လီဆောင်ဂီနှင့် လီဒါအင်းတို့စုံတွဲ ၎င်းတို့၏ ကတိအတိုင်း...
တောင်ကိုရီးယားသရုပ်ဆောင်၊ အဆိုတော်လီဆောင်ဂီနှင့် သရုပ်ဆောင်လီဒါအင်းတို့ ကြင်စဦးဇနီးမောင်နှံက ၎င်းတို့ ထားရှိခဲ့သည့် ကတိအတိုင်း လက်ဖွဲ့ငွေများကို လိုအပ်နေသည့်နေရာများသို့ ထည့်ဝင်လိုက်ပြီဖြစ် သည်။ ဧပြီ ၂၄ ရက်တွင် OSEN မီဒီယာက လီဆောင်ဂီတို့စုံတွဲ ကိုရီးယားကြက်ခြေနီ အသင်းသို့ ဝမ်သန်း ၁၁၀ လှူဒါန်းထားသည်ဟု ဖော်ပြခဲ့ပြီး သန်း ၁၀၀ က ကလေးသူငယ် ပြုစုစောင့်ရှောက်ရေးအတွက် လိုအပ်နေသူ မိဘများထံ ထောက်ပံ့ပေးမည်ဖြစ်ကာ ကျန် ၁၀ သန်းက တောမီးကြောင့် ဒုက္ခရောက်နေသူများကို ကူညီသွားရန်ဖြစ်သည်။ အနုပညာရှင်များအနက် အလှူအတန်း ရက်ရောသည့်မင်းသားများထဲတွင် လီဆောင်ဂီလည်း ပါဝင်သည်။ မနှစ်က ဒီဇင်ဘာတွင် ၎င်းသည် ဆိုးလ်ကလေးဆေးရုံသို့ ကိုရီးယားဝမ် နှစ်ဘီလျံ လှူဒါန်းခဲ့ပြီး ယခုနှစ်ဇန်နဝါရီတွင် ကိုရီးယားကြက်ခြေနီအသင်းကြီးသို့ ဝမ်သန်း ၅၅၀ ထပ်မံလှူဒါန်းလိုက်ပြန်သည်။ ဖေဖော်ဝါရီတွင်လည်း သိပ္ပံနှင့်နည်း ပညာဖွံ့ဖြိုးရေးရန်ပုံငွေအဖြစ် ကိုရီးယားသိပ္ပံနှင့် နည်းပညာတက္ကသိုလ် KAIST သို့ ဝမ်သန်း ၃၀၀ ထောက်ပ့ံထားသည်။ လီဆောင်ဂီနှင့် လီဒါအင်းသည် ဧပြီ ၇ ရက်က ဆိုးလ်ဟိုတယ်တစ်ခုတွင် ထိမ်းမြား လက်ထပ်ခဲ့သည်။ သို့သော် လီဆောင်ဂီသည် လီဒါအင်း၏ ပထွေးဖြစ်သူနှင့်ပတ်သက်သည့် အရှုပ်အထွေးကိစ္စများကြောင့် ပရိသတ်၏ ဝေဖန်ပြောဆိုမှုများကို အတော်ရင်ဆိုင်ခဲ့ရသည်။ လက်မထပ်မီကတည်းက လီဒါအင်းကို အရမ်းချစ်ရသည့်အတွက် ဖြစ်လာသမျှ အန္တရာယ်ကို ခံယူပါမည်ဟုလည်း လီဆောင်ဂီက ပွင့်ပွင့်လင်းလင်း ပြောခဲ့သည်။.
