The Idol ဇာတ်လမ်းတွဲအပေါ် ဝေဖန်လာကြမည်ကို...
HBO မှထုတ်လွှင့်ပြသလိုက်သည့် The Idol ဇာတ်လမ်းတွဲ တရစပ်ဝေဖန်ခံနေရသည့်အပေါ် ဇာတ်လမ်းတွဲ ပူးတွဲထုတ်လုပ်သူလည်းဖြစ်၊ ကိုယ်တိုင်လည်းမင်းသားနေရာမှ ပါဝင်သရုပ်ဆောင်ထားသည့် ကနေဒါအဆိုတော် The Weeknd က ၎င်း၏ခံစားချက်ကို ဖွင့်ဟထားသည်။ ပေါ့အဆိုတော်များနှင့် ဖျော်ဖြေရေးလောကအကြား ရှုပ်ထွေးသည့်ဆက်ဆံရေးကို ရိုက်ကူးထားပြီး The Weeknd နှင့် လီလီရို့စ်ဒပ်(ဂျွန်နီဒပ်၏သမီး)တို့ အဓိကသရုပ်ဆောင်ထားကာ အပိုင်းရေ ခြောက်ပိုင်း ပါဝင်သည်။ Blackpink အဖွဲ့ဝင် ဂျန်းနီပါဝင်သည့် ပထမဆုံး နိုင်ငံခြားရုပ်သံဇာတ်လမ်းတွဲလည်းဖြစ်ပြီး အပိုင်း(၁)စပြလိုက်ကတည်းက လူပြောများခဲ့သည်။ လီလီက ပေါ့စတား ဂျော့စလင်းအဖြစ်၊ ဂျန်းနီက ဂျော့စလင်း၏သူငယ်ချင်း၊ dancer ဒိုင်ယန်အဖြစ် သရုပ်ဆောင်ထားသည်။ သို့သော်အဖော်အချွတ် ဇာတ်ဝင်ခန်းများစွာ ပါနေမှုကြောင့် ပရိသတ်က ဝေဖန်လာကြပြီး Hollywood Reporter မဂ္ဂဇင်းက လီလီ၏အဖော်အချွတ်မပါသည့် အခန်းရှားသည်ဟုပင် ဖော်ပြခဲ့သည်။ သို့သော်လည်း Variety နှင့်အင်တာဗျူးတွင် The Weeknd က ပရိသတ်ထံမှ အပြောအဆိုခံရမည်ကို ၎င်းကကြိုမျှော်လင့်ခဲ့ပြီးသားဟုဆိုသည်။ “ဒါတွေက အထူးအဆန်းတော့ မဟုတ်ပါဘူး။ သိပ်အောင်မြင်လာတဲ့အခါ ဖြစ်တတ်တာကို ရိုက်ပြတဲ့ ပညာပေးဇာတ်လမ်းနီးနီးပါပဲ။ ကိုယ့်ဘေးကလူတွေက လူကောင်းပုံပေါက်ပေမယ့် သူတို့ရဲ့ရည်ရွယ်ချက်အမှန်က ဘာဆိုတာ မသိနိုင်ဘူး” ဟု နိုက်ကလပ်ပိုင်ရှင်နေရာမှ သရုပ်ဆောင်ထားသည့် The Weeknd က ပြောသည်။ The Idol ရိုက်ကူးရခြင်း၏ ရည်ရွယ်ချက်များထဲမှ တစ်ခုက အောင်မြင်ကျော်ကြား မှုနှင့်ပတ်သက်ပြီး မတူသည့်ရှုထောင့်ကို ပရိသတ်ကို မြင်စေချင်၍ဟုလည်းဆိုပြီး ကံကောင်းသည်က ၎င်းဘေးတွင်ရှိနေသူများက ဘဝတစ်လျှောက်လုံးနီးပါး သိကျွမ်းလာခဲ့သူများဖြစ်နေသည်ဟု The Weeknd က ဖွင့်ဟခဲ့သည်။ ၎င်းတင်မက ဂျန်းနီလည်း ဝေဖန်ခံခဲ့ရပြီး ဂျန်းနီကိုယ်တိုင် ဆုံးဖြတ်လက်ခံခဲ့သည့် ဇာတ်ရုပ်ဖြစ်သော်လည်း Blackpink ၏အေဂျင်စီက ခွင့်ပြုရသလားဟုဆိုကာ ပရိသတ်က အေဂျင်စီကို မကျေမနပ်ဖြစ်ခဲ့ကြသည်။.
