အမေရိကန်၏ သေနတ်ကိုင်ဆောင်မှုဥပဒေကို ဂျိမ်းစ်ကော်ဒင် ရှုတ်ချ

မေလ ၂၄ ရက်က အမေရိကန်ပြည်ထောင်စု၊ တက္ကဆက်ပြည်နယ်ရှိ မူလတန်း ကျောင်းတစ်ကျောင်းတွင် လူအစုလိုက်သေဆုံးစေခဲ့သည့် ပစ်ခတ်မှုကြီးဖြစ်ပွားအပြီး အမေရိကန်၏ သေနတ်ကိုင်ဆောင်မှုဥပဒေကို ပြစ်တင်ဝေဖန်လာကြသည့် အနုပညာရှင်များထဲ ဗြိတိန်ရုပ်သံအစီအစဉ်တင်ဆက်သူ ဂျိမ်းစ် ကော်ဒင်လည်း ပါဝင်လာသည်။ ကလေးသုံးဦးဖခင် ဂျိမ်းစ်ကော်ဒင်က The Late Late Show အစီအစဉ်ရိုက်ကူးပြီးသည့်နောက်တွင် “အခုမနက်ကလေးတွေကို ကျောင်းလိုက်ပို့ပေးတယ်ဆိုပါစို့။ ပြီးရင် ကလေးတွေကို မိဘကနှုတ်ဆက်အနမ်းပေး ပြီး ပြန်မယ်။မိဘတွေရဲ့စိတ်ထဲမှာ အဲဒါက နောက်ဆုံးနှုတ်ဆက်ခြင်းဖြစ်မယ်လို့ ဘယ်ထင်လိမ့်မလဲ။ နောက် သင့်ရဲ့ကလေးက ပစ်ခတ်မှုမှာပါလို့ ဆုံးသွားပါပြီဆိုတဲ့ဖုန်းများလာခဲ့ရင် ဖခင်တစ်ဦးအနေနဲ့ အဲဒီပူလောင်မှုကို မတွေးရဲဘူး”ဟု ပြောခဲ့သည်။ ဆက်ပြီးသူက “ကျွန်တော်သိတဲ့အမေရိက၊ ကျွန်တော်အမြဲ အထင်ကြီးခဲ့ရတဲ့ အမေရိကဆိုတာ ဒါမျိုးမဟုတ်ဘူး။လက်နက်ကိုင်ဆောင်မှုဥပဒေနဲ့ ပတ်သက်ရင် အမေရိကဟာ ကမ္ဘာ့အတွန့်ဆုတ်ဆုံးနေရာတွေထဲပါတယ်”ဟုဆိုသည်။.