ကိန်းရုပ်ရှင်ပွဲတော်တွင် ပါကစ္စတန်ဇာတ်ကားတစ်ကားကို ပထမဆုံးအကြိမ်...

ပြင်သစ်နိုင်ငံတွင်ကျင်းပနေဆဲဖြစ်သည့် ၇၅ ကြိမ်မြောက်ကိန်းရုပ်ရှင်ပွဲတော်တွင် ပါကစ္စတန်နိုင်ငံက Joyland အမည်ရှိဇာတ်ကားကို ထည့်သွင်းပြသခဲ့ပြီး ပါကစ္စတန်နိုင်ငံအတွင်း ပုံသေကားကျဖြစ်နေသည့် ကျားမခွဲခြားမှုစနစ်ကို ဖျောက်ဖျက်ရန်ရည်ရွယ်သည့် ၎င်းဇာတ်ကားသည် ပွဲတော်တက်ရောက်လာသူများ၏ မတ်တပ်ရပ်လက်ခုပ်သြဘာပေးမှုများရခဲ့သည်။ ကြီးကျယ်ခမ်းနားသည့် ကိန်းရုပ်ရှင်ပွဲတော်တွင် ပါကစ္စတန်ဇာတ်ကားတစ်ကားကို ပထမဆုံးအကြိမ်ပါဝင်ပြသမှုဖြစ်ပြီး ဇာတ်ကားပြသပြီးနောက် ပါဝင်သရုပ်ဆောင်သူ တစ်ဦးဖြစ်သည့် ပါကစ္စတန်ရုပ်ရှင်မင်းသမီး ဆာဝတ်ဂီလာနီက အိမ်မက်အတိုင်းတကယ်ဖြစ်လာပြီဟု ရိုက်တာသတင်းဌာနသို့ ဖြေကြားသွားသည်။ “ဘယ်လိုခံစားရလဲဆိုတော့ အနုပညာရှင်တွေကြိုးစားခဲ့သမျှ ၊ ပါကစ္စတန်မှာရင်ဆိုင်ကြုံတွေ့ရတဲ့ အခက်အခဲတွေမှန်သမျှ အားလုံးထိုက်တန်သွားသလို ခံစားရတယ်” ဟု သရုပ်ဆောင်ဂီလာနီက ဆက်ပြောသည်။ Joyland ဇာတ်ကားက ကိန်းရုပ်ရှင်ပွဲတော်တွင် အဓိကဆုဖြစ်သည့် Palme d’Or ဆုနှင့်အပြိုင်ပေးသည့် Un Certain Regard ဆုအတွက် ပြိုင်ပွဲဝင်ဇာတ်ကားဖြစ်ပြီး ဇာတ်ကားထဲတွင် ဂီလာနီက နူချီဆိုသည့်အိမ်ရှင် မဇာတ်ကောင်ကို သရုပ်ဆောင်ထားသည်။ မျိုးဆက်မပြတ်စေမည့် သားယောကျ်ားလေးကို မျှော်လင့်နေသည့်မိသားစု ၊ သို့သော် နူချီက သမီးချည်းသာသုံးဦးမွေးထားသည့်အတွက် ယောက္ခထီးဖြစ်သူကို စိတ်ကျေနပ်မှုမပေးနိုင်၊ မတ်ဖြစ်သူကလည်း လိင်ပြောင်း အမျိုးသမီးဘီဘာဆိုသူနှင့် တိတ်တိတ်ပုန်း ချစ်ကြိုက်နေ၊ ဘီဘာက မိန်းမလျာတစ်ဦး၏ အခွင့်အရေးအတွက် ရုန်းကန်ရသူစသည့် ပါကစ္စတန်လူ့အသိုင်းအဝိုင်းအတွင်း အမှန် တကယ်ဖြစ်ပျက်နေသည်များကို ရိုက်ကူးတင်ပြထားသည်။ မိမိ၀ါသနာပါရာကို လုပ်ခွင့်မရ၊ အိမ်မှု အလုပ်များဖြင့်သာ အိမ်တွင်းအောင်းနေရသည့် ပါကစ္စတန်အမျိုးသမီးများ၏ ခံပြင်းမှုကိုလည်း ထိုဇာတ်ကားတွင် မြင်တွေ့ရမည်။ “ ဒီကားက အချစ်ကားလို့ပဲ ပြောလို့မရဘူး။ကျွန်မတို့တွေ ဖြတ်သန်းနေရတဲ့့ဘဝတွေကို ပြောပြထားတာ” ဟု ဂီလာနီကဆိုသည်။ ပါကစ္စတန်ရုပ်ရှင်ပရိသတ်များနှင့် ဝေဖန်ရေးသမားများလည်း ကိန်းရုပ်ရှင်ပွဲတော်တွင်ရခဲ့သည့် နွေးထွေးသည့်လက်ခံမှုမျိုး ထိုဇာတ်ကားကိုပေးရန် ဂီလာနီက စိတ်ကူးမျှော်လင့်နေသည်။.