FMI အမှုဆောင် ဥက္ကဋ္ဌ ရာထူး ရယူထားသူ ဦးသိမ်းဝေ(ခ) Serg Pun နှင့်...
ရန်ကုန်စတော့အိတ်(စ)ချိန်း-YSX စာရင်းဝင် ပထမမြန်မာ ရင်းနှီးမြှုပ်နှံမှု (First Myanmar Investment-FMI) ၏ အမှုဆောင်ဥက္ကဋ္ဌ ရာထူး ရယူထားသူ ဦးသိမ်းဝေ(ခ) Serg Pun နှင့် အလှည့်ကျ ဒါရိုက်တာ ရာထူး ရယူထားသူနိုင်ငံခြားသားနှစ်ဦး အနားယူ ကြောင်း ကုမ္ပဏီ၏ ဒါရိုက်တာအဖွဲ့ ပြောင်းလဲဖွဲ့စည်းခြင်းကို အစုရှယ်ယာရှင်များထံ အသိပေးမှုတွင် ဖော်ပြထားသည်။ FMI ၏ အခြားထိပ်ပိုင်းရာထူးပြောင်းလဲမှုအဖြစ် အမှုဆောင် ဒါရိုက်တာနှင့် လုပ်ငန်းလည်ပတ်မှုဆိုင်ရာ အမှုဆောင်အရာရှိချုပ် အဖြစ် တာဝန်ယူထားသည့် ဦးထွန်းထွန်းကို အမှုဆောင်အရာရှိချုပ် (CEO) အဖြစ် ပြောင်းလဲခန့်အပ်ထားကြောင်း အစုရှယ်ယာရှင်များကို အသိပေးထားသည်။ ထို့ပြင် FMI ကုမ္ပဏီ၏ ဒါရိုက်တာအဖွဲ့တွင် ဦးထွန်းထွန်း၊ ဒေါက်တာအောင်ထွန်းသက်၊ ဦးသန်းအောင်၊ ဦးကြည်အေး၊ ဦးလင်းမြိုင် အစရှိသူတို့ဖြင့် ဖွဲ့စည်းထားကြောင်း အစုရှယ်ယာရှင် များသို့ အသိပေးထုတ်ပြန်ချက်တွင် ဖော်ပြထားသည်။ FMI ကုမ္ပဏီသည် ငွေကြေးဝန်ဆောင်မှု၊ အိမ်ခြံမြေနှင့် ကျန်းမာရေးဝန်ဆောင်မှု ကဏ္ဍတို့တွင် အဓိက လုပ်ဆောင် လျက်ရှိပြီး ၂ဝ၁၆ ခုနှစ်က ရန်ကုန်စတော့အိတ်ချိန်း၌ ပထမဆုံး စာရင်းဝင်သည့်ကုမ္ပဏီ တစ်ခုဖြစ်သည်။ ဦးသိမ်းဝေမှာ ငွေကြေးခဝါချမှု၊ တရားမဝင် ငွေလွှဲပြောင်းမှု အစရှိ သည်တို့ကြောင့် ထိန်းသိမ်းထားကြောင်း သတင်းများ ထွက်ပေါ် ခဲ့သော်လည်း ရိုးမ မဟာဗျုဟာ(Yoma Strategic Holdings Ltd) ကုမ္ပဏီဘက်ကမူ မဟုတ်မှန်ကြောင်း ငြင်းဆိုထားသည်။ ပြီးခဲ့သည့် ဇူလိုင်လအတွင်းကမူ ဦးသိမ်းဝေ မှာ စင်ကာပူ စတော့အိတ်(စ)ချိန်းစာရင်းဝင် ရိုးမမဟာဗျူဟာဦးပိုင်လီမိတက်၏ အမှုဆောင်ဥက္ကဋ္ဌရာထူးမှ နှုတ်ထွက်ခဲ့သည်။ ရိုးမမဟာဗျူဟာဦးပိုင်လီမိတက်၏ အမှုဆောင်ဥက္ကဋ္ဌရာထူးအား ဦးသိမ်းဝေ၏ သားဖြစ်သူ မဲလ်ဗင်ပန်က အမှုဆောင်အရာရှိချုပ်နှင့် ဥက္ကဋ္ဌရာထူးပါ ပူးတွဲတာဝန်ယူထားသည်။.
