ဂျက်စတင်ဘီဘာ ကမ္ဘာလှည့်ဖျော်ဖြေပွဲပြုလုပ်မည့်နေရာများထဲ...
ကမ္ဘာလှည့်ဖျော်ဖြေရန် ဂျက်စတင်ဘီဘာ ရွေးချယ်ထားသည့်နေရာများထဲ အရှေ့တောင်အာရှမှ မလေးရှားနိုင်ငံနှင့် အင်ဒိုနီးရှားနိုင်ငံတို့အပြင် စင်ကာပူလည်း ပါဝင်လာပြီဖြစ်သည်။ စင်ကာပူရှိ အမျိုးသားကဇာတ်ရုံတွင် ဘီဘာက အောက်တိုဘာ ၂၅ ရက်၌ ဖျော်ဖြေသွားမည်ဖြစ်ပြီး ရှိုးပွဲလက်မှတ်များကို ဧပြီ ၂၁ ရက် နံနက် ၁၀ နာရီတွင် သတ်မှတ်ဝက်ဘ်ဆိုဒ်၊ ဖုန်းနံပါတ်များမှတစ်ဆင့် ရောင်းချသွားမည်ဖြစ်ကာ လက်မှတ်စျေးနှုန်းက စင်ကာပူ ဒေါ်လာ ၁၀၈ ဒေါ်လာမှ ၃၄၈ ဒေါ်လာကြား ကျသင့်မည်ဖြစ်သည်။ Justice World Tour အမည်ဖြင့် ကမ္ဘာလှည့် ဖျော်ဖြေမှုတစ်စိတ်တစ်ပိုင်းအဖြစ် ဘီဘာက မလေးရှားနိုင်ငံ ကွာလာလမ်ပူရှိ ဘူကစ်ဂျာလီအားကစားကွင်းတွင် အောက်တိုဘာ ၂၂ ရက်၌၊ အင်ဒိုနီးရှားနိုင်ငံ ဂျာကာတာရှိ ဂျီဘီကေမက်ဒရာအားကစားကွင်းတွင် နိုဝင်ဘာ ၃ ရက်၌ လာရောက်ဖျော်ဖြေပေးမည်ဖြစ်ကာ ထိုပွဲများ ပြီးပါက ဂျပန်သို့ ဆက်လက်ထွက်ခွာပြီး နိုဝင်ဘာ ၉ ရက်တွင် နာဂိုယာ၊ နိုဝင်ဘာ ၁၂ ရက်တွင် အိုဆာကာ၊ နိုဝင်ဘာ ၁၆ ရက်တွင် တိုကျိုတို့၌ ဆက်လက် ဖျော်ဖြေသွားမည်ဖြစ်သည်။ Justice World Tour အစအဆုံး ကြာမြင့်နိုင်မည့်အချိန်က ၂၀၂၂ ခုနှစ်နှင့် ၂၀၂၃ ခုနှစ်အတွင်း ရက်ပေါင်း ၁၀၀ ကျော် ကြာမြင့်နိုင်ဖွယ်ရှိပြီး မြောက်အမေရိက၊ တောင်အမေရိက၊ ဗြိတိန်၊ သြစတြေးလျ၊ နယူးဇီလန်၊ တောင်အာဖရိက၊ အာရှနှင့် အရှေ့အလယ်ပိုင်းတို့ကို လှည့်လှည်ဖျော်ဖြေမည်ဖြစ်သည်။ Justice Tour ကို ၂၀၂၀ ခုနှစ်၊ မတ်ကတည်းက စီစဉ်ထားခဲ့သော်လည်း ကပ်ရောဂါကြောင့် နောက်ဆုတ်ခဲ့ရသည်။ အသက် ၂၈ နှစ်အရွယ်ဘီဘာက လက်ရှိမြောက်အမေရိကတွင် ဖျော်ဖြေနေလျက်ရှိပြီး ဇူလိုင်ကုန်တွင် ဥရောပသို့ခရီးဆက်တော့ မည်ဖြစ်သည်။ Justice အမည်ဖြင့် ဘီဘာက ၂၀၂၁ ခုနှစ်၊ ဧပြီတွင် ခြောက်ခွေမြောက် စတူဒီယိုအယ်လ်ဘမ်ခွေထွက်ထားပြီး အခွေထဲတွင်ပါသည့် Anyone ၊Lonely ၊ Holy နှင့် Peaches သီချင်းများသည် လူကြိုက်များခဲ့သည်။ ဘီဘာနောက်ဆုံးကမ္ဘာလှည့်ဖျော်ဖြေ ခဲ့သည့်အချိန်က ၂၀၁၆ နှင့် ၂၀၁၇ ခုနှစ်က ဖြစ်ပြီး စင်ကာပူတွင်မူ ၂၀၁၃ ခုနှစ်က နောက်ဆုံးအကြိမ် ဖျော်ဖြေထားသည်။ ယခု Tour အတွက် တင်ဆက်ခဲ့သမျှထဲ အကောင်းဆုံး ရှိုးပွဲဖြစ်အောင် ကြိုးစားနေပါသည်၊ မကြာမီ တွေ့ကြမည်ဟု ဘီဘာက အားခဲကြေညာထားသည်။.
