိုသည့် သတင်းများကိုမူ ၎င်းအရာရှိက ငြင်းဆိုထားသည်။ “ဘယ်တုန်းကမှ မပိတ်ပါဘူး။ ပိတ်မှာလည်း မဟုတ်ပါဘူး။ ပိတ်ဖို့အကြောင်းလည်း မရှိဘူး။ ဖြတ်တောက်တာလေးပဲ လုပ်ခိုင်းတာပါ။ ခုထိတော့ သူတို့ငြင်းနေတုန်း။ ဒါပေမဲ့ ကျွန်တော်တို့ ဆက်ပြီးကြိုးစားနေပါတယ်” ဟု ၎င်းက ပြောသည်။ ပင်လယ်ကွေ့နိုင်ငံများတွင် လိင်တူစုံမက်မှုမှာ ယနေ့တိုင်တရားမဝင်ဘဲ တင်းကျပ်သည့် အစ္စလာမ်မစ်ရှရီယာဥပဒေကျင့်သုံးသည့် နိုင်ငံအဖြစ် ထင်ရှားသည့် ဆော်ဒီတွင်လည်း လိင်တူနှစ်သက်မှုက သေဒဏ်ဖြစ်လာနိုင်သည်အထိ အလားအလာရှိနေသည်။ ဆော်ဒီအာဏာပိုင်များနှင့် ဒစ္စနေတို့ မပြေမလည်ဖြစ်ကြသည်မှာ ယခုပထမဆုံး အကြိမ်လည်းမဟုတ်ပေ။ အန်ဂျလီနာဂျိုလီ သရုပ်ဆောင်ထားသည့် Eternals အမည်ရှိ ဇာတ်ကားတုန်းကလည်း လိင်တူဆက်ဆံရေးကို ရိုက်ပြထားသည့်အတွက်၊ အမြင်မတော်သည့်အခန်းများကိုဖျက်ပေးရန် ဆော်ဒီအပါအဝင် ပင်လယ်ကွေ့နိုင်ငံများက တောင်းဆိုခဲ့သည်ကို ဒစ္စနေက ငြင်းခဲ့သည်။ နောက်ဆုံး ထိုဇာတ်ကားကို အာရပ်နိုင်ငံများတွင် ရုံတင်ခွင့်မရခဲ့ပေ။.
