တေလာဆွစ်ကို “ 2023 Person Of The Year ” အဖြစ် တိုင်းမ်မဂ္ဂဇင်းက...
ပေါ့စတားတေလာဆွစ်ကို ၂၀၂၃ ခုနှစ်၏ “ 2023 Person Of The Year ” အဖြစ် ရွေးချယ် သတ်မှတ်လိုက်ကြောင်း ဒီဇင်ဘာ ၆ ရက်တွင် တိုင်းမ်မဂ္ဂဇင်းက ကြေညာခဲ့သည်။ တစ်နှစ်တာအတွင်း ကမ္ဘာ့လွှမ်းမိုးမှုအကြီးဆုံးပုဂ္ဂိုလ်(သို့မဟုတ်)အဖွဲ့ဟု ယူဆရသူများကို တိုင်းမ်မဂ္ဂဇင်းက ချီးမြှင့်သည့်ဆုဖြစ်ပြီး သူ့အတွက် ဂုဏ်အယူရဆုံး၊ အပျော်ဆုံးဟု တေလာဆွစ်က မဂ္ဂဇင်းတိုက်သို့ပြောသည်။ဆွစ်သည် အနုပညာနယ်ပယ်တွင် ယင်းဆုကို ရသည့် ပထမဆုံးအနုပညာရှင်ဖြစ်သည်။ ဆွစ်သည် တစ်နှစ်လုံးကမ္ဘာပတ်ဖျော်ဖြေပွဲများကြောင့် ပင်ပန်းနေခဲ့ပြီး သုံးနာရီကြာ Eras Tour ရှိုးပွဲများ၏ဒဏ်ကြောင့် အိပ်ရာမှ မခွာချင်လောက်အောင် ဖြစ်ခဲ့ရပုံကို တိုင်းမ်သို့ ပြောပြခဲ့သည်။ “ တစ်ခုခု ထစားတာကလွဲလို့ ကျွန်မအိပ်ရာကနေ မထဘူး။ စားမယ်ဆိုလည်း အိပ်ရာကိုပဲယူလာတယ်။ အဲဒီမှာပဲစား တယ်။ သုံးပွဲဆက်တိုက်ဆိုလိုက်ရင် စကားတောင် မပြောနိုင်ဘူး။ ဒေါက်မြင့်ဖိနပ်တွေနဲ့ ကထားပြန်တော့ ခြေထောက်လည်း မသယ်နိုင်ဘူး” ဟု ဆွစ်က ပြောသည်။၂၀၂၄ ခုနှစ် အထိပြုလုပ်သွားမည့် Eras Tour သည် ကမ္ဘာ့သမိုင်းတလျှောက် ဝင်ငွေအကောင်းဆုံး ကမ္ဘာလှည့်ဖျော်ဖြေပွဲ ဖြစ်လာဖွယ်ရှိသည်ဟု Billboard က ခန့်မှန်းထားသည်။ ၂၀၂၂ ခုနှစ်၏ “ Person Of The Year ” အဖြစ် ယူကရိန်းသမ္မတ ဗိုလိုဒီမာဇယ်လင်စကီကို တိုင်းမ်မဂ္ဂဇင်းက ရွေးချယ်ခဲ့သည်။ သူ့ရှေ့တွင် Telsa လျှပ်စစ်ကားကုမ္ပဏီစီအီးအိုအီ လွန်မတ်စ် ၊ ရာသီဥတုအရေးတက် ကြွလှုပ်ရှားသူ ဂရတ်တာသွန်းဘတ်၊ အမေရိကန်သမ္မတဟောင်း ဒေါ်နယ်ထရန့် ၊ ရုရှားသမ္မတဗလာ ဒီမာပူတင်တို့ ရွေးချယ်ခံထားရသည်။ Forbes မဂ္ဂဇင်းက ယခုတစ်ပတ်ကြေညာထားသည့် ၂၀၂၃ ခုနှစ်အတွင်း ကမ္ဘာ့သြဇာအရှိဆုံး အမျိုးသမီး ၁၀၀ စာရင်းတွင်လည်း ဆွစ်က Top-5 ဝင်ထားသည်။ စီးပွားရေး၊ နည်းပညာ၊ ဘဏ္ဍာရေး၊ မီဒီယာနှင့်ဖျော်ဖြေရေး၊ နိုင်ငံရေး၊ ပရဟိတနယ်ပယ်ခြောက်ခုမှ အထင်ရှားဆုံးအမျိုးသမီးများကို ရွေးချယ်ထားသည့် ယင်းစာရင်းတွင် မီဒီယာနယ်ပယ်မှ ဆွစ်၊ ရီဟားနားနှင့် ဘီယွန်းဆေးတို့ပါဝင်သည်။ ပြီးခဲ့သည့်လက ဘလွန်းဘတ်ကြေညာချက်အရ ဆွစ်သည် ခန့်မှန်းပိုင်ဆိုင်မှုအမေရိကန်ဒေါ်လာ ၁ ဒသမ ၁ ဘီလျံဖြင့် ဘီလျံနာ စာရင်းဝင်အဆိုတော်ဖြစ်လာသည်။ ဘီလျံနာဂုဏ်ပုဒ်ကို ရီဟားနား၊ ဘီယွန်းဆေးနှင့် ဂျေဇီး တို့လည်းရထားသည်။ သို့သော်ဆွစ်က ဖက် ရှင်၊ အလှကုန် အခြားလုပ်ငန်းများမကူဘဲ ဂီတတစ်ခုတည်းဖြင့် ဘီလျံနာဖြစ်လာခဲ့သည်။.
