ဗီလိန်ဇာတ်ရုပ်ကိုပိုင်နိုင်သည့် ကင်ဟယ်ရာ The Uncanny Counter...
The Uncanny Counter: Counter Punch ဇာတ်လမ်းတွဲအတွက် အမြည်းဗီဒီယိုကို tvN ရုပ်သံမှ လတ်တလောပြသလိုက်ပြီဖြစ်ပြီး မင်းသမီးကင်ဟယ်ရာ သရုပ်ဆောင်ထားသည့် Gelly Berherd ဆိုသည့်ဇာတ်ရုပ်ကို ပရိသတ်က အတော်ပင်စိတ်ဝင်စားနေကြသည်။ ရက်စက်တတ်၊ လျှို့ဝှက်တတ်သည့်ပုံစံက ကင်ဟယ်ရာနှင့်လိုက်ဖက်လွန်းကာ ဇာတ်လမ်းအမြည်း ကြည့်ပြီးရုံနှင့်ပင် အွန်လိုင်းပရိသတ်များအကြား ချီးကျူးသံများ ထွက်ပေါ်လာသည်။ ‘Season 2 ကြည့်ရတာတော့ သိပ်မိုက်မယ့်ပုံပဲ’ ဟု မှတ်ချက်ပေးသူရှိပြီး အချို့ကလည်း ‘မှတ်တောင်မမှတ်မိ’ ဟုဆိုသည်။ ကင်ဟယ်ရာသည် ဒရာမာဇာတ်လမ်းတွဲများစွာတွင် ဗီလိန်ဇာတ်ရုပ်ဖြင့်သာ ပါခဲ့သော်လည်း သူ့ကို ပရိသတ်များက အားပေးချစ်ကြသည်။ ဆောင်းဟေကို အဓိကသရုပ်ဆောင်သည့် The Glory ဇာတ်လမ်းတွဲတွင်လည်း မွန်ဒုံအွန်းကို အုပ်စုဖွဲ့အနိုင်ကျင့်သည့် ကျောင်းသားအုပ်စုထဲမှ လီဆာရာအဖြစ် ကင်ဟယ်ရာက ပါဝင်ခဲ့ပြီး ငိုက်မျဉ်းနေသည့်အကြည့်ဖြင့် ဆေးသမားလီဆာရာ၏ သရုပ်ဆောင်ပီပြင်မှုကို ပရိသတ်က သဘောကျခဲ့ပြန်သည်။ မည်သည့်ဇာတ်ရုပ်ကို သရုပ်ဆောင်ခွင့် အရချင်ဆုံးလဲဟု အင်တာဗျူးတစ်ခုတွင် မေးမြန်းခံရစဉ်က ရှေးခေတ်ဇာတ်လမ်းတွဲတစ်ခုတွင် ခေါင်းဆောင်မင်းသမီးအဖြစ် ပါခွင့်ရချင်သည်ဟု ကင်ဟယ်ရာက ဖြေခဲ့သည်။ သူ့ကို နာမည်ကျော်ရှေ့နေဇာတ်လမ်းတွဲ Extraordinary Attorney Woo နှင့် Bad Prosecutor တို့တွင် ပရိသတ်သတိထားမိပြီး ဖြစ်လိမ့်မည်။ The Glory ဇာတ်ညွှန်းရသည့်နေ့က ပျော်လွန်းသဖြင့် ငိုခဲ့သည်ဟုလည်း ကင်ဟယ်ရာက ပြောသည်။.
