ကုန်သွယ်ရေးမညီမျှမှုနှင့် ယူကရိန်းစစ်ပွဲတွင်...
အိန္ဒိယဝန်ကြီးချုပ် နရင်ဒရာ မိုဒီအနေဖြင့် လာမည့်သီတင်းပတ်အတွင်း မော်စကို၌ ရုရှားသမ္မတ ဗလာဒီမာပူတင်နှင့်တွေ့ဆုံစဉ် အိန္ဒိယနှင့်ရုရှားနိုင်ငံအကြား ကုန်သွယ်ရေးမညီမျှမှု၊ ယူကရိန်းစစ်ပွဲတွင် ရုရှားဘက်မှ ပါဝင်တိုက်ခိုက်ပေးရန် စုဆောင်းသိမ်းသွင်းခံရသော အိန္ဒိယနိုင်ငံသားများပြန်လည်ထွက် ခွာခွင့်ရရေးတို့နှင့် စပ်လျဉ်း၍အဓိကဆွေးနွေးမည်ဖြစ်ကြောင်း အိန္ဒိယအစိုးရ ထိပ်တန်းတာဝန်ရှိသူတစ်ဦးက ဇူလိုင် ၅ ရက်တွင် ပြောကြားခဲ့သည်။ ၂၀၀၀ ပြည့်နှစ်မှစတင်၍ အိန္ဒိယနှင့် ရုရှားနိုင်ငံအကြား နှစ်စဉ်ထိပ်သီးဆွေးနွေးပွဲများ ပြုလုပ်ခဲ့ပြီး ယင်းသို့ထိပ်သီးဆွေးနွေးပွဲပြုလုပ်ရန်အတွက် မိုဒီသည် ဇူလိုင် ၈ ရက်မှ ၉ ရက်အထိ မော်စကိုသို့ သွားရောက်ကာ သမ္မတပူတင်နှင့် တွေ့ဆုံမည်ဖြစ်သည်။ မိုဒီ၏ခရီးစဉ်သည် ဇူလိုင် ၉ ရက်မှ ၁၁ ရက်အထိ ၀ါရှင်တန်မြို့တွင် ယူကရိန်းစစ်ပွဲနှင့်ပတ်သက်၍ အဓိကဆွေးနွေးမည့် နေတိုးထိပ်သီးအစည်းအဝေးပြုလုပ်ချိန်နှင့်လည်း တိုက်ဆိုင်နေသည်။ အိန္ဒိယနိုင်ငံခြားရေး ဝန်ကြီးဌာန၏ အဆင့်မြင့် တာဝန်ရှိသူတစ်ဦးဖြစ်သည့် နိုင်ငံခြားရေးဝန်ကြီးဌာနအတွင်းဝန် ဗီနေး ကွာထရာက အခြားမည်သည့်ဆက်နွှယ်မှုမျိုးမှမရှိဟု ငြင်းပယ်ခဲ့ပြီး မိုဒီ၏ခရီးစဉ်သည် နှစ်နိုင်ငံ ထိပ်သီးဆွေးနွေးပွဲပြုလုပ်မည့် အစီအစဉ်တစ် စိတ်တစ်ပိုင်းအရပေါ်ပေါက်လာခြင်းဖြစ်သည်ဟု ၎င်းက ဆိုသည်။ ဆိုဗီယက်ယူနီယံ တည်ရှိစဉ်ကာလက အိန္ဒိယနှင့်ရုရှားသည် အစဉ်အလာအရ ဆက်ဆံရေးရင်းနှီးမှုရှိခဲ့သော်လည်း ပြီးခဲ့သည့် ဆယ်စုနှစ်များအတွင်း အိန္ဒိယသည် အထူးသဖြင့် အမေရိကန်အပါအဝင် အနောက်နိုင်ငံများနှင့် ဆက်ဆံရေးပိုမိုနီးကပ်လာခဲ့ပြီး စီးပွားရေးကဏ္ဍကို ဖြေလျှော့မှုများလုပ်ဆောင်ကာ ပထဝီဝင်နိုင်ငံရေးအရ ဆက်ဆံမှုများကို တိုးမြှင့်ခဲ့သည်။ သို့သော် အိန္ဒိယသည် ယူကရိန်းအရေးနှင့်ပတ်သက်၍ ရုရှားအားဝေဖန်ခြင်းမပြုဘဲ ယင်းပဋိပက္ခကို သံတမန်နည်းလမ်းများဖြင့် လည်းကောင်း၊ အပြန်အလှန်ဆွေးနွေးခြင်းဖြင့်လည်းကောင်း ဖြေရှင်းရန် တိုက်တွန်းခဲ့သည်။ တစ်ချိန်တည်းတွင် အိန္ဒိယသည် စျေးနှုန်းသက်သာစွာဖြင့် ရရှိနေသော ရုရှားထုတ် ရေနံများကိုလည်း စံချိန်တင်ပမာဏအထိ တိုးမြှင့်ဝယ်ယူခဲ့သည်။ ၂၀၂၃-၂၀၂၄ ဘဏ္ဍာနှစ်တွင် အိန္ဒိယ-ရုရှား နှစ်နိုင်ငံကုန်သွယ်မှုပမာဏသည် အဓိကအားဖြင့် စွမ်းအင်ကဏ္ဍတွင် ပူးပေါင်းဆောင်ရွက်မှုများ ခိုင်မာအားကောင်းနေခြင်းကြောင့် သိသိသာသာမြင့်တက်ခဲ့ပြီး ဒေါ်လာ ၆၅ ဘီလျံနီးပါးရှိခဲ့သည်။ သို့သော်အိန္ဒိယ၏ ပို့ကုန်တင်ပို့မှုသည် ဒေါ်လာလေးဘီလျံသာရှိကြောင်း ကွာထရာက ဆိုသည်။ “ကုန်သွယ်ရေးမညီမျှမှု ဆက်ရှိနေတာက ရုရှားနဲ့ အဓိကဆွေးနွေးစရာ ကိစ္စရပ်တစ်ခုဖြစ်တယ်”ဟု ၎င်းက ထပ်မံပြောကြားခဲ့သည်။ သို့ဖြစ်ရာအိန္ဒိယအနေဖြင့် လယ်ယာထွက်ကုန်၊ နည်းပညာ၊ ဆေးဝါးနှင့်ဝန်ဆောင်မှု လုပ်ငန်းများအပါအဝင် ကဏ္ဍအသီးသီးတွင် ပို့ကုန်များတိုးမြှင့်တင်ပို့ခြင်းဖြင့် ဟန်ချက်ထိန်းညှိနိုင်မည်ဟု မျှော်လင့်ကြောင်းလည်း ၎င်းက ဆိုသည်။ ရုရှားစစ်တပ်အတွက် စစ်မှုထမ်းရန်အယုံသွင်းစေခိုင်းခံရသော အိန္ဒိယနိုင်ငံသားများ စောစီးစွာလွတ်မြောက်ရေးအတွက်လည်း ထိုခရီးစဉ်အတွင်း မိုဒီက ကြိုးပမ်းသွားမည်ဟု သိရသည်။.
