အရှုပ်တော်ပုံနှင့် ရင်ဆိုင်ခဲ့ရပြီးနောက် သရုပ်ဆောင်ကင်ဆွန်းဟို...

အနုပညာလုပ်ငန်းများကို အဆုံးသတ် သွားနိုင်ဖွယ်ရှိသည့် အရှုပ်တော်ပုံနှင့် ရင်ဆိုင်ခဲ့ရပြီးနောက် ပြန်လည်ရုန်းထနိုင်ခဲ့သည့် တောင်ကိုရီးယားမင်းသား ကင်ဆွန်းဟိုသည် ရှစ်လအကြာတွင် အနုပညာအလုပ်များကို ပြန်လည်စတင်ရန် အဆင်သင့်ဖြစ်နေပြီဟု သိရသည်။ Touching the Void ပြဇာတ်သည်ယခု နှစ်အတွင်း ဆွန်းဟို၏ ပထမဆုံးအနုပညာလှုပ်ရှားမှု ဖြစ်လာလိမ့်မည်ဟု ဆိုသည်။ ၂၀၀၉ ခုနှစ်က ပြဇာတ်တွင် ပွဲဦးထွက်ခဲ့သည့် အသက် ၃၆ နှစ်အရွယ် ဆွန်းဟိုသည် ပြဇာတ်တွင် အနုပညာလှုပ်ရှားမှုကို ပြန်လည် စတင်လာလိမ့်မည်ဖြစ်သည်။ ဆွန်းဟို၏အေဂျင်စီ Salt Entertainment က ဇွန် ၂၂ ရက်တွင် ဆွန်းဟိုပါဝင်သည့် ကြော်ငြာပိုစတာတစ်ခုနှင့်အတူ ယင်းသတင်းကို ထုတ်ပြန်ကြေညာခဲ့သည်။ ယင်းပြဇာတ်သည် ၁၉၈၅ ခုနှစ် ကာလကို ဇာတ်အိမ်တည်ထားပြီး ဆွန်းဟို သရုပ်ဆောင်မည့် ဇာတ်ကောင် ဂျိုးဆင်မ်ဆွန်နှင့် ဆိုင်မွန်ရိတ်အမည်ရှိ ဗြိတိန်တောင်တက်သမားနှစ်ဦးသည် Penuvian Andes ရှိ Siula တောင်ထိပ်ကို ပထမဆုံးရောက်ရှိရန် ၎င်းတို့၏ ကြီးမားသောကြိုးစားပုံများကို ဖော်ပြထားခြင်းဖြစ်သည်။ ယင်းတောင်တက်သမားနှစ်ဦးသည် တောင်ပေါ်မှအဆင်းတွင် သေဆုံးလုနီးပါး အခြေအနေနှင့်ရင်ဆိုင်ရပြီး အသက်ရှင်ရန် ရုန်းကန်ရပုံကိုလည်း ယင်းပြဇာတ်တွင် မြင်တွေ့ရမည်ဖြစ်သည်။ ယင်းပြဇာတ်သည် ဂျိုးဆင်မ်ဆွန်က ရေးသားခဲ့သည့်အလားတူ Touching the Void စာအုပ်ကို အခြေခံထားသည်။ ထိုပြဇာတ်အား ဆိုးလ်မြို့တော်ရှိ Art One က ဇာတ်ရုံတွင် ဇူလိုင် ၉ ရက်မှ စက်တင်ဘာ ၁၈ ရက်အထိ ဖျော်ဖြေသွားမည်ဖြစ်သည်။ ဆွန်းဟိုသည် Start-Up နှင့် Hometown Cha- Cha- Cha ဇာတ်လမ်းတွဲများတွင် ပါဝင်ခဲ့ပြီး လူသိများထင်ရှားလာခဲ့သည်။ ၂၀၂၁ ခုနှစ် အောက်တိုဘာလက အမည်မသိအမျိုးသမီးတစ်ဦးသည် ၎င်း၏ချစ်သူဟောင်းဖြစ်ကြောင်း ထုတ်ဖော်ပြောကြားခဲ့ပြီး သူသည် ဆွန်းဟို၏ စိတ်ပိုင်းဆိုင်ရာညှဉ်းပန်းနှိပ်စက်မှုကိုခံခဲ့ရကြောင်း၊ ၎င်း၏ အနုပညာအလုပ်ကို မထိခိုက်စေရန် ၎င်းတို့နှစ်ဦးရရှိထားသော ကိုယ်ဝန်ကိုအတင်းအကျပ်ဖျက်ချခိုင်းကြောင်း စွပ်စွဲချက်များထွက်ပေါ်ခဲ့ပြီးနောက် ဆွန်းဟိုနှင့် စာချုပ်ချုပ်ထားသည့် အမှတ်တံဆိပ်များအားလုံးက ၎င်းနှင့် စာချုပ်ဖျက်သိမ်းခဲ့ကာ 2 Days and 1 Night ရသစုံအစီအစဉ်၌လည်း ပါဝင်ရန် ဖယ်ရှားခံရသည်။.