Met Gala ဝတ်စုံအတွက် ၁၆ ပေါင်ကျအောင် မည်သို့ Diet...
ဖက်ရှင်လောက၏ အခမ်းနားဆုံးညပွဲ ဟုတင်စားကြသည့်၊ နယူးယော့ခ်ရှိ မက်ထ ရိုပိုလစ်တန်အနုပညာပြတိုက်အတွက် ရန်ပုံ ငွေရှာဖွေပွဲဖြစ်သည့် Met Gala 2022 ပွဲသို့ တီဗီစတား၊စီးပွားရေးလုပ်ငန်းရှင် ကင်ကာဒါ ရှီယန်က မာရီလင်မွန်ရိုး၏ဝတ်စုံကို ဝတ်ဆင် တက်ရောက်ခဲ့သည်။ ခရစ္စတယ်များဖြင့် ဖိတ်လက်နေသည့် ၎င်းဝတ်စုံကို ၁၉၆၂ ခုနှစ်တွင် မွန်ရိုးက အမေရိကန်သမ္မတဂျွန်အက်ဖ်ကနေဒီအတွက် Happy Birthday သီချင်းသီဆိုပေးချိန် ဝတ်ထားခဲ့ခြင်းဖြစ်သည်။ ထိုဝတ်စုံနှင့်တော်အောင် ကာဒါရှီယန်က ခက်ခက်ခဲခဲကြိုးစားထားခြင်းဖြစ်ပြီး သူ မည်သို့ diet လုပ်ခဲ့သည်ကို မေ ၂ ရက်က ပြု လုပ်သည့် Met Gala ပွဲတွင် Vogue မဂ္ဂဇင်း သို့ ဖြေကြားပေးသွားပြီးနောက် ဝေဖန်သံများ ထွက်လာခဲ့သည်။ ပွဲမတိုင်မီ သုံးပတ်အတွင်း ကာဒါရှီယန်သည် ၁၆ ပေါင်ကျအောင်ချခဲ့ပြီး ကစီဓာတ် မပါသည့်အစာများကိုသာ ရွေးစားခဲ့သည်။ အငတ်ခံခြင်းမဟုတ်ဘဲ တင်းတင်းကျပ်ကျပ် နေထိုင်စားသောက်ခဲ့ခြင်းသာဖြစ်သည်ဟု သူကဆိုသည်။ ဝတ်စုံနှင့်မတော်သလို ပြန်ပြင်၍လည်း မရသည့်အတွက် ငိုချင်ခဲ့ကြောင်း၊ သကြားနှင့် ကစီဓာတ်ပါသည့်အစာများကို အစားရပ်လိုက်ကြောင်း၊ ပြေးစက်ဖြင့်လည်းပြေးကြောင်း၊ ပင်ပင်ပန်းပန်းကြိုးစားပြီးနောက် ဝတ်စုံတော်သွားသည့်အခါ ပျော်ပြီးငိုချင်ခဲ့ပြန်ကြောင်း ကာဒါရှီယန်ကဆိုသည်။ ဗြိတိန်ထိန်းသိမ်းစားသောက်နည်း ဆိုင်ရာအသင်းအဖွဲ့မှတာဝန်ရှိသူတစ်ဦးကမူ သုံးပတ်အတွင်း အဆီ ၁၆ ပေါင်ကျရန်မဖြစ်နိုင်ဟု ဆိုပြီး ကာဒါရှီယန်၏ပြောဆိုချက်များသည် အန္တရာယ်ဖြစ်စေနိုင်ကာ လုံးဝမှားနေသည့် မက်ဆေ့ကိုပေးနေသည်ဟု တုံ့ပြန်ထားသည်။ ထို့ပြင် အနုပညာရှင်များထံမှ အစာအာဟာရဆိုင်ရာအကြံဉာဏ်များကို မယူကြရန်လည်း သူကသတိပေးနေသည်။ အမေရိကန်ရုပ်ရှင်မင်းသမီးလီလီရိုင်း ဟတ်ကလည်း လူငယ်သန်းပေါင်းများစွာက မိမိတို့ နေ့စဉ်ပြောဆိုနေထိုင်သည်များကို စောင့်ကြည့်နေကြမှန်းသိလျက်နှင့် ယခုလို ပြင်းထန်သည့် diet လုပ်နည်းများကို ချပြသည်မှာ လုံးဝမှားကြောင်း အင်စတာဂရမ်တွင် ရေးသားထားသည်။ မူမမှန်စားသောက်နေထိုင်မှုဆိုင်ရာကူညီပေးရေးအဖွဲ့ Beat မှဒါရိုက်တာတစ်ဦးကလည်း ပြည်သူများ မိမိတို့ကြားသမျှကို တုပ နည်းမယူကြရန်နှင့် ဆရာဝန်နှင့်တွေ့ပြီးတိုင်ပင်ကြရန်သာ တိုက်တွန်းထားသည်။.
