ဂါဇာတွင် ကုလသမဂ္ဂက ဖွင့်ထားသည့် စာသင်ကျောင်းကို အစ္စရေးက...

ဂါဇာကမ်းမြောင်ဒေသတွင် ထောင်နှင့်ချီသည့် အိမ်ပစ်ရာပစ် ထွက်ပြေးတိမ်းရှောင်နေသူများ ခိုလှုံနေသည့် ကုလသမဂ္ဂက ဖွင့်ထားသည့် စာသင်ကျောင်းတစ်ကျောင်းကို အစ္စရေးက တိုက်ခိုက်ခဲ့သဖြင့် လူ ၁၆ ဦးသေ ဆုံးခဲ့သည်ဟု ဟားမာ့စ်အဖွဲ့က ပြောကြားခဲ့သည်။ အစ္စရေးစစ်တပ်ကမူ ၎င်းတို့လေယာဉ်များသည် ဂါဇာအလယ်ပိုင်းနျူဆိုင်ရတ်မြို့ရှိ အယ်ဂျဝါနီ စာသင်ကျောင်းအနီးတွင် လှုပ်ရှားနေသည့် စစ်သွေးကြွများကို ပစ်မှတ်ထား ခဲ့ခြင်းဖြစ်ကြောင်း ထုတ်ပြန်ခဲ့သည်။ ဂါဇာကျန်းမာရေးဝန်ကြီးဌာနကမူ ထိုတိုက်ခိုက်မှုသည် စက်ဆုပ်ဖွယ် လူအစုလိုက် သတ်ဖြတ်မှုဖြစ်ကြောင်း ဝေဖန်ရှုတ်ချခဲ့ပြီး ဒဏ်ရာရရှိခဲ့သူ ၅၀ ခန့် ကို ဆေးရုံသို့ ပို့ဆောင်ပေးခဲ့ကြောင်း ပြောကြားခဲ့သည်။ တိုက်ခိုက်မှုဖြစ်ပွားချိန်တွင် စာသင်ကျောင်းအတွင်း လူပေါင်း ၇၀၀၀ ခန့် ခိုလှုံနေထိုင်လျက်ရှိကြောင်း ဟားမာ့စ်၏ သတင်းပြန်ကြားရေးရုံးက ထုတ်ပြန်ခဲ့သည်။ ဒါဇင်နှင့်ချီသည့် အသက်ရှင်ကျန်ရစ်သူများကို အပျက်အစီးများအောက်မှ ဆွဲထုတ်ခဲ့ရကြောင်း ထုတ်ပြန်ချက်တွင် ဖော်ပြခဲ့သည်။ ထိုစာသင်ကျောင်းကို ကုလသမဂ္ဂ၏ ပါလက်စတိုင်းဒုက္ခသည်များဆိုင်ရာ အေဂျင်စီ UNRWA က ဖွင့်လှစ်ထားခြင်းဖြစ်ပြီး ထိခိုက်သေဆုံးသူအများစုမှာ ကလေးများ၊ အမျိုးသမီးများနှင့် သက်ကြီးရွယ်အိုမ်ားဖြစ်သည်ဟု ဟားမာ့စ်အဖွဲ့က ပြောကြားခဲ့သည်။ “ကြိုတင်သတိပေးခြင်းမရှိဘဲ စာသင်ကျောင်းကို ပစ်မှတ်ထားတိုက်ခိုက်တာဟာ ဒါနဲ့ဆိုရင် လေးကြိမ်ရှိနေပါပြီ။ ဗုံးဆန်တွေက စာသင်ခန်းထဲဝင်လာပြီး ကလေးတွေ ဒဏ်ရာရဲ့ပါတယ်”ဟု ရှာမန် အဘူအမ်ရှာအမည်ရှိ အမျိုးသမီးတစ်ဦးက ပြောကြားခဲ့သည်။ ဟားမာ့စ်အဖွဲ့ကမူ ထိုတိုက်ခိုက်မှုကို လူအစုလိုက်သတ်ဖြတ်မှုဖြစ်ကြောင်းနှင့် မိမိတို့ ပါလက်စတိုင်းပြည်သူများကို ဆန့်ကျင်သည့် လူမျိုးတုံးသတ်ဖြတ်သည့် စစ်ပွဲ၏ တစ်စိတ်တစ်ပိုင်းအဖြစ် ရန်သူရာဇဝတ်သားများက ကျူးလွန်သည့် ရာဇဝတ်မှုဖြစ်ကြောင်း ပြောကြားခဲ့သည်။ အစ္စရေးစစ်တပ်ကမူ UNRWA ၏ အယ်ဂျဝါနီ စာသင်ကျောင်းနေရာတွင် လှုပ်ရှားနေသည့် စစ်သွေးကြွများကို တိုက်ခိုက်ခဲ့ခြင်းဖြစ်ကြောင်း ထုတ်ပြန်ခဲ့သည်။ ထိုနေရာသည် ဂါဇာကမ်းမြောင်ဒေသတွင် အစ္စရေး ကာကွယ်ရေးတပ်ဖွဲ့များကို တိုက်ခိုက်သည့် စစ်ဆင်ရေး အခြေခံအဆောက်အအုံနှင့် ပုန်းအောင်းသည့် စခန်းတစ်ခုဖြစ်ကြောင်း ၊ အရပ်သားများထိခိုက်မှု အန္တရာယ်ကို လျော့နည်းစေရန် ဂရုတစိုက် လုပ်ဆောင်ခဲ့ကြောင်း အစ္စရေးစစ်တပ်က ထုတ်ပြန်ခဲ့သည်။ ဂါဇာကမ်းမြောင်ဒေသ အပစ်အခတ်ရပ်စဲရေးနှင့် ဓားစာခံများ လွတ်မြောက်ရေးနှင့်ပတ်သက်၍ ဟားမာ့စ်နှင့် သဘောထားကွဲလွဲမှုများ ရှိနေသော်လည်း လာမည့်သီတင်းပတ်တွင် ကာတာ၏ ကြားဝင်ဖြန်ဖြေမှုနှင့်အတူ အပစ်အခတ်ရပ်စဲရေးဆွေးနွေးမှုများအတွက် ကိုယ်စားလှယ်အဖွဲ့တစ်ဖွဲ့ကို စေလွှတ်သွားမည်ဟု အစ္စရေးက ဇူလိုင် ၅ ရက်တွင် ပြောကြားခဲ့ပြီးနောက် အဆိုပါ တိုက်ခိုက်မှု ဖြစ်ပွားခဲ့ခြင်းဖြစ်သည်။ ဂါဇာအလယ်ပိုင်း အယ်လ်ဘူရာ့ဂျ်ခရိုင်တွင် ဖြစ်ပွားခဲ့သည့် ထိုတိုက်ခိုက်မှုကြောင့် ၎င်း၏ ဝန်ထမ်းနှစ်ဦးသေဆုံးခဲ့သည်ဟု UNRWA က ပြောကြားခဲ့သည်။ ထိုခရိုင်တွင် UNRWA ၏ အစားအစာသိုလှောင်ရုံလည်း ရှိသည်။.