စူပါတိုင်ဖွန်းမုန်တိုင်း မဝင်ရောက်မီ တရုတ်နိုင်ငံတောင်ပိုင်းရှိ...

အပူပိုင်းမုန်တိုင်း ယာဂီသည် စူပါတိုင်ဖွန်းမုန်တိုင်းအဖြစ် အားကောင်းလာကာ အားလပ်ရက်အပန်းဖြေကျွန်းတည်ရှိရာ ဟိုင်နန်ပြည်နယ်သို့ တန်းတန်းမတ်မတ် ဦးတည်နေသည့်အတွက် စက်တင်ဘာ ၅ ရက်က တရုတ်နိုင်ငံတောင်ပိုင်းရှိမြို့များတွင် စာသင်ကျောင်းများကို ခေတ္တပိတ်ထားကာ လေယာဉ်ခရီးစဉ်အချို့ကိုလည်း ဖျက်သိမ်းထားကြောင်း သိရသည်။ ယခုသီတင်းပတ်အတွင်း ဖိလစ်ပိုင်နိုင်ငံ၏ လူဇုံကျွန်းမကြီးတွင် အပူပိုင်းမုန်တိုင်းယာဂီ ဝင်ရောက်တိုက်ခတ်ခဲ့သည့်အတွက် အနည်းဆုံး ၁၃ ဦး သေဆုံးခဲ့သည်ဟု တရားဝင်ထုတ်ပြန်ထားသော ကိန်းဂဏန်းများအရ သိရသည်။ အဆိုပါ အပူပိုင်းမုန်တိုင်းသည် စူပါတိုင်ဖွန်းမုန်တိုင်းအဖြစ် အားကောင်းလာခဲ့ပြီး တောင်တရုတ်ပင်လယ်ကိုဖြတ်ကျော်၍ အနောက်ဘက်သို့ ရွေ့လျားလျက်ရှိကြောင်း တရုတ်နိုင်ငံပိုင် ဆင်ဟွာသတင်းဌာနကဖော်ပြခဲ့သည်။ ၎င်းမုန်တိုင်းသည် ဟိုင်နန် ပြည်နယ်ဆီသို့ ဦးတည်လျက်ရှိကာ တစ်နာရီလေတိုက်နှုန်းသည် ၂၀၉ ကီလိုမီတာ(မိုင် ၁၃၀)ရှိကြောင်း သိရသည်။ “စက်တင်ဘာ ၅ ရက် ဒေသစံတော်ချိန် မနက် ၁၁ နာရီခွဲအချိန်က ဟိုင်နန်ပြည်နယ်မှာ မုန်တိုင်းအန္တရာယ် အရေးပေါ်တုံ့ပြန်မှုကို အမြင့်ဆုံးအဆင့်ကို တိုးမြှင့်ကြောင်း ပြည်နယ်သဘာဝဘေးအန္တရာယ် စီမံခန့်ခွဲရေး အာဏာပိုင်အဖွဲ့က ထုတ်ပြန်ခဲ့တယ်”ဟု ဆင်ဟွာက ဖော်ပြခဲ့သည်။ အဆိုပါ တိုင်ဖွန်းမုန်တိုင်းကြောင့် စက်တင်ဘာ ၆ ရက် မွန်းလွဲပိုင်းမှာ ဟိုင်နန်ပြည်နယ် သို့မဟုတ် အနီးဝန်းကျင်ရှိ ကွမ်တုန်း ပြည်နယ်တို့တွင် မြေပြိုမှုဖြစ်ပွားဖွယ်ရှိကြောင်း သိရသည်။ ဟိုင်နန်ပြည်နယ်၏မြို့တော် ဟိုင်ခိုတွင် အလုပ်ရုံများ၊ စာသင်ကျောင်းများနှင့် ဒေသတွင်း သယ်ယူပို့ဆောင်ရေး ဝန်ဆောင်မှုများ ကို ယာယီရပ်ဆိုင်းထားသည်။ ယာဂီမုန်တိုင်း ရှောင်ကွင်းသွားဖွယ်ရှိသည့် ဟောင်ကောင် အထူးအုပ်ချုပ်ခွင့်ရ ဒေသတွင် ယင်းဒေသ၏ တတိယအမြင့်ဆုံး တိုင်ဖွန်းမုန်တိုင်း သတိပေးချက်ထုတ်ပြန်မည်ဖြစ်ကာ ဘဏ္ဍာရေးဗဟိုချက် ဟောင်ကောင်ဒေသအနှံ့တွင် အများပြည်သူ သယ် ယူပို့ဆောင်ရေး စနစ်များကို ကန့်သတ်ထားမည်ဟု မိုးလေဝသစောင့်ကြည့်ရေးဌာနက ဆိုသည်။ စက်တင်ဘာ ၅ ရက်က ဟောင်ကောင်ရှိ မူကြိုကျောင်းများနှင့် စာသင်ကျောင်းအချို့တွင် အတန်းချိန်များကို ခေတ္တရပ်နားထား ကာ စရိတ်နည်းလေကြောင်းလိုင်း Hong Kong Express ကလည်း လေကြောင်းခရီးစဉ် ခြောက်ခုကို ရွှေ့ဆိုင်းထားသည်။ Greater Bay Airlines လေကြောင်းလိုင်းကလည်း ရာသီဥတုအခြေအနေကြောင့် လေယာဉ်ခရီးစဉ်လေးခုကို ဖျက်သိမ်းကာ နောက်ထပ်ခရီးစဉ်နှစ်ခုကိုလည်း ရွှေ့ဆိုင်းမည်ဟု ဆိုသည်။ “ယာဂီမုန်တိုင်းဟာ စူပါတိုင်ဖွန်း မုန်တိုင်းရဲ့ ပြင်းအားအတိုင်း ဆက်ရှိနေမှာဖြစ်ပြီး စက်တင်ဘာ ၆ ရက် မနက်ပိုင်းမှာ ဟောင် ကောင်ဒေသရဲ့ အနောက်တောင်ဘက်၊ ကီလိုမီတာ ၃၀၀ အကွာကနေ ရှောင်ကွင်းသွားမယ်လို့ ခန့်မှန်းထားတယ်”ဟု မိုးလေဝသစောင့်ကြည့်ရေးဌာနက ထုတ်ပြန်ခဲ့သည်။ “မုန်တိုင်းအရှိန်ကြောင့် ဖြစ်ပေါ်လာမယ့် လေပြင်းတိုက်ခတ်နှုန်းဟာ စက်တင်ဘာ ၅ ရက်ညပိုင်းနဲ့ စက်တင်ဘာ ၆ ရက် မနက် ပိုင်းမှာ ပုလဲမြစ်ဝအနီး၊ သက်ရောက်မှုရှိလာနိုင်တယ်”ဟု မိုးလေဝသစောင့်ကြည့်ရေးဌာနက ဆိုသည်။ ယာဂီမုန်တိုင်းသည် တရုတ်နိုင်ငံတောင်ပိုင်းအား ဖြတ်ကျော်ပြီးနောက် ဗီယက်နမ်နိုင်ငံသို့ ဦးတည်ရွေ့လျားဖွယ်ရှိကာ ယူနက်စကို အမွေအနှစ်အထင်ကရ နေရာဖြစ်သော ဟာလုံပင်လယ်အော် အပါအဝင်နိုင်ငံမြောက်ပိုင်းနှင့် မြောက်-အလယ်ပိုင်းဒေသများသည် မုန်တိုင်းတိုက်ခတ်နိုင်သည့် လမ်းကြောင်းပေါ်တွင် ရှိနေကြောင်း သိရသည်။.