လီဆာက ကမ္ဘာလှည့်ဖျော်ဖြေပွဲများအပြီး...
ဒိတ်ဒိတ်ကြဲအဆိုတော်အဖွဲ့မှ အဖွဲ့ဝင်တစ်ဦး ဖြစ်သည့်အားလျော်စွာ လီဆာသည် နိုင်ငံအများစုကို ရောက်ထားသော်လည်း ၎င်းမရောက်ဖူးသေးသည့်နိုင်ငံတစ်နိုင်ငံကို မိသားစုနှင့်သွားလည်ရန် စိတ်ကူးထားသည်။ လက်ရှိ BLACKPINK အဖွဲ့၏ Born Pink ကမ္ဘာလှည့်ဖျော်ဖြေမှုအဖြစ် လီဆာသည် မြောက်အမေရိက၊ အာရှနှင့်ဥရောပသို့ သွားရောက်ပြီးပြီဖြစ်သည်။ Harper’s BAZAAR Singapore မဂ္ဂဇင်းနှင့်အင်တာဗျူးတွင် လီဆာ၏နောက်ထပ် စွန့်စားခန်းက မည်သည့်နေရာဖြစ်မည်ကို မေးမြန်းခဲ့သည့်အခါ (ကမ္ဘာလှည့်ဖျော်ဖြေမှုများပြီးလျှင်) ၎င်းင်းမရောက်ဖူးသေးသည့် နေရာ တစ်ခုကိုသွားချင်သည်ဟု ဖြေခဲ့သည်။ သို့သော် မိသားစုနှင့် တစ်ခါမှမသွားဖူးသေးသည့် နေရာဖြစ်လိမ့်မည်ဟု လီဆာကပြောသည်။ လီဆာစိတ်အဝင်စားဆုံးနိုင်ငံက ယဉ်ကျေးမှုနှင့် သမိုင်းဝင်နေရာများပေါများရာ နိုင်ငံဖြစ်သည်။ “ကမ္ဘာပတ်မယ့်ခရီးစဉ်ဖြစ်ဖို့ မလိုပါဘူး။ သွားမလည်ဖူးသေးတဲ့နိုင်ငံထဲမှာဆိုရင်တော့ အထူးသဖြင့် အီဂျစ်ကိုသွားချင်တယ်” ဟု ၎င်းကဖြေသည်။ အီဂျစ်သို့ ယခုနှစ်ထဲ အပန်းဖြေသွားနိုင်ရန်လည်း လီဆာက စိတ်အားထက်သန်နေသည်။ Born Pink ဖျော်ဖြေပွဲများက ဇွန်အထိ ရှိနေမည်ဖြစ်ပြီး လီဆာ၏မွေးရပ်မြို့ဖြစ်သည့် ဘန်ကောက်တွင် မေ ၂၇-၂၈ ရက်များ၌ ထပ်မံဖျော်ဖြေပေးမည်ဖြစ်သည်။ ဘန်ကောက်တွင် ဇန်နဝါရီက ဖျော်ဖြေပြီးဖြစ်သော်လည်း ဇာတိပရိသတ်များနှင့်ပြန်ဆုံမည်ဟု လီဆာက ကတိပေးခဲ့သဖြင့် ရှိုးပွဲထပ်တိုးလိုက်ခြင်းဖြစ်သည်။ မတ်တွင် ထိုင်ဝမ်၊ ဖိလစ်ပိုင်နိုင်ငံများသို့ သွားရောက်ဖျော်ဖြေမည်ဖြစ်ပြီး မေတွင် စင်ကာပူ၌ ဖျော်ဖြေရန်စီစဉ်ထားသည်။.
