အက်ဒ်ရှီးယန်က နယူးယောက်ရှိ မူပိုင်ခွင့်ကြားနာစစ်ဆေးမှုတွင်...

ဗြိတိန်ပေါ့အဆိုတော် အက်ဒ်ရှီးယန်က အမေရိကန်နယူးယောက်မြို့ရှိ ၎င်း၏မူပိုင်ခွင့်ချိုးဖောက်မှုဆိုင်ရာ ကြားနာစစ်ဆေးမှုအတွင်း ဧပြီ ၂၇ ရက်က သက်သေခံရာနေရာတွင် ဂစ်တာတီး၍ သီချင်းဆိုပြခဲ့သည်ဟု အမေရိကန်မီဒီယာတွင် ဖော်ပြထားသည်။ ရှီးယန်က ၎င်း၏ဂရမ်မီဆုရ “Thinking Out Load” သီချင်းသည် မာဗင်ဂေး၏ ၁၉၇၃ ခုနှစ်က ထွက်ရှိခဲ့သည့် “Let’s Get It On” သီချင်းကို ပုံတူကူးချထားသည်ဟူသည့် စွပ်စွဲချက်ကို ငြင်းဆိုခဲ့ပြီး ယင်းသီချင်းကို သီဆိုပြခဲ့ခြင်းဖြစ်သည်ဟု New York Times တွင် ဖော်ပြထားသည်။ ဂေး၏ တွဲဖက်သီချင်းရေးဆရာ အက်ဒ်တောင်းဆန့်စ်၏ ဆက်ခံသူများက အက်ဒ်သည် နာမည်ကျော် “Let’s Get It On” သီ ချင်း၏ အခြေခံသဘောတရားများကို ကူးချခဲ့ သည်ဟု ဆိုသည်။ သို့သော် တရားရုံးတွင်မူ ရှီးယန်သည် ၎င်း၏အနုပညာလုပ်ငန်းစဉ်များကို ပြောပြလျက် ဂစ်တာဖြင့် သီဆိုပြခဲ့သည်။ “ကျွန်တော့်ရဲ့ဘဝနဲ့ မိသားစုထဲက ကိစ္စတော်တော်များများဆီက စိတ်ကူးရယူခဲ့ပါတယ်” ဟု ရှီးယန်က ပြောကြားခဲ့ပြီး ဂေး၏နာမည်ကျော် ၁၉၇၃ ခုနှစ်ထွက် R&B တေးသီချင်းကို ပုံတူကူးချသည်ဟူသည့် စွပ်စွဲချက်ကို ငြင်းဆိုခဲ့သည်။ ရှီးယန်က ၎င်း၏၂၀၁၄ ခုနှစ်ကထွက်ရှိသည့် “Thinking Out Loud” သီချင်းကို အင်္ဂလန်ရှိ ၎င်း၏နေအိမ်တွင် သူငယ်ချင်းတစ်ဦးဖြစ်သည့်အပြင် ပူးပေါင်းဆောင်ရွက်သူတစ်ဦးလည်းဖြစ်သည့် အေမီဝက်ချ်နှင့်အတူ မည်ကဲ့သို့ ရေးသားခဲ့ပုံကို ဂျူရီလူကြီးများအား ပြောပြခဲ့သည်။ ထိုသီချင်းသည် ၎င်း၏အဘိုးနှင့်အဘွားတို့ကြား တစ်ဦးအပေါ်တစ်ဦးထားရှိသည့် ချစ်ခြင်းမေတ္တာကို အကြံဉာဏ်ယူ၍ရေးသားခဲ့ခြင်းဖြစ်ကာ ၎င်း၏အဘိုးသည် မကြာသေးမီက ကွယ်လွန်သွားခဲ့သည်ဟုဆိုသည်။ ရှီးယန်က သူသည်သီချင်းများကို လျင်လျင်မြန်မြန်ရေးသားနိုင်ပြီး တစ်ရက်လျှင် သီချင်းကိုးပုဒ်အထိ ရေးနိုင်ကြောင်းလည်း ပြောကြားခဲ့သည်။ ယခုသီတင်းပတ်အစောပိုင်းတွင် ကြားနာမှုစတင်ချိန်၌ အမေရိကန်ခရိုင်တရားသူကြီး လူးဝစ်စတန်တန်က တရားရုံးတွင် သီချင်းသီဆိုခွင့်ပြုထားသော်လည်း ကခုန်ခြင်းကို ခွင့်မပြုကြောင်း သတိပေးခဲ့သည်။ ရှီးယန်သည် လန်ဒန်တွင် Shape Of You သီချင်းဖြင့် မူပိုင်ခွင့်တရားခွင်ရှင်းလင်းခဲ့ပြီး နောက်တစ်နှစ်အကြာတွင် ယခုကြားနာမှုကို ရင်ဆိုင်နေရခြင်းဖြစ်သည်။.