ချားလ်စ်ဘုရင် နန်းတက်ပွဲတွင် ပါဝင်ဖျော်ဖြေပေးရန် ကမ်းလှမ်းမှုကို...
မေလတွင် ကျင်းပမည့်နန်းတက်ပွဲတွင် ဖျော်ဖြေပေးရန် ဗြိတိန်ချားလ်စ်ဘုရင်က ဖိတ်ကြားထားမှုကို နာမည်ကျော်ဗြိတိန်အဆိုတော်များဖြစ်သည့် အယ်လ်တန်ဂျွန်၊ ဟယ်ရီစတိုင်နှင့် Spice Girls တို့က ငြင်းဆန်ထားပြီး ၎င်းတို့ရှေ့တွင် အဒဲလ်နှင့် အက်ရှီရန်တို့လည်း ငြင်းဆန်ထားသည်။ အဆိုတော်များက ၎င်းတို့ဖျော်ဖြေပွဲများ နှင့်တိုက်နေသည့်အတွက် နန်းတက်ပွဲတွင် ပါဝင်သီဆိုပေးရန် ဖိတ်ကြားချက်ကို လက်မခံခဲ့ခြင်းဖြစ်သည်။ တတိယမြောက်ချားလ်စ်ဘုရင်နှင့် ကြင်ယာတော်ကမ်မီလာတို့ကို ဘုရင်နှင့်ဘုရင်မ အရာအပ်နှင်းမည့် ၂၀၂၃ ခုနှစ် မေ ၆ ရက် နန်းတက်ပွဲအတွက် ဘက်ကမ်ဟမ်နန်းတော်က အစွမ်းကုန်ပြင်ဆင်လျက်ရှိပြီး နန်းတက်ပွဲကို Westminister Abbey ခရစ်ယာန်ဘုရားကျောင်းတော်ကြီးတွင် ကျင်းပမည်ဖြစ်ကာ နောက်တစ်နေ့ မေ ၇ ရက်တွင် အထူးဂုဏ်ပြုဖျော်ဖြေပွဲ ဆက်တိုက်ကျင်းပမည်ဖြစ်သည်။ ချားလ်စ်ဘုရင်သည် မယ်တော်ဒုတိယမြောက် အဲလစ်ဇဘတ်ဘုရင်မကြီး နတ်ရွာစံပြီးနောက်၂၀၂၂ ခုနှစ် စက်တင်ဘာ ၈ ရက်ကတည်းက ထီးနန်းအရိုက်အရာကို ဆက်ခံခဲ့သည်။ သတင်းများအရ ဟယ်ရီစတိုင်နှင့် အယ်လ်တန်ဂျွန်တို့နှစ်ဦးစလုံး မေလတွင် ကမ္ဘာလှည့်ဖျော်ဖြေပွဲများရှိကာ မေ ၇ ရက်ဖျော်ဖြေပွဲနှင့် သွားတိုက်နေသည်။ အယ်လ်တန်ဂျွန်က ချားလ်စ်ဘုရင်ဖျော် ဖြေပေးစေလိုသည့် အဆိုတော်များထဲ ထိပ်ဆုံးမှပါနေခဲ့ပြီး ဥရောပဖျော်ဖြေပွဲများကြောင့် ငြင်းလိုက်ခြင်းဖြစ်သည်။ ၎င်း၏နန်းတက်ပွဲတွင်ပါစေလိုသည့် အဆိုတော်အချို့ကို ချားလ်စ်ဘုရင်ကိုယ်တိုင်က အကြံပြုခဲ့ပြီး ထိုသူများထဲ အဒဲလ်နှင့် အက်ရှီရန်တို့လည်းပါသည်။ သို့သော်၎င်းတို့ နှစ်ဦးစလုံးကလည်း ငြင်းထားသည်။ OK မဂ္ဂဇင်းဖော်ပြချက်အရ ဘုရင်က ၎င်းအဆိုတော်နှစ်ဦး၏ ဖျော်ဖြေမှုကို ကြည့်ချင်နေခဲ့သည်။ အက်ရှီရန်က မေ ၆ ရက်တွင် အမေရိကန်၌ ဖျော်ဖြေပွဲရှိပြီး အဒဲလ်က မတ်လအပြီး မည်သည့်ဖျော်ဖြေပွဲမှမရှိပေ။ ဗြိတိန်တော်ဝင်မင်းသားဟယ်ရီ နန်းတက်ပွဲတက်ဖြစ်၊မတက်ဖြစ်ကလည်း စိတ်ဝင်စားစရာသတင်းတစ်ခုဖြစ်ပြီး ယခုအထိ ၎င်းက အတည်မပြုသေးပေ။ ဟယ်ရီနှင့်ဇနီး မက်ဂန်မာကယ်သည် ၂၀၂၀ ခုနှစ်ကတည်းက တော်ဝင်ရာထူးတာဝန်များကို စွန့်လွှတ်ခဲ့ပြီး တော်ဝင်မိသားစုနှင့် ခပ်တန်းတန်းနေထိုင်ခဲ့သည်။.
