ဝယ်လ်စမစ်ပါဝင်သရုပ်ဆောင်ထားသည့် Bad Boys 4 နှင့် Fast and Loose...
အော်စကာစင်မြင့်ထက်တွင် ဝယ်လ်စမစ်၏လက်ဝါးစွမ်းပြလိုက်သည့် အကျည်းတန်ဖြစ်ရပ် ဖြစ်ပွားပြီးနောက် Netflix နှင့် Sony တို့က စမစ် ပါဝင်သရုပ်ဆောင်ထားသည့် ဇာတ်ကားနှစ်ကားပြသမည့်အစီအစဉ်များကို ဆိုင်းငံ့လိုက်ကြပြီဖြစ်သည်။ Fast and Loose ဇာတ်ကားသည် တိုက်ခိုက်ခံရပြီး မှတ်ဉာဏ်ပျောက်ဆုံးသွားသည့် ဒုစရိုက်ခေါင်းဆောင်တစ်ဦး၏ဇာတ်လမ်း၊ လူချမ်းသာဒုစရိုက်သမားတစ်ဦးနှင့် ဆင်းရဲသည့် CIA အေးဂျင့်တစ်ဦးအဖြစ် ကာရိုက်တာနှစ်မျိုးစလုံး သူ ဖြတ်သန်းခဲ့ရ သည်ကို သိရှိသွားသည့်ဇာတ်လမ်းအဖြစ် ပုံဖော်ရိုက်ကူးထားသည်။ ဝယ်လ်စမစ်၏ အော်စကာညဖြစ်ရပ်ကြောင့် Netflix က မလိုလားဖွယ်အာရုံ စိုက်ခံရမှုများ ရှိမလာအောင် ထိုသို့ဆုံးဖြတ်လိုက်ဖွယ်ရှိသည်။အလားတူ Sony မှ Bad Boys 4 ဇာတ်ကားပြမည့်အစီအစဉ်များလည်း နောက်ဆုတ်သွားပြီဖြစ်သည်။ ဝယ်လ်စမစ်ပါဝင်ထားသည့် ဇာတ်ကားများက ထိုနှစ်ကားတည်း မဟုတ်သေးပေ။ Apple TV+ မှ ပြမည့် Emancipation ဒရာမာဇာတ်လမ်းတွဲတွင်လည်း စမစ်ပါဝင်ထားပြီး ၂၀၂၂ ခုနှစ်အတွင်း ပြရန်စီစဉ်ထားသည်။ သို့သော် ပြမည့်နေ့ရက် အတည်မဖြစ်သေးသလို Netflix တို့နည်းတူလုပ်လာမည်လား မသိရသေးပေ။ မတ် ၂၇ ရက်က အော်စကာထူးချွန်ဆုပေးပွဲတွင် သရုပ်ဆောင်ဝယ်လ်စမစ်က သူ့ဇနီးကိုဟာသလုပ်ပြောဆိုခဲ့သည့် အစီအစဉ်တင်ဆက်သူ ဟာသသရုပ်ဆောင်ခရစ္စရော့ခ်ကို စင်ပေါ်တက်ပါးရိုက်ခဲ့ပြီး နောက်တစ်နေ့တွင် သူ့လုပ်ရပ်မှားကြောင်း ရော့ခ်အား စမစ်က ပြန်တောင်းပန်ခဲ့သည်။ Alopecia ခေါ်ဆံပင်ကျွတ်ဝေဒနာ ခံစားနေရသည့် ဇနီးဂျေဒါပင်းကတ်စမစ်၏ ကတုံးဆံပင်ကို ခရစ္စရော့ခ်က စင်မြင့်ထက်မှ ဟာသလုပ်ပြောဆိုလိုက်ခြင်းကြောင့်ဖြစ်သည်။ အခင်းဖြစ်ညက စမစ်ကိုဖမ်းရန် ရဲများ အသင့်ရှိနေခဲ့သော်လည်း ရော့ခ်က မလိုလားသည့်အတွက် ရဲများက စမစ်ကိုတစ်စုံတစ်ရာအရေးယူခြင်းမရှိခဲ့ပေ။ ပွဲအတွင်းမှ ထွက်သွားပေးရန် တောင်းဆိုချက်ကိုလည်း စမစ်က ငြင်းဆန်ခဲ့သည်။ သို့သော် စမစ်သည် အော်စကာအကယ် ဒမီအဖွဲ့မှ မကြာမီက နုတ်ထွက်လိုက်ပြီ ဖြစ်ပြီး အော်စကာဆုများကို မဲပေးရွေးချယ်ခွင့် မရှိတော့ပေ။အော်စကာဆုဆန်ကာတင်စာရင်းထဲ ပါနိုင်မှု၊ အော်စကာပွဲ တက်ရောက်မှု များကိုမူ သူ ဆက်လက်ရရှိထားသည်။.
