ဘင်္ဂလားဒေ့ရှ်တွင် ဒေါ်နယ်ထရန့်၏ ရုပ်ပုံပါသော...
ဘင်္ဂလားဒေ့ရှ်နိုင်ငံတွင် အမေရိကန် သမ္မတဟောင်း ဒေါ်နယ်ထရန့်၏ ရုပ်ပုံပါသော လက်ကိုင်ပိုုစတာများကို ကိုင်ပြီး ဆန္ဒပြခဲ့သူများကို ဖမ်းဆီးခဲ့ကြောင်း ရဲတပ်ဖွဲ့က နိုဝင်ဘာ ၁၀ ရက်တွင် ပြောကြားခဲ့သည်။ ရာထူးမှနုတ်ထွက်ခဲ့သည့် ဝန်ကြီးချုပ်ဟောင်း ရှိတ်ဟာဆီနာကို ထောက်ခံသူများက ထရန့်၏ရုပ်ပုံပါသည့် လက်ကိုင်ပိုစတာများကိုကိုင်ကာ ဆန္ဒပြခဲ့ခြင်းဖြစ်ပြီး ထိုလုပ်ဆောင်ချက်သည် ဘင်္ဂလားဒေ့ရှ်နှင့် အမေရိကန်အ ကြား ဆက်ဆံရေးများကို လျော့ပါးစေကြောင်း ရဲတပ်ဖွဲ့က ပြောကြားခဲ့သည်။ ဟာစီနာ (၇၇ နှစ်)သည် နိုင်ငံအတွင်း ကျောင်းသားများ ဦးဆောင်သည့် ဆန္ဒပြမှုများ ဖြစ်ပွားခဲ့ပြီးနောက် သြဂုတ် ၅ ရက်တွင် ရဟတ်ယာဉ်ဖြင့် အိန္ဒိယသို့ ထွက်ပြေး တိမ်းရှောင်သွားခဲ့သည်။ ထိုအချိန်မှစပြီး ငြိမ်းချမ်းရေး နိုဘယ်ဆုရှင် မိုဟာမက်ယူနွတ် ဦးဆောင်သည့် ကြားဖြတ်အစိုးရအဖွဲ့သည် အာဏာကို ရယူခဲ့သည်။ ထိုကြားဖြတ်အစိုးရအဖွဲ့သည် ဒီမိုကရေစီပြုပြင်ပြောင်းလဲရေးနှင့် ရွေးကောက်ပွဲ ကျင်းပရေးတို့ကို အကောင်အထည်ဖော်ရန် လုပ်ဆောင်လျက်ရှိသည်။ ဆန္ဒပြသူ ၁၀ ဦးကို နိုဝင်ဘာ ၉ ရက်ညပိုင်းက ဖမ်းဆီးခဲ့ပြီး ၎င်းတို့သည် လူဦးရေသန်း ၁၇၀ ရှိသည့် ဘင်္ဂလားဒေ့ရှ်တွင် မတည်မငြိမ်ဖြစ်စေရန် ကြိုးပမ်းခြင်းဖြစ်ကြောင်း ရဲတပ်ဖွဲ့က စွပ်စွဲခဲ့သည်။ “ပြစ်မှုဆိုင်ရာ စွဲချက်တင်နိုင်ဖို့ သူတို့ရဲ့ ရာဇဝတ်မှုတွေကို ကျွန်တော်တို့ လေ့လာသုံးသပ်နေပါတယ်”ဟု မိုဟာမက် တာလီဘာရာမန်က ပြောကြားခဲ့သည်။ ဟာဆီနာ၏ Awami League ပါတီက ဒါကာမြို့တော်တွင် ဆန္ဒပြမှုများပြုလုပ်မည်ဟု ကြေညာခဲ့ပြီးနောက် ထိုဆန္ဒပြမှုများ မပြုလုပ်မီ နိုဝင်ဘာ ၉ ရက်က အသေးစားဆန္ဒပြမှု ဖြစ်ပွားခဲ့ခြင်းဖြစ်သည်။ ကျောင်းသားများကလည်း ဟာစီနာ၏ ပါတီဆန္ဒပြမည့် နေရာမှာပင် တန်ပြန်ဆန္ဒပြမှုများ ပြုလုပ်ရန် တိုက်တွန်းထားသည်။ ဘင်္ဂလားဒေ့ရှ်တွင် ဆန္ဒပြသူများ ဖြစ်ပွားခဲ့ချိန်အတွင်း ရဲတပ်ဖွဲ့၏ အင်အားသုံးဖြိုခွင်းမှုကြောင့် လူပေါင်း ၇၀၀ ကျော်သေဆုံးခဲ့ကြောင်း စွပ်စွဲခံခဲ့ရပြီးနောက် ဟာဆီနာ၏ အစိုးရအဖွဲ့ပြိုလဲခဲ့ကာ ဟာဆီနာ၏ မဟာမိတ်များ ဒါဇင်ချီ ဖမ်းဆီးခံခဲ့ရသည်။ ထို့ပြင် ဟာဆီနာ၏ ပါတီကို သစ္စာခံသူများလည်း ပုန်းအောင်းနေထိုင်လျက်ရှိသည်။ လူမှုမီဒီယာပေါ်တွင် ပျံ့နေသည့် အသံဖိုင်တစ်ခုတွင် ဟာစီနာက ထရန့်၏ ဓာတ်ပုံပါသော လက်ကိုင်ပိုစတာနှင့် အမေရိကန် အလံတို့ကို ကိုင်ဆောင်ကာ ဒါကာမြို့တော်တွင် ဆန္ဒပြရန် ၎င်းအားထောက်ခံသူများကို တိုက်တွန်းထားကြောင်း ရဲတပ်ဖွဲက ပြောကြားခဲ့သည်။ “သူ (ဟာဆီနာ)က လက်ကိုင်ပိုစတာတွေကို ဒိုင်းကာတစ်ခုလို အသုံးပြုဖို့နဲ့ တိုက်ခိုက်ခံရမယ်ဆိုရင် ဓာတ်ပုံတွေ၊ ဗီဒီယိုတွေနဲ့ မှတ်တမ်းတင်ထားဖို့ တိုက်တွန်းခဲ့ပါတယ်။ သူတို့တွေဟာ ဘင်္ဂလားဒေ့ရှ်နဲ့ အမေရိကန်အကြား ချစ်ကြည်တဲ့ဆက်ဆံရေးကို လျော့ပါးအောင် ပူးပေါင်းကြံစည်ခဲ့ကြတာပါ”ဟု ရဲတပ်ဖွဲ့က ပြောကြားခဲ့သည်။ အမေရိကန်သမ္မတ ဂျိုးဘိုင်ဒင်၏ အစိုးရအဖွဲ့တွင် ဘင်္ဂလားဒေ့ရှ်ကို တင်းကျပ်စွာ အုပ်ချုပ်ခဲ့သည့် ဟာဆီနာ၏ အစိုးရအဖွဲ့ကို ဆန့်ကျင်ရန် အားပေးလှုံ့ဆော်ခဲ့ကြောင်း ဟာဆီနာ၏ ပါတီက စွပ်စွဲခဲ့သော်လည်း အမေရိ ကန်ကမူ ထိုစွပ်စွဲချက်ကို ငြင်းဆိုခဲ့သည်။ ဟာဆီနာ၏ ၁၅ နှစ်ကြာ အာဏာသက်တမ်းအတွင်း အတိုက်အံများကို ဒီမိုကရေစီ အခွင့်အရေးများမရစေရန် တားမြစ်သည့် ဖြစ်စဉ်များကြောင့် အမည်းစက်ထင်ခဲ့သည်။ ၈၄ နှစ်အရွယ် အသေးစား ချေးငွေလုပ်ငန်းကို ရှေ့ဆောင်လမ်းပြ လုပ်ကိုင်ခဲ့သည့် ယူနွတ်ကမူ သူသည် သမ္မတရွေးကောက်ပွဲတွင် အနိုင်ရရှိသည့် ထရန့်နှင့် ပူးပေါင်းဆောင်ရွက်သွားမည်ဟု ပြောကြားခဲ့သည်။.
