သေနတ်ကိုင်ရမ်းကားမှုဖြင့် ရီဟားနား၏ချစ်သူ အေဆက်ပ်ရော့ကီ...
မနှစ်က မိတ်ဆွေဟောင်းတစ်ဦးကို သေနတ်ထုတ်ခြိမ်းခြောက်မှု၊ ပစ်ခတ်ခဲ့မှုတို့ဖြင့် ရက်ပ်အဆိုတော် အေဆက်ပ်ရော့ကီကို သြဂုတ် ၁၅ ရက်တွင် လော့စ်အိန်ဂျလိစ်ကောင်တီ အစိုးရရှေ့နေရုံးက စွဲချက်နှစ်ခု တင်လိုက်ပြီဖြစ်သည်။ အသက် ၃၃ နှစ်အရွယ် ရော့ကီသည် ၂၀၂၁ ခုနှစ်၊ နိုဝင်ဘာ ၆ ရက်ဖြစ်စဉ် (နှစ်ဖက်စကားများကြရာမှ နောက်ဆုံးပစ်ခတ်မှုဖြစ်ကာ ပစ်သူနှင့်အခြားအမျိုးသားနှစ်ဦးမှာ အခင်းဖြစ်နေရာမှ ခြေကျင်ထွက်ပြေးသွားပြီး အပစ်ခံရသူက ဒဏ်ရာအသေးအဖွဲရခဲ့) အတွက် တရားအစွဲခံရခြင်းဖြစ်သည်။ အများသွားလာနေသည့်နေရာတွင် သေနတ်ကိုင်ရမ်းကားခြင်းသည် ကြီးလေးသည့်ပြစ်မှုဖြစ်ပြီး မတွေးဝံ့ဖွယ်အဆုံးသတ်မျိုးအထိဖြစ်နိုင်ကာ ပစ်မှတ်ထားခံရသူသာမက အပြစ်မဲ့လမ်းသွားလမ်းလာများအတွက်ပါ အန္တရာယ်ရှိသည်ဟု ခရိုင်ရှေ့နေတစ်ဦးက ပြောသည်။ အေဆက်ပ်ရော့ကီသည် ထိုဖြစ်စဉ်အတွက် ဧပြီ ၂၀ ရက်က LA အပြည်ပြည်ဆိုင်ရာလေဆိပ်တွင် ထိန်းသိမ်းခံလိုက်ရသေးသည်။ သို့သော် ထိုနေ့မှာပင် အာမခံဖြင့်ပြန်လွတ်လာသည်။ သူသည် ၂၀၁၉ ခုနှစ်၊ သြဂုတ်ကလည်း ဆွီဒင်နိုင်ငံ၊ စတော့ဟုမ်းမြို့တွင် ရန်ပွဲတစ်ခုကြောင့် တစ်လနီးပါး ဖမ်းဆီးထောင်ချခံရဖူးသည်။ သူနှင့်နောက်လူနှစ်ဦးက အသက် ၁၉ နှစ်အရွယ်ကောင်လေးတစ်ဦးကို ရိုက်နှက်ခဲ့ကြပြီး သူတို့ကိုယ်သူတို့ ကာကွယ်ခြင်းဖြစ်သည်ဟု ထွက်ဆိုသော်လည်း ပြစ်မှုထင်ရှားခဲ့သည်။ ရီဟားနားနှင့်ရော့ကီသည် ၂၀၂၀ ခုနှစ်တွင် စဒိတ်ခဲ့ကြပြီး ရီဟားနားက သူ့ရင်သွေးကို ပြီးခဲ့သည့် မေက မွေးဖွားထားသည်။.
