ဆလင်းဒီယွန်က ပါရီအိုလံပစ်ဖွင့်ပွဲ အခမ်းအနားတွင်...
ပါရီအိုလံပစ်အားကစားပြိုင်ပွဲ ဖွင့်ပွဲအခမ်းအနားတွင် ဖျော်ဖြေပေးမည့် ဆလင်းဒီယွန်အား သီချင်းတစ်ပုဒ်တည်းစာ အမေရိကန်ဒေါ်လာနှစ်သန်းပေးထားသည်ဆိုသည့် သတင်းများ ထွက်နေသည်။ TMZ မီဒီယာ အဆိုအရ ဆလင်းဒီယွန်သည် ပါရီရှိ Royal Moncean ဟိုတယ်တွင် ဇူလိုင် ၂ ၂ ရက်က တည်းက ရောက်ရှိနေသည်။ သတင်းရင်းမြစ်အချို့၏ဖွင့်ဟချက်အရ ဒီယွန်သည် ဇူလိုင် ၂၆ ရက်တွင် ဖျော်ဖြေရန် အသင့်ဖြစ်လျက်ရှိပြီး နေထိုင်ကောင်းသည်ဟုလည်း ဆိုကြသည်။ ဒီယွန်ဖျော်ဖြေမည်ဆိုသည့် တရားဝင်ကြေညာချက်မထွက်သော်လည်း ပြင်သစ်သမ္မတမက်ခရွန်က ဖွင့်ပွဲအခမ်းအနားတွင် ဒီယွန်ပါဝင်မည်ဆိုပါက ၎င်းအလွန်ပင်ပျော် မိလိမ့်မည်ဟု France 2 ပြင်သစ်ရုပ်သံအား ပြောကြားခဲ့သည်။ အသက် ၅၆ နှစ်ရှိပြီဖြစ်သည့် ဒီယွန်သည် Stiff Person Syndrome ခေါ် အာရုံကြောဆိုင်ရာ ရှားပါးရောဂါတစ်မျိုးဖြစ်နေသည်ကို ၂၀၂၂ ခုနှစ်က သိခဲ့ရပြီးနောက် ဖျော်ဖြေမှုများကို ရပ်နားလိုက်သည်။ SPF သည် ရင်ဘတ် ၊ ခြေထောက်နှင့်လက်တို့ရှိ ကြွက်သားများကို တောင့်တင်းစေသည့် ရောဂါ ၊ လူတစ်သန်းတွင် တစ်ဦးသာဖြစ်တတ်သည့် ရောဂါဆန်းဖြစ်ကာ ရံဖန်ရံခါလည်ပင်းညှစ်ခံထားရသကဲ့သို့ ခံစားရသည်ဟု ဒီယွန် ပြောဖူးသည်။ ကမ္ဘာလှည့်ဖျော်ဖြေမှုကို ၎င်းက ဖျက်သိမ်းထားသော်လည်း တစ်ချိန်ချိန်တွင် စင်ပေါ်၌ သီချင်းပြန်ဆိုနိုင်ရမည်ဟု အားခဲထားသည်။၁၉၉၆ ခုနှစ်က အမေရိကန်ပြည်ထောင်စု၊ အတ္တလန္တာမြို့တွင်ကျင်းပသည့် အိုလံပစ်ပြိုင်ပွဲ ဖွင့်ပွဲအခမ်းအနားတွင် ဒီယွန်က The Power Of The Dream သီချင်းဖြင့် သီဆိုဖျော်ဖြေခဲ့သည်။.
