ဂျွန်နီဒပ်က ၎င်းအား လိင်ပိုင်းဆိုင်ရာ...

Aquaman သရုပ်ဆောင် မင်းသမီးအမ်ဘာဟတ်က မေ ၅ ရက်တွင်ပြုလုပ်သည့် ကြားနာစစ်ဆေးမှုတွင် ခင်ပွန်းဟောင်းဂျွန်နီဒပ်က ၎င်းအား အရက်ပုလင်းတစ်လုံးဖြင့် လိင်ပိုင်းဆိုင်ရာ တိုက်ခိုက်မှုပြုလုပ်ခဲ့ပြီး ၎င်းတို့နှစ်ဦး လက်ထပ်ပြီးနောက် မကြာမီ ၎င်းအား သတ်ပစ်မည်ဟု ခြိမ်းခြောက်ပြောဆိုခဲ့ကြောင်း ငိုကြွေးလျက် သက်သေထွက်ဆိုခဲ့သည်။ အသရေဖျက်မှု ကြားနာစစ်ဆေးမှုတွင် ဟတ်က ၎င်းတို့နှစ်ဦး လက်ထပ်ထိမ်းမြားခဲ့ပြီးနောက် သူသည် ၂၀၁၅ ခုနှစ် အစောပိုင်းတွင် သြစတြေးလျနိုင်ငံ၌ ငါးခုမြောက် Pirates of The Caribbean ရုပ်ရှင်ရိုက်ကူးနေသည့် ဒပ်ဆီ အလည်အပတ်သွားရောက်ခဲ့သည်ဟု ပြောကြားခဲ့သည်။ ထိုခရီးစဉ်အတွင်း ပထမဆုံးညနေခင်းအချိန်၌ ဒပ်ငှားထားသည့်နေအိမ်တွင် ညစာ အတူစားနေစဉ် အရက်မူးပြီး မူးယစ်ဆေးသုံးထားသည်ဟုဆိုသော ဒပ်က ၎င်းအား ရေခဲသေတ္တာဆီ တွန်းထုတ်ခဲ့ပြီး လည်ပင်းညှစ်ခဲ့ သည်ဟု ပြောကြားခဲ့သည်။ ဟတ်က လွတ်မြောက်အောင် ကြိုးပမ်းခဲ့ပြီး အိမ်အပေါ်ထပ်သို့ တက်သွားခဲ့ပြီးနောက် ခဏအကြာ ညအိပ်ဝတ်စုံဖြင့် ပြန်ဆင်းလာချိန်တွင် ဒပ်က နိုးနေသေးသည့်အတွက် ညစာမစားရသေးသောကြောင့် အစာစားရန် ဟတ်က ဒပ်ကို တိုက်တွန်းခဲ့သော်လည်း ဒပ်က ဒေါသထွက်ပြီး ၎င်းထံ ပုလင်းများဖြင့် ပစ်ပေါက်ခဲ့သည်ဟု ဟတ်က ထွက်ဆိုခဲ့သည်။ ဒပ်က အရက်ပုလင်းတစ်လုံးဖြင့် ၎င်းအား လိင်ပိုင်းဆိုင်ရာ တိုက်ခိုက်ခဲ့သည်ဟုလည်း ငိုကြွေးလျက် ပြောကြားခဲ့သည်။ ထိုသို့ လိင်ပိုင်းဆိုင်ရာ တိုက်ခိုက်နေချိန်အတွင်း ဒပ်က “နင့်ကို သတ်ပစ်မယ်”ဟု လည်း ခြိမ်းခြောက်ပြောဆိုခဲ့သေးကြောင်း ၎င်းက ထွက်ဆိုခဲ့သည်။ အသက် ၅၈ နှစ်အရွယ် ဒပ်က ကြားနာစစ်ဆေးမှုတွင် ၎င်းသည် ဟတ်အား မည်သည့်အခါတွင်မျှ တိုက်ခိုက်ခဲ့ခြင်း မရှိကြောင်းနှင့် ဟတ်ကသာ ညှင်းပန်းနှိပ်စက်ခဲ့ခြင်းဖြစ်ကြောင်း အခိုင်အမာထွက်ဆိုခဲ့သည်။ ဒပ်သည် အသက် ၃၆ နှစ်အရွယ် ဟတ်အား အသရေဖျက်မှုဖြင့် ဒေါ်လာ သန်း ၅၀ လျော်ကြေးရရှိရန် တရားစွဲဆိုခဲ့ပြီး ဟတ်သည် ၎င်းအား အိမ်တွင်းအကြမ်းဖက်သူအဖြစ်အသရေဖျက်ခဲ့သည်ဟု ဒပ်ကပြောကြားခဲ့ သည်။ ဟတ်က ဒေါ်လာ သန်း ၁၀၀ လျော်ကြေးရရှိရန် ဒပ်ကို တန်ပြန်တရားစွဲဆိုခဲ့ပြီး ဒပ်သည် ၎င်းအား လူလိမ်အဖြစ် ခေါ်ဆိုခြင်းဖြင့် သွားပုပ်လေလွင့် စွပ်စွဲခဲ့သည်ဟု အခိုင်အမာပြောကြားခဲ့သည်။ ဟတ်က စိတ်မူမမှန်သည့် ရောဂါနှစ်မျိုးခံစားနေရကြောင်း စိတ်ရောဂါအထူးကုဆရာဝန်တစ်ဦးက လွန်ခဲ့ သည့်သီတင်းပတ်တွင် ပြောကြားခဲ့သည်။.