စင်ကာပူအခြေစိုက် Sembcorp ကုမ္ပဏီက လုပ်ကိုင်နေသည့် မြင်းခြံ ၂၂၅...

စင်ကာပူအခြေစိုက် Sembcorp ကုမ္ပဏီက လုပ်ကိုင်နေသည့် မြင်းခြံ ၂၂၅ မဂ္ဂါဝပ် လျှပ်စစ်ဓာတ်အားပေးစက်ရုံကို နယ်မြေမတည်ငြိမ်မှုများကြောင့် ယာယီရပ်ဆိုင်းကြောင်း Sembcorp က ကြေညာထားကြောင်း Bangkok Post က ဖော်ပြထားသည်။ စင်ကာပူအခြေစိုက် Sembcorp ကုမ္ပဏီက လုပ်ကိုင်နေသည့် မြင်းခြံ ၂၂၅ မဂ္ဂါဝပ် လျှပ်စစ်ဓာတ်အားပေးစက်ရုံကို ၂၀၁၉ ခုနှစ် မတ် ၁၆ ရက်က စတင်ဖွင့်လှစ်ခဲ့ခြင်းဖြစ်သည်။ ယခင်အစိုးရလက်ထက် လျှပ်စစ်နှင့် စွမ်းအင်ဝန်ကြီးဌာန၊ လျှပ်စစ်ဓာတ်အား ထုတ်လုပ်ရေးလုပ်ငန်းမှ မြင်းခြံဒေသ၊ အမှတ်(၁)သံမဏိစက်ရုံအနီး၌ IPP/BOT စနစ်ဖြင့် ၂၂၅ မဂ္ဂါဝပ်သဘာဝဓာတ်ငွေ့နှင့် စွန့်ပစ်အပူသုံးဓာတ်အားပေးစက်ရုံ စီမံကိန်းများကို ဆောင်ရွက်ခဲ့သည်။ လျှပ်စစ်ဓာတ်အားထုတ်လုပ်ရေးလုပ်ငန်းမှ လျှပ်စစ်ဓာတ်အားတိုးတက်ထုတ်လုပ်နိုင်ရန် မြင်းခြံအမှတ်(၁)သံမဏိစက်ရုံအနီးတွင် IPP ၉၀ မဂ္ဂါဝပ်ဓာတ်ငွေ့အင်ဂျင်သုံး ဓာတ်အားပေးစက်ရုံအား V Power Holdings Ltd နှင့် ၂၀၁၈ခုနှစ် နိုဝင်ဘာ ၇ ရက်က စာချုပ်ချုပ်ဆိုခဲ့ပြီး ၂၀၁၉ ခုနှစ် ဖေဖော်ဝါရီ ၁ ရက်က စီးပွားဖြစ် စတင်ဓာတ်အားထုတ်လုပ်နိုင်ခဲ့ကာ ၂၀၁၉ ခုနှစ် မတ် ၃ ရက်၌ ဖွင့်လှစ်ခဲ့ကြောင်း၊ အဆိုပါဓာတ်အား ပေးစက်ရုံမှ ဓာတ်အား ၉၀ မဂ္ဂါဝပ်ကို ဓာတ်အားစနစ်သို့ ချိတ်ဆက်ပို့ လွှတ်လျက်ရှိကြောင်း သိရသည်။ ထို့ပြင် မြင်းခြံဒေသ၊ အမှတ်(၁)သံမဏိ စက်ရုံအနီး၌ IPP/BOT စနစ်ဖြင့် ၂၂၅ မဂ္ဂါဝပ် သဘာဝဓာတ်ငွေ့နှင့် စွန့်ပစ်အပူသုံး ဓာတ်အားပေးစက်ရုံစီမံကိန်းကို Sebmcorp Myingyan Power Company နှင့် ၂၀၁၆ ခုနှစ် မတ် ၂၉ ရက်က စာချုပ်ချုပ်ဆိုခဲ့ပြီး ၂၀၁၈ခုနှစ် မေ ၇ ရက်တွင် ပထမအဆင့်အနေဖြင့်လည်းကောင်း၊ ၂၀၁၈ခုနှစ် အောက်တိုဘာ ၂ ရက်တွင် ဒုတိယအဆင့်အနေဖြင့်လည်းကောင်း စီးပွားဖြစ် စတင်ဓာတ်အားထုတ်လုပ်ခဲ့ခြင်းဖြစ်သည်။ အဆိုပါဓာတ်အားပေးစက်ရုံစီမံကိန်းမှာ သဘာဝဓာတ်ငွေ့သုံး (Gas Turbine) ၇၁ ဒသမ ၅ မဂ္ဂါဝပ်နှစ်လုံး၊ စွန့်ပစ်အပူသုံးဓာတ်အားပေးစက်ရုံ (Stream Turbine Generation) ၈၂ မဂ္ဂါဝပ်တစ်လုံး တည်ဆောက်ခြင်းလုပ်ငန်းကို ၂၀၁၆ ခုနှစ် မတ် ၂၉ ရက်က စတင်ဆောင်ရွက်ခဲ့ပြီး လိုအပ်သောသဘာဝဓာတ်ငွေ့ကို ရွှေကမ်းလွန်မှ ဖြည့်ဆည်းဆောင်ရွက်ပေးခဲ့ကြောင်း သိရသည်။.