ဂရမ်မီဆုပေးပွဲတွင် အိုလီဗီယာရိုဒရီဂို၊ Silk Sonic နှင့်...
အမေရိကန်နိုင်ငံ လာ့စ်ဗေးဂတ်စ်မြို့တွင် ဧပြီ ၃ ရက်၌ ကျင်းပသည့် ၆၄ ကြိမ်မြောက် ဂရမ်မီဆုပေးပွဲတွင် အိုလီဗီယာ ရိုဒရီဂို ၊ Silk Sonic နှင့် ဂျွန်ဘာတီစတစ်တို့က အမြင့်ဆုံးဂုဏ်ပြုဆုများကို ရရှိခဲ့သည်ဟုသိ ရသည်။ ဘာတီစတစ်သည် ၎င်းနောက်ဆုံးထွက် ရှိခဲ့သည့် We Are အမည်ရှိတေးအယ်လ်ဘမ် ဖြင့်အကောင်းဆုံးတေးအယ်လ်ဘမ်ဆု အပါအဝင် ဆုငါးဆုကိုရရှိခဲ့ပြီး ရိုဒရီဂိုကမူ အကောင်းဆုံးအဆိုတော် ဆုနှင့် အကောင်းဆုံး ပေါ့အယ်လ်ဘမ်ဆု အပါအဝင်ဆုသုံးဆုု ရရှိခဲ့သည်။ အမေရိကန်နာမည်ကျော်အဆိုတော်များဖြစ်သည့် ဘရူနိုမာစ့်နှင့် ရက်ပ်အဆိုတော် အန်ဒါဆန်ပက် တို့ဖွဲ့စည်းထားသည့် Silk Sonic အဖွဲ့က Leave The Door Open သီချင်းဖြင့် တစ်နှစ်တာအကောင်းဆုံး တေးသီချင်းဆုအပါအဝင် ဆုနှစ်ဆုကို ရရှိခဲ့သည်။ ယင်းဂရမ်မီဆုပေးပွဲတွင် ဆုများပေး အပ်ချီးမြှင့်မှုအပြင် Foo Fighters အဖွဲ့ဝင် တေလာဟော့ကင်းစ် သေဆုံးမှုအတွက်ဝမ်းနည်းခြင်း အထိမ်းအမှတ်ပြုလုပ်ခဲ့ပြီး ယူကရိန်းသမ္မတ ဗိုလိုဒီမာ ဇယ်လန်စကီးမှ ကြိုတင် အသံသွင်းထားသော ဗီဒီယိုဖြင့် ယူကရိန်းကို ထောက်ပံ့ပေးကြရန် တိုက်တွန်းပြောကြားခဲ့သည်။ ကြိုတင်အသံသွင်းထားသော ဗီဒီယို၌ ဇယ်လန်စကီးက “ကျွန်တော်တို့ ကြုံတွေ့နေတဲ့ အဖြစ်အပျက်တွေကို ပြောပြပေးပါ။သင်တို့ရဲ့ လူမှုကွန်ရက်တွေနဲ့ ရုပ်မြင်သံကြားမှာ စစ်ပွဲအကြောင်း အမှန်တရားတွေကိုပြောပြ ပေးပါ။အသံတိတ်မနေကြပါနဲ့” ဟု ပြောကြားခဲ့သည်။ အဆိုတော် ဂျွန်လီဂျန့်နှင့် ယူကရိန်းအဆိုတော် မီကာ နျူတန်၊ တေးဂီတပညာရှင် ဆူဇန်နာ အစ်လီဒန်နှင့် ကဗျာဆရာမ လူဘာရာကင်ချော့တို့အတူပူးပေါင်း၍ Free အမည်ရှိ တေးသီချင်းဖျော်ဖြေမှုအပြီးတွင် ဇယ်လန် စကီး၏ အသံသွင်းထားသောမိန့်ခွန်း ထွက်ပေါ်လာခဲ့ခြင်းဖြစ်သည်။ လာ့စ်ဗေးဂတ်စ်မြို့ရှိ MGM Grand ကဇာတ်ရုံတွင် ကျင်းပသည့် ဂရမ်မီဆုပေးပွဲတွင် Lil Nas X၊ ဘီလီ အိုင်းလစ်ရှ်နှင့် BTS တို့က ဖျော်ဖြေခဲ့ကြသည်။ ဂရမ်မီဆုပေးပွဲသည်အမေရိကန်တွင် COVID-19 ကူးစက်မှုများမြင့်တက်နေခြင်းကြောင့် သုံးလကြာ ရွှေ့ဆိုင်းခဲ့ပြီးနောက် ပြုလုပ်ဖြစ်ခဲ့ခြင်းဖြစ်သည်။ ယင်းဆုပေးပွဲသည် ဝီလ်စမစ်နှင့်ခရစ်ရော့ခ်တို့ကြား အငြင်းအခုံဖြစ်ပွားခဲ့ကြသည့် အော်စကာဆုပေးပွဲပြီးနောက် သီတင်းတစ်ပတ်အကြာတွင် ပြုလုပ်ခဲ့ခြင်းလည်းဖြစ်သည်။.
