တစ်လခန့်ကြာမြင့်သည်အထိ ရေပြန်ကျခြင်းမရှိသေးသည့် ဧရာဝတီတိုင်း...
တစ်လခန့်ကြာမြင့်သည်အထိ ရေပြန်ကျခြင်းမရှိသေးသည့် ဧရာဝတီတိုင်းဒေသကြီး ငါးသိုင်းချောင်းမြို့နယ် ကွင်းလျှားကျေးရွာတွင် လူဦးရေ ၈၀၀ ခန့် အကူအညီလိုအပ်လျက်ရှိကြောင်း သိရသည်။ ဧရာဝတီတိုင်းဒေသကြီး၊ အုန်းပင်စုကျေးရွာအုပ်စု၊ ကွင်းလျှားကျေးရွာတွင် ပြီးခဲ့သည့် ဇူလိုင် ၁၅ ရက်မှစတင်ကာ ရေကြီးရေလျှံမှုများ ဖြစ်ပေါ်ခဲ့ပြီး တစ်လကြာမြင့်သည်အထိ ရေပြန်ကျသေးခြင်းမရှိကြောင်း သိရသည်။ “ပြီးခဲ့တဲ့ လတည်းက ရေကြီးနေတာပါ။ အခုထိရေပြန်မကျသေးပါဘူး။ ကျွန်တော်တို့ အဖွဲ့အနေနဲ့ အလှုရှင်တွေကိုယ်စား လိုအပ်တဲ့ စားစရာတွေ အဝတ်အထည်တွေကို သွားရောက်လှုဒါန်းပေးခဲ့ပါတယ်” ဟု ကွင်းလျှားကျေးရွာသို့ ရောက်ရှိနေသည့် ကရုဏာကမ်းလက်လူမှုကူညီကယ်ဆယ်ရေးပရဟိတအသင်းမှ တာဝန်ရှိသူတစ်ဦးက ပြောကြားသည်။ အဆိုပါ ဧရာဝတီတိုင်းဒေသကြီး၊ အုန်းပင်စုကျေးရွာအုပ်စု၊ ကွင်းလျှားကျေးရွာတွင် အိမ်အလုံးရေ ၂၀၀ ခန့်ရှိပြီး လူဦးရေ ၈၀၀ ခန့်ရှိကြောင်း သိရသည်။ “အဓိကလိုအပ်တာကတော့ စားသောက်ရေးအခက်အခဲပါ။ ရေက ပြန်မကျသေးတော့ စားသောက်ရေးအခက်အခဲတွေ ဖြစ်ပေါ်နေတာပါ” ဟု ကရုဏာကမ်းလက် လူမှုကူညီကယ်ဆယ်ရေးပရဟိတအသင်းမှ တာဝန်ရှိသူတစ်ဦးက ပြောကြားသည်။ ကျေးရွာရှိ လယ်ကွင်းများလည်း ရေနစ်မြုပ်သွားသည့်အတွက် စားသောက်ရေးအခက်အခဲများ ဖြစ်ပေါ်လျှက်ရှိကြောင်း သိရသည်။.
