သြစတြီးယားဖျော်ဖြေပွဲတွင် စတိတ်စင်ပေါ်သို့ ပစ်ပေါက်လိုက်သည့်အရာက...

စတိတ်စင်ပေါ်တွင် အဆိုတော်များ သီဆိုဖျော်ဖြေနေချိန် စင်ပေါ်သို့ အရာဝတ္ထုပစ္စည်းများဖြင့် ပစ်ပေါက်သည့်အလေ့အထတစ်ရပ် ပေါ်ပေါက်လာပြီး ယခုလည်း ဗြိတိန်အဆိုတော်ဟယ်ရီစတိုင် သီဆိုနေချိန် ပစ္စည်းဖြင့် ပစ်ပေါက်ခံရသည့်အတွက် မျက်လုံးကို ထိမှန်ခဲ့သည်။ One Direction အဖွဲ့ဝင်၊ အသက် ၂၉ နှစ်အရွယ်ရှိ ဟယ်ရီစတိုင်သည် ဇူလိုင် ၈ ရက် ညပိုင်းက သြစတြီးယားနိုင်ငံ၊ မြို့တော်ဗီယင်နာတွင် ဖျော်ဖြေခဲ့ပြီး ဖျော်ဖြေနေချိန် ယင်းသို့ကြုံတွေ့ခဲ့ရခြင်းဖြစ်သည်။ ဟယ်ရီစတိုင်သည် နာကျင်သည့်ဝေဒနာကြောင့် ရှုံ့မဲ့သွားခဲ့ပြီး မျက်လုံးကို သူ့လက်ဖြင့် အုပ်ထားခဲ့ရသည်။ ထိုအဖြစ်အပျက်ကို ပရိသတ်များက မှတ်တမ်းဗီဒီယိုများ ရိုက်ယူထားခဲ့သည်။ တွစ်တာအသုံးပြုသူတစ်ဦးကမူ “လူတွေ ဘာလို့ဒီလိုတွေလုပ်နေကြတာလဲ။ ပိုက်ဆံပေးပြီး ရှေ့ဆုံးတန်းကို ယူထားတာ ဒီလိုတွေ လာလုပ်ဖို့လား။ သင်တို့ကို စိတ်ပျက် တယ်”ဟု မှတ်ချက်ပေးခဲ့သည်။ နောက်တစ်ဦးကလည်း “မျက်နှာကိုပဲ ချိန်ပစ်နေကြတယ်။ ဘာလို့လဲ။ လုံးဝနားမလည်နိုင်ဘူး”ဟု ဆိုထားသည်။ ဟယ်ရီစတိုင် မတိုင်မီရှေ့တွင်လည်း အဆိုတော်များ အလားတူဖြစ်ရပ်များကြုံထား ကြသည်။ပြီးခဲ့သည့်လက နယူးယောက်တွင် ပြုလုပ်သည့်ရှိုးပွဲတွင် လူအုပ်ထဲမှတစ်ဦးက စင်ပေါ်ကို ဖုန်းဖြင့်ပစ်ပေါက်လိုက်သည့်အတွက် အဆိုတော်ဘီဘီရက်ဆာ၏ မျက်နှာကို တိုက်ရိုက်ထိမှန်ခဲ့သည်။ အခင်းဖြစ်ဗီဒီယိုအရ ဘီဘီသည် မျက်နှာကို ထိမှန်ခဲ့ပြီးနောက် ဒူးထောက်ထိုင်လိုက်ရသည်။ သူ့ကို ကူညီရန်လည်း စင်ပေါ်ရှိဝန်ထမ်းများ အပြေးရောက်လာကြသည်။ ဆေးရုံတွင် ဒဏ်ရာကို အနည်းငယ်ချုပ်လိုက်ရပြီး အင်စတာဂရမ်တွင် ဘီဘီက မျက်လုံး ဒဏ်ရာပုံများကို ချပြကာ “သူ အဆင်ပြေပါ တယ်”ဟု ဟာသလုပ် ပြောဆိုခဲ့သည်။ ဇွန် ၂၀ ရက်က အမေရိကန်တေးရေး-တေးဆို အေဗာမက်စ်၏ ရှိုးပွဲတွင်လည်း အလားတူဖြစ်ခဲ့သည်။ အေဗာမက်စ်ကမူ စင်ပေါ်တွင် မျက်နှာကို အရိုက်ခံခဲ့ရသည်။ ပိုထူးခြားသည်က အဆိုတော်ပင့်ခ်အလှည့်တွင်ဖြစ်သည်။ British Summer Times ဖျော်ဖြေပွဲတွင် ပင့်ခ် သီဆိုနေချိန် ပရိသတ်တစ်ဦးက မိခင်အရိုးပြာများ ထည့်ထားသည့် ပလတ်စတစ်အိတ်တစ်လုံးကို စင်ပေါ်သို့ ပစ်တင်ခဲ့သည်။ ဟယ်ရီစတိုင် မည်သည့်အရာဖြင့် ပစ်ပေါက်ခံရသည်ကိုမူ ရှင်းရှင်းလင်းလင်း မသိရပေ။.