ရှာရွတ်ခန်း၏ (၅၈)နှစ်ပြည့် မွေးနေ့ပါတီကို နိုဝင်ဘာ ၂ ရက်တွင်...
လာမည့်နိုဝင်ဘာ ၂ ရက်တွင် ရှာရွတ် ခန်း၏အသက် ၅၈ နှစ်ပြည့် မွေးနေ့ပါတီကို အကြီးအကျယ် ကျင်းပသွားမည်ဖြစ်သည်။ သတင်းပေးအချို့အဆိုအရ ဘန်ဒရာတွင် မွေးနေ့ပွဲပြုလုပ်မည်ဖြစ်ပြီး သရုပ်ဆောင်၊ ဒါရိုက်တာ ၊ ပရိုဂျူဆာ စသည့် အိန္ဒိယရုပ်ရှင် အသိုင်းအဝိုင်းမှထင်ရှားသူအားလုံးနီးပါးကို ဖိတ်ကြားထားသည်။ ကိုဗစ်ကပ်ဘေးကာလက မွေးနေ့များကို တိတ်တဆိတ်ဖြတ်သန်းလာခဲ့ရပြီးနောက် ၂၀၂၃ ခုနှစ်သည် ရှာရွတ်ခန်းအတွက် အထူးအောင်မြင်သည့်နှစ်ဖြစ်သည်။ ယခုနှစ်အတွင်း ခန်း၏ Pathaan နှင့် Jawan ရုံတင်ကားနှစ်ကားစလုံး အောင်မြင်ထားသည်။ ထို့ကြောင့်မွေးနေ့ပွဲပါတီထက်ခန်း၏ ၂၀၂၃ အောင်မြင်မှုများကို အောင်ပွဲခံမည့်ပါတီဟုဆိုလျှင်လည်း မှားမည်မထင်ပေ။ နိုဝင်ဘာ ၂ ရက်တွင် ခန်း၏အမာခံပရိသတ်များအတွက် Dunki ဇာတ်ကား အမြည်းလည်း ထွက်လာမည်။ ထို့နောက်မွမ်ဘိုင်းရှိ ခန်း၏နေအိမ်ရှေ့တွင် လာရောက်စုဝေးကြမည့် ပရိသတ်ကို ခန်းက နှုတ်ဆက်လိမ့်မည်ဖြစ်သည်။ နိုဝင်ဘာ ၂ ရက်ညမှ မွေးနေ့ပါတီပြုလုပ်မည်။ Dunki ဇာတ်ကားက ဒီဇင်ဘာ ၂၁ ရက်တွင်စတင်ကာ ရုံတင်ပြသမည်ဖြစ်သည်။.
