အဆိုတော်မျိုးကြီးနှင့် ဝိုင်ဝိုင်းတို့ ဖျော်ဖြေမည့်...
အဆိုတော်မျိုးကြီးနှင့် ဝိုင်ဝိုင်းတို့ ဖျော်ဖြေမည့် လူရှစ်ဦးလျှင် ကျပ် ၂၅ သိန်းတန် ရှိုးပွဲ ရွှေ့ဆိုင်းလိုက်ကြောင်း အဆိုပါပွဲနှင့်ပတ်သက်ပြီး ဆက်သွယ်မေးမြန်းရာတွင် တာဝန်ရှိသူတစ်ဦးက ဖြေကြားသည်။ " ပွဲကိုတော့ ရွှေ့ဆိုင်းထားပါတယ်။ ပြန်လုပ်မယ်ဆိုတာတော့ မသိသေးပါဘူး။ ပြန်လုပ်ဖြစ်ရင် အကြာင်းကြားပေးပါ့မယ်" ဟု အဆိုပါပွဲနှင့်ပတ်သက်ပြီး ဆက်သွယ်မေးမြန်းရာတွင် ဖုန်းလက်ခံဖြေကြားသူက ပြောကြားသည်။ အဆိုပါပွဲမှာ နိုဗိုတယ်ဟိုတယ်တွင် ပြုလုပ်ရန်စီစဉ်ထားပြီး လူရှစ်ဦးစာအတွက် ၂၅ သိန်းကုန်ကျမည်ဖြစ်သဖြင့် လူတစ်ဦးလျှင် ကျပ်သုံးသိန်း ကျော်ကုန်ကျမည်ဖြစ်သည်။ အဆိုပါကျပ် ၂၅ သိန်းတန် စားပွဲတစ်ဝိုင်းတွင် လူရှစ်ဦး စားသောက်နိုင်ပြီး နိုဗိုတယ်အခန်း နှစ်ခန်း၊ စကော့ဝီစကီတစ်လုံး၊ ဘီယာ၊ ဝိုင်နှင့် အမြည်းများကို Free Flow သုံးဆောင်နိုင်မည်ဖြစ်ကြောင်း မူလကကြော်ငြာခဲ့သည်။ မူလက ဖျော်ဖြေပွဲကို ဇူလိုင် ၂၁ ရက် ည ၇ နာရီမှ ၁၀ နာရီအထိပြုလုပ်ကာ Iron Cross တေးဂီတဝိုင်းဖြင့် ဖျော်ဖြေမည်ဖြစ်ကြောင်း ကြော်ငြာထားခဲ့သည်။.
