ကျန်းမာရေးကောင်းမွန်လျက်ရှိဟု အဆိုတော် အယ်တန်ဂျွန်...
ဆာ အယ်တန်ဂျွန်က ၎င်း၏ Platinum Jubilee ဖျော်ဖြေပွဲမတိုင်မီ ဘီးတပ်ကုလား ထိုင်ပေါ်တွင်ထိုင်နေသည့် ဓာတ်ပုံထွက်ပေါ်လာခဲ့ပြီးနောက် ၎င်းက ကျန်းမာရေးကောင်းမွန်နေကြောင်း အခိုင်အမာပြောကြားခဲ့သည်။ အသက် ၇၅ နှစ်အရွယ် Rocketman အဆိုတော် အယ်တန်ဂျွန်သည် ပြင်သစ်နိုင်ငံ နိုက်စ်မြို့ရှိ ၎င်း၏နေအိမ်သို့ အပြန်လမ်းဖြစ်သည့် လိုက်ပ်ဇစ်လေဆိပ်သို့ ရောက်ရှိချိန်တွင် အဖော်တစ်ဦးက ၎င်းထိုင်နေသည့်ဘီးတပ်ကုလားထိုင်ကို တွန်း၍ သွားလာနေသည့်ဓာတ်ပုံများနှင့် သတင်းတစ်ပုဒ်ကို The Sun သတင်းဌာနကဖော်ပြခဲ့ပြီး အယ်တန်ဂျွန်သည် အားနည်းချိနဲ့နေကြောင်း သတင်းထဲတွင် ထည့်သွင်းရေးသားခဲ့သည်။ “လူပြိန်းကြိုက်သတင်းစာတွေက ကျွန်တော် ဘီးတပ်ကုလားထိုင်နဲ့ အားနည်းချိနဲ့ နေကြောင်း မိုက်မဲသည့်သတင်းများရေးသားခဲ့ပြီးတဲ့နောက် ကျွန်တော့်ကျန်းမာရေးအခြေအနေအကြောင်း လာရောက်မေးမြန်းတဲ့ ပရိသတ်အားလုံးကို ကျေးဇူးတင်ပါတယ်”ဟု ဂျွန် က ၎င်း၏ Instagram တွင် ဖော်ပြထားသည်။ “တကယ့်ဖြစ်ရပ်မှန်ကတော့ ကျွန်တော်ဟာ ကျန်းမာရေးကောင်းမွန်နေပြီး ကျွန်တော့် ဖျော်ဖြေပွဲအတွက် စိတ်အားထက်သန်နေကာ သီချင်းကိုလည်း အကောင်းဆုံးသီဆိုနိုင်ပါတယ်။ ကျွန်တော် ၁၀၀ ရာခိုင်နှုန်း အပြည့်အဝ ပေးစွမ်းနိုင်ပြီး အထူးသဖြင့် ကျွန်တော့်ဖျော်ဖြေပွဲကို ကာလကြာရှည် စောင့်ဆိုင်းနေရတဲ့ ပရိသတ်တွေကို စိတ်မပျက်စေချင်ပါဘူး”ဟု ၎င်းက ဆိုသည်။ ဖရန့်ဖတ်နှင့် လိုက်ပ်ဇစ်တို့တွင် ဖျော်ဖြေပွဲနှစ်ပွဲ ပြုလုပ်ခဲ့ပြီးနောက် ဂူချီတံဆိပ်ဝမ်းဆက် ဝတ်ဆင်ထားသည့် ဂျွန်သည် ကားထဲမှထွက်လာခဲ့ပြီး ဘီးတပ်ကုလားထိုင်ပေါ်သို့ တက်နေသည့်ဓာတ်ပုံများ ထွက်ပေါ်လာခဲ့ခြင်းဖြစ်သည်။ ဂျွန်၏ Farewell Yellow Brick ကမ္ဘာလှည့်ဖျော်ဖြေပွဲသည် ဆွီဒင်နိုင်ငံ စတော့ဟုမ်းမြို့တော်တွင် ဇူလိုင် ၈ ရက်နေ့၌ ပြီးဆုံးမည်ဖြစ်ပြီး ယင်းဖျော်ဖြေပွဲများပြီးနောက် အနုပညာလှုပ်ရှားမှုများမှ အနားယူသွားမည်ဟု ၎င်းက ကတိပြုပြောကြားထားသည်။.
