SBS ၏ Running Man အစီအစဉ်တွင် အပိုင်း ၆၀၀ မြောက်သို့ရောက်ရှိသည့်...
တောင်ကိုရီးယား ရုပ်သံလိုင်းများမှတစ်ခုဖြစ်သည့် SBS TV ၏ ဖျော်ဖြေရေးအစီအစဉ်တစ်ခုဖြစ်သော Running Man သည် ၎င်း၏ အပိုင်း ၆၀၀ မြောက်သို့ ရောက်ရှိလာသည့်အထိမ်းအမှတ်အဖြစ် အထူးပြိုင်ပွဲတစ်ရပ်ကို ကျင်းပပြုလုပ်သွားမည်ဟု သိရသည်။ ဧပြီ ၂၄ ရက် ဒေသစံတော်ချိန် ညနေ ၅ နာရီတွင် စတင်ထုတ်လွှင့်မည့် ၎င်း၏ အပိုင်း ၆၀၀ မြောက်အဖြစ် ပရိသတ်များက အထူးပြိုင်ပွဲတစ်ရပ်ကို ကြည့်ရှုရမည်ဖြစ်သည်။ မကြာသေးမီက ရိုက်ကူးပြီးစီးခဲ့သည့် အပိုင်း ၆၀၀ မြောက် အစီအစဉ်တွင် Running Man အဖွဲ့ဝင်များက “တကယ်လို့ အစီ အစဉ်က အပိုင်း ၆၀၀ မြောက်ဆိုရင် ၁၂ နှစ် ရှိလာခဲ့ပြီဖြစ်ပါတယ်”ဟု ပြောကြားခဲ့သည်။ အဖွဲ့ဝင်များအားလုံးကိုယ်စား အဖွဲ့ဝင် ယူဂျယ်ဆော့က ကျေးဇူးတင်စကား ပြောကြားခဲ့သည်။ “ကျွန်တော်တို့ကို အမြဲအားပေးနေကြတဲ့ ကြည့်ရှုသူတွေအားလုံးနဲ့ ကျွန်တော်တို့နဲ့ အမြဲအတူရှိနေတဲ့ ရိုက်ကူးရေးအဖွဲ့သားတွေကို ကျေးဇူးတင်ပါတယ်။ ကျွန်တော်တို့ရဲ့ Running Man က အပိုင်း ၆၀၀ ပြည့် ရောက်ရှိလာခဲ့ပါပြီ”ဟု ယူဂျယ်ဆော့က ပြောကြားခဲ့သည်။ အပိုင်း ၆၀၀ မြောက်တွင် ကစားပွဲ၌ “with you, race” ခေါင်းစဉ်ဖြင့် ကစားမည့် အစီအစဉ် ပါဝင်မည်ဖြစ်ပြီး ယင်းကစားပွဲ၏ပထမပိုင်းတွင် Running Man အဖွဲ့ဝင်များ က ကြည့်ရှုသူများပေးပို့လာသည့် မေးခွန်းများကို ရိုးရိုးသားသား ဖြေကြားရမည်ဖြစ်သည်ဟု သိရသည်။ ဒုတိယပိုင်းတွင်မူ အဖွဲ့ဝင်များက ကြည့် ရှုသူများဖော်ပြသည့် ဇာတ်ရုပ်တစ်ခုစီကို ယူ၍ ယင်းဇာတ်ရုပ်အတိုင်း သရုပ်ဆောင်ရမည် ဖြစ်သည်ဟု ဆိုသည်။ ယင်းအထူးအစီအစဉ်တွင် ကြည့်ရှုသူများက ဖန်တီးတီထွင်ပေးထားသော ဂိမ်းများလည်း ပါဝင်မည်ဖြစ်ပြီး အနိုင်ရရှိသူအနေဖြင့် ၎င်း၏အမည်ဖြင့် ဝမ် ၁၀ သန်း လှူဒါန်းခွင့် ရရှိနိုင်မည်ဖြစ်သည်။ Running Man အစီအစဉ်သည် ၂၀၁၀ ခုနှစ် ဇူလိုင်လတွင် စတင်ထုတ်လွှင့်ခဲ့ပြီး အကျော်ကြားဆုံး တနင်္ဂနွေဖျော်ဖြေရေးအစီအစဉ်တစ်ခုအဖြစ် ပရိသတ်များ၏အားပေးမှုကို အခိုင်အမာ ရရှိထားပြီးဖြစ်သည်။ Running Man သည် ကိုရီးယားတွင် အကြာရှည်ဆုံး ရသစုံအစီအစဉ်တစ်ခုဖြစ်သည့်အပြင် ယင်းအစီအစဉ်သည် ကိုရီးယား နိုင်ငံတစ်ဝန်းသာမက ပြည်ပနိုင်ငံများကပါ အားပေးနှစ်သက်ကြသည်။.
