ဂါဇာကမ်းမြောင်၌ ကျန်ရှိနေသော ဓားစာခံများ လွတ်မြောက်ရေးအတွက်...

ဂါဇာ၌ ကျန်ရှိနေသော ဓားစာခံများ လွတ်မြောက်စေရေး သေချာစေရန် အစ္စရေး အစိုးရကို ဖိအားပေးရန် ရည်ရွယ်သော နိုင်ငံတစ်ဝန်း အထွေထွေသပိတ်ကို စက်တင်ဘာ ၂ ရက်တွင် စတင်ရန် စီစဉ်ထားသည်ဟု သိ ရသည်။ ဂါဇာကမ်းမြောင်တွင် သေဆုံးသွားသော ဓားစာခံခြောက်ဦးအတွက် ဝမ်းနည်းခြင်း၊ ဒေါသထွက်ခြင်း တို့ဖြစ်ပေါ်ခဲ့ရာမှ ဆန္ဒပြသူထောင်ပေါင်းများစွာ လမ်းပေါ်ထွက်ဆန္ဒပြသည့် အင်အားကြီးမားသော ညပိုင်းဆန္ဒ ပြပွဲများဖြစ်ပေါ်လာပြီးနောက် အစ္စရေးအကြီးဆုံးသမဂ္ဂက အထွေထွေသပိတ်မှောက်ရန် ဆော်သြခဲ့ခြင်းဖြစ်ပြီး ယင်းသို့ဆော်သြခဲ့ခြင်းက အစ္စရေးစီးပွားရေးကို ယိမ်းယိုင်စေခဲ့သည်။ အစ္စရေးစစ်သားများသည် သြဂုတ် ၃၁ ရက်တွင် ဂါဇာတောင်ပိုင်း ရာဖာဒေသရှိ မြေအောက် ဥမင်လိုဏ်ခေါင်းထဲမှ ဓားစာခံ အလောင်းခြောက်လောင်းကို ပြန်လည်ရရှိခဲ့သည်ဟု အစ္စရေးစစ်တပ်က ပြောကြားခဲ့သည်။ အစိုးရသည် ယင်းဓားစာခံတို့ကို အသက်ရှင်လျက် ပြန်ခေါ်နိုင်ခြင်းမရှိဟုဓား စာခံတို့၏ဆွေမျိုးများနှင့် ဆန္ဒပြသူများက စွပ်စွဲပြောကြားခဲ့ပြီး အသက်ရှင်နေဆဲ ဓားစာခံများကို ကယ်တင်ရေးအတွက် ချက်ချင်း အပစ်အခတ်ရပ်စဲရန် ၎င်းတို့က တောင်းဆိုခဲ့သည်။ “ကျွန်တော်တို့ဟာ ဓားစာခံတွေကို စွန့်ပစ်ထားတာကို ရပ်ကြရပါတော့မယ်။ ကျွန်တော်တို့ရဲ့ကြားဝင်စွက်မှုဟာ ကိုင်လှုပ်ဖို့လိုနေတဲ့ လူတွေကို ကိုင်လှုပ်နိုင်စေမယ်လို့ ကျွန်တော်ကောက်ချက်ဆွဲခဲ့ပါတယ်။ စက်တင်ဘာ ၂ ရက် မနက် ၆ နာရီကစလို့ အစ္စရေးစီးပွားရေးတစ်ခုလုံးဟာ အပြည့်အဝ သပိတ်မှောက်ကြရပါမယ်”ဟု ဟစ်စတာဒရတ်သမဂ္ဂဥက္ကဋ္ဌ အာနွန်ဘာဒေးဗစ်က ပြောကြားခဲ့သည်။ အောက်တိုဘာ ၇ ရက်တွင် ဟားမာ့စ်က အစ္စရေးတောင်ပိုင်းကို ဝင်ရောက်ကျူးကျော် တိုက်ခိုက်ခဲ့ရာတွင် ဓားစာခံ ၂၅၁ ဦးကို ဟားမာ့စ်က ဖမ်းဆီးခဲ့သည်။ ၎င်းတို့ထဲက ၉၇ ဦးသည် ဂါဇာတွင် ချုပ်နှောင်ခံထားရဆဲဖြစ်ပြီး ဓားစာခံ ၃၃ ဦးသည် သေဆုံးသွားသည်ဟု အစ္စရေးစစ်တပ်က ပြောကြားခဲ့သည်။ နိုဝင်ဘာလထဲတွင် တစ်ပတ်ကြာ ယာယီအပစ်အခတ် ရပ်စဲထားချိန်၌ ဓားစာခံ အများအပြား ပြန်လည် လွတ်မြောက်လာခဲ့သည်။ ကျန်သော ဓားစာခံများ ပြန်လည်လွတ်မြောက်ရေးအတွက် အကောင်းဆုံးနည်လမ်း မှာနောက်တစ်ကြိမ် အပစ်အခတ်ရပ်စဲမှု သဘောတူညီချက် ရရှိရေးပင်ဖြစ်သည်ဟု ဓားစာခံလွတ်မြောက်ရေး ကိစ္စကို တောင်းဆိုနေသူများနှင့် ဓားစာခံတို့၏ မိသားစုများက ယုံကြည်ခဲ့ကြသည်။ “အားလုံးကို ရပ်ပြီးသဘောတူညီချက် ရအောင်လုပ်ဖို့ ကျွန်တော်တို့ရဲ့အစိုးရကို ကျွန်တော်တို့ တောင်းဆိုနေပါတယ်”ဟု ဓားစာခံ ယာဒင်ဘိုဘက်စ်၏ ဦးလေး ရဲယာကက်ရှက်က စက်တင်ဘာ ၁ ရက်ညပိုင်း တဲလ်အဗစ်ဆန္ဒပြပွဲတွင် ပြောကြားခဲ့သည်။ အစ္စရေးဝန်ကြီးချုပ် ဘင်ဂျမင်နေတန်ယာဟုသည် နိုင်ငံရေးဆိုင်ရာ အကျိုးအမြတ်အတွက် စစ်ပွဲကို အချိန်ကြာအောင် လုပ်နေသည်ဟု ဝေဖန်သူများက စွပ်စွဲပြောကြားခဲ့သည်။ တဲလ်အဗစ်ဆန္ဒပြပွဲတွင် ဆန္ဒပြသူအချို့သည် ရဲများနှင့်ခိုက်ရန်ဖြစ်ပွားခဲ့သည်ဟု သိရသည်။.