အဲလစ်ဇဘတ်ဘုရင်မကြီး နန်းစံသက် ၇၀ ပြည့် အထိမ်းအမှတ်အခမ်းအနားတွင်...
ဗြိတိန်ဘုရင်မကြီး ဒုတိယမြောက် အဲလစ်ဇဘတ် နန်းတက်ခဲ့သည်မှာ နှစ် ၇၀ တိုင်ခဲ့ပြီဖြစ်ပြီး ထိုအထိမ်းအမှတ်အဖြစ် ဇွန်တွင် ပလက်တီနမ်ရတုအခမ်းအနားပွဲများကို လေး ရက်ကြာ ကျင်းပသွားမည်ဖြစ်ကာ နောက်ဆုံးနေ့တွင် နာမည်ကျော်အဆိုတော်အက်ရှီရန်က အခြားတင်ဆက်မည့်သူ ၁၀,၀၀၀ ဝန်း ကျင်နှင့်အတူ ပါဝင်ဖျော်ဖြေသွားမည်ဖြစ်သည်။ သက်တော် ၉၆ နှစ်ရှိပြီဖြစ်သည့် အဲလစ်ဇဘတ်သည် ဖေဖော်ဝါရီတွင် နန်းစံသက် ၇၀ ပြည့်ကာ ဗြိတိသျှသမိုင်းတွင် နန်းသက် အကြာဆုံးဘုရင်မ ဖြစ်လာခဲ့သည်။ ထိုအထိမ်းအမှတ် အဖြစ် လာမည့်ဇွန် အစ အများပြည်သူအားလပ်ရက်နှစ်ရက် နှင့် စနေ၊တနင်္ဂနွေ နှစ်ရက်အတွင်း နိုင်ငံတစ်ဝန်း အခမ်းအနားပွဲများ ခမ်းနားကြီးကျယ်စွာ ကျင်းပကြမည်ဖြစ်သည်။ ကျင်းပမည့်ပွဲများထဲ ကျေးဇူးတော်နေ့ အခမ်းအနား၊ ဘက်ကင်ဟမ်နန်းတော်အပြင် ဘက်တွင်ပြုလုပ်မည့် လိုက်ဖ်ရှိုးဖျော်ဖြေပွဲ၊ စစ်ရေးပြချီတက်ပွဲ စသည်တို့လည်း ပါဝင်မည်ဖြစ်သည်။ နောက်ဆုံးနှင့်အခမ်းအနားဆုံးဖြစ်မည့် နေ့က ဇွန် ၅ ရက်တွင်ပြုလုပ်မည့် ပလက်တီ နမ်ရတုအခမ်းအနားဖြစ်ပြီး စစ်တီးဝိုင်းများ၊ အကသမားများ ၊ အားကစား ရုပ်ရှင် ဂီတနှင့် ပြဇာတ်နယ်ပယ်မှ ထင်ပေါ်ကျော်ကြားသူများ က လန်ဒန်မြို့လယ်တွင် သုံးကီလိုမီတာ စာခရီးကို လှည့်လည်ကြမည်ဖြစ်သည်။ ပွဲစီစဉ်သူများက တိုက်ရိုက်ထုတ်လွှင့်မည့် အဆိုပါအခမ်းအနားကို ကမ္ဘာတစ်ဝန်းရှိ လူပေါင်းတစ်ဘီလျံ ကြည့်ရှုကြလိမ့်မည်ဟုလည်း ခန့်မှန်းထားသည်။ လှည့်လှည်ရာတွင် အမိုးဖွင့်ဘတ်စ် ကားခုနစ်စီးဖြင့် တစ်စီးစီတွင် ဆယ်စုနှစ် တစ်ခုစီကိုပုံဖော်ကာ၊ ဗြိတိန်နှင့်ဓနသဟာယ နိုင်ငံများမှ ထင်ရှားသည့်အနုပညာရှင်များ ရှိနေမည်ဖြစ်သည်။ ထို့ပြင် ဂျိမ်းစ်ဘွန်းရုပ် ရှင်ကားများတွင်ပါသည့် ကားများအပါအဝင် ဂန္ထဝင်ကားဟောင်းများလည်း ထည့်သွင်း ပြသသွားမည်ဖြစ်သည်။ နောက်ဆုံးတွင်လူထုက ဘက်ကင်ဟမ်နန်းတော်သို့ရှေးရှုသည့် The Mall လမ်းမကြီးတစ်လျှောက် စုဝေးကြမည်ဖြစ်ကာ အက်ရှီရန်အပါအဝင် ဗြိတိန်ယဉ်ကျေးမှု နယ်ပယ်မှ နာမည်ကျော်များ၏တင်ဆက်မှု များကို ကြည့်ရှုခွင့်ရမည်။သို့သော် ထိုအခမ်းအနားသို့ ဘုရင်မကြီး အဲလစ်ဇဘတ်ကိုယ်တိုင် တက်ရောက်မည်လားဆိုသည်ကို နန်းတော်က အတည်မပြုသေးပေ။.
