ကိုယ်ရေးမှတ်တမ်းစာအုပ်ရေးနေခြင်းက သူ့ဒဏ်ရာကို အမှန်ကုစားပေးသည်ဟု...
နှစ်ပေါင်းများစွာ ဖခင်၏အထိန်းချုပ်ခံ ဘဝမှလွတ်မြောက်လာသူ ဘရစ်တနီစပီးယားက ကိုယ်ရေးမှတ်တမ်း စာအုပ်တစ်အုပ်ကို ရေးသားနေပြီဖြစ်ပြီး ဧပြီ ၄ ရက်ကတင်ခဲ့သည့် (ယခုမရှိတော့ပြီဖြစ်သည့်) အင်စတာ ဂရမ်ပို့စ်တစ်ခုတွင် ထိုစာအုပ်ရေးသားနေခြင်းက သူ့အတွက်အမှန်တကယ် ကုစားနည်း တစ်ခုဟု ထုတ်ဖော်ပြောထားသည်။ သူ့အတွက် အတိတ်ကအကြောင်းများကို ပြန်ဖော်ရသည်မှာ မလွယ်ကူလှဘဲ အရင်က ထိုမျှလောက်ပွင့်ပွင့်လင်းလင်း သူ့အကြောင်းများကို ဖော်ပြခွင့်မရခဲ့ဟုလည်း ဘရစ်တနီက ၎င်းပို့စ်တွင်ဆိုထားသည်။ ရှည်လျားသည့် သူ၏ ရင်ဖွင့်ပို့စ်ထဲတွင် ဘရစ်တနီက သူ့မှာကားမောင်းခွင့်ပင်မရ၊ မည်သည့်အရာကိုမျှလုပ်ခွင့်မရနေချိန် မိခင်နှင့်ညီမဖြစ်သူတို့က ကိုယ်ရေးမှတ်တမ်းစာအုပ်များ ထုတ်ဝေခဲ့သည့်ကိစ္စကိုလည်း မကျေမနပ်ပြောဆိုထားသည်။အထိန်းချုပ်ခံ ဘဝဖြင့် နေခဲ့ရစဉ်ကာလကို ဘရစ်တနီက ရည်ညွှန်းပြောခြင်းဖြစ်သည်။ ယခုနှစ်စောပိုင်းတွင် ညီမဖြစ်သူဂျေမီ လင်းစပီးယားက Things I Should Have Said အမည်ဖြင့်စာအုပ်ထုတ်လိုက်ပြီး၊ ဘရစ်တနီကလည်း “ဂုဏ်ယူပါတယ် ရောင်းအားအကောင်းဆုံးကြီးရေ၊ နင့်ကို အလိမ်ဖမ်းစက်နဲ့ စစ်ပြီး ငါနဲ့ပတ်သက်လို့ နင်လိမ်ညာနေတာတွေ လူတွေအားလုံးသိစေချင်တယ်” ဟု ထိုစဉ်က အင်စတာဂရမ်တွင် ခနဲ့ရေးလိုက်သေးသည်။ တချိန်တည်း ဘရစ်တနီ၏ ဥပဒေရေးရာအဖွဲ့ ကလည်း ဘရစ်တနီနှင့်ပတ်သက်သည့် ပြောဆိုမှုများရပ်ရန်နှင့် ဘရစ်တနီသည် ရှေ့လျှောက်မိသားစု၏ အနိုင်ကျင့် ဗိုလ်ကျမှုကို ငြိမ်ခံနေတော့မည့်သူမဟုတ်ဟု ညီမဖြစ်သူထံ စာပို့သတိပေးခဲ့သည်။ ဘရစ်တနီ၏ဖခင် ဂျေမီစပီးယားသည် သမီးဖြစ်သူ၏ ငွေကြေးနှင့်ပုဂ္ဂိုလ်ရေးအရပ်ရပ်ကို ဆုံးဖြတ်ခွင့်ရှိသူအဖြစ် တရားဝင် အပ်နှင်းခံခဲ့ရသည်။ဘရစ်တနီ၏ စိတ်ကျန်းမာရေးအခြေအနေကြောင့် သမီးဖြစ်သူကိုစီမံ အုပ်ချုပ်ခွင့်ပေးရန် ဖခင်ကဥပဒေကြောင်း အရတောင်းဆိုလိုက်သဖြင့်၂၀၀၈ ခုနှစ်မှ စတင်ကာ ဖခင်၏ခြယ်လှယ်မှု အောက်နေခဲ့ ရသည်။ထိုအချုပ်အခြယ်ခံဘဝသည် ၂၀၂၁ ခုနှစ်၊ နိုဝင်ဘာမှ အဆုံးသတ်သွားခဲ့သည်။ဘရစ်တနီက သူ့စာအုပ်အတွက် ထုတ်ဝေရေးကုမ္ပဏီနှင့် မည်သို့သဘောတူထားသည် မပြောသော်လည်း၊ အမေရိကန်ဒေါ်လာ ၁၅ သန်းကျော်ရလိမ့်မည်ဟု ဖေဖော်ဝါရီတွင် သတင်းများ ထွက်ခဲ့သည်။ဘရစ်တနီသည် အီရန်-အမေရိကန် ကပြားတစ်ဦးနှင့်စေ့စပ်ထားကြောင်း သိရသည်။.
