ဘန်အက်ဖလက်နှင့် ဂျနီဖာလိုပက်ဇ်တို့ ဒေါ်လာ ၈.၉ သန်းတန်...
ဟောလိဝုဒ်အကျော်အမော်များဖြစ်ကြသည့် ဂျနီဖာလိုပက်ဇ်နှင့် ဘန်အက်ဖလက်တို့ အမေရိကန်နိုင်ငံရှိ ဘန်အက်ဖလက်၏ ဒေါ်လာ ၈.၉ သန်းတန် ဂျော်ဂျီယာစံအိမ်ကြီးတွင် မိသားစုများ၊ မိတ်ဆွေများနှင့် အနုပညာရှင်အပေါင်းအသင်းများ ခြံရံလျက် ကြီးမားသည့် လက်ထပ်ပွဲအခမ်းအနားကို သြဂုတ် ၂၁ ရက်တွင် ပြုလုပ်ခဲ့သည်ဟု သိရသည်။ ယင်းစုံတွဲသည် ဇူလိုင်လက လက်ဗေးဂတ်စ်မြို့တွင် လက်ထပ်ပွဲအခမ်းအနားပြုလုပ်ကျင်းပခဲ့ပြီးနောက် ယခုတစ်ကြိမ်တွင် ဂျော်ဂျီယာ စံအိမ်ကြီး၌ နောက်တစ်ကြိမ်ထပ်မံပြုလုပ်ခဲ့ခြင်းဖြစ်သည်။ လက်ဗေးဂတ်စ်တွင် ပြုလုပ်သည့် လက်ထပ်ပွဲ၌ ဇနီးဟောင်းဂျနီဖာနှင့် ရရှိထားသည့် ဘန်၏ကလေးများအပါအဝင် ရင်းနှီးသည့် မိတ်ဆွေများနှင့် မိသားစုများတက်ရောက်ဂုဏ်ပြုခဲ့ကြသော်လည်း ဘန်၏ဇနီးဟောင်း ဂျနီဖာသည် တက်ရောက်ခဲ့ခြင်းမရှိပေ။ “ဘန်နီဖာ” ဟု လူသိများသည် ဘန်နှင့် ဂျေလိုတို့သည် ကြီးမားသည့် ကော်ဇော်ဖြူပေါ်တွင် အခမ်းအနားပြုလုပ်ကျင်းပခဲ့ခြင်းဖြစ်ပြီး အသက် ၅၃ နှစ်အရွယ် ဂျေလိုသည်အဖြူရောင် Ralph Lauren အဖြူရောင်သတို့သမီးဝတ်စုံကို ဝတ်ဆင်ထားကာ အသက် ၅၀ အရွယ် ဘန်က အဖြူရောင်နှင့် အနက်ရောင် အမျိုးသားပွဲတက်ဝတ်စုံကို ဝတ်ဆင်ထားခဲ့သည်။ ယင်းစုံတွဲသည် စံအိမ်၏ ရေစပ်ဆိပ်ခံတံတားတစ်ခုတွင် ဖက်ထားသည့် ဓာတ်ပုံများ ထွက်ပေါ်လာခဲ့သည်။ လိုပက်ဇ်နှင့် အက်ဖလက်တို့သည် စေ့စပ်လိုက်ကြောင်း ပထမဆုံးထုတ်ပြန်ကြေညာခဲ့ပြီးနောက် ၁၇ နှစ်အကြာတွင် ထိမ်းမြားလက်ထပ်ခဲ့ခြင်းဖြစ်သည်။ လိုပက်ဇ်နှင့် အက်ဖလက်တို့သည်၂၀၀၂ ခုနှစ်က Gigli ရုပ်ရှင်ရိုက်ကွင်းတွင် တွေ့ဆုံခဲ့ကြပြီး ၂၀၀၃ ခုနှစ်တွင် စေ့စပ်ခဲ့သော်လည်း မီဒီယာများထံမှ အလွန်အကျွံအာရုံစိုက်မှုရရှိသည်ဟူသည့်အကြောင်းပြချက်ဖြင့်၂၀၀၄ ခုနှစ်တွင် လမ်းခွဲခဲ့ကြသည်ဟု ဆိုသည်။ သို့သော်နောက်ပိုင်းတွင် ပြန်တွဲခဲ့ကြပြီးနောက် လူမှုမီဒီယာတွင် ၎င်းတို့၏ ချစ်ကြည်နူးဖွယ်ဓာတ်ပုံများ၊ ဗီဒီယိုများကို ပုံမှန်တင်လေ့ရှိကာ ပရိသတ်များက ၎င်းတို့စုံတွဲကို ချစ်စနိုးဖြင့် Bennifer ဟု အမည်ပြောင်ပေးထားသည်။ ဂျနီဖာလိုပက်ဇ်က ၎င်း၏အမည်ကို ဂျနီဖာအက်ဖလက်ဟု ပြောင်းလဲသွားမည်ဖြစ်ကြောင်း လက်ဗေးဂတ်စ်တည်ရှိရာ နီဗားဒါးပြည်နယ်ရှိ ကလက်ကောင်တီ၏ ကလက်ရုံးက ထုတ်ဖော်ပြောကြားခဲ့သည်။.
