လူပုံအလယ်အရှက်ခွဲခဲ့သည့် အမေရိကန်လေကြောင်းလိုင်းကို ဒီဂျေဆိုဒါ...
ကမ္ဘာ့အကြီးဆုံးလေကြောင်းလိုင်း တစ်ခုဖြစ်သည့် American Airlines မှဝန်ထမ်းများက အရှက်ခွဲခဲ့သည့်ဖြစ်ရပ်ကို တောင်ကိုရီးယားနာမည်ကျော်ဒီဂျေဖြစ်သူ ဒီဂျေဆိုဒါက ဧပြီ ၂၆ ရက်တွင် တွစ်တာ၌ ဖော်ပြခဲ့သည်။ သူဝတ်လာသည့်ဘောင်းဘီကြောင့် လေယာဉ်ပေါ်မှဖယ်ရှားခံခဲ့ရပြီး လူပုံအလယ် ဘောင်းဘီကိုချွတ်ခိုင်းခဲ့သည် ဆိုသည့်ဖော်ပြချက်နှင့်အတူ ဒီဂျေဆိုဒါက လေကြောင်းလိုင်းဝန်ထမ်းတစ်ဦးနှင့် စကားပြောနေပုံပါသည့် ဗီဒီယိုကိုလည်း တင်ထားခဲ့သည်။ တွစ်တာပို့စ်အရ ဒီဂျေဆိုဒါသည် ထိုနေ့က နယူးယောက်မှ လော့စ်အန်ဂျလိစ်သို့ ထွက်ခွာရန်အသင့်ဖြစ်နေစဉ် American Airline မှဝန်ထမ်းတစ်ဦး ရုတ်တရက်သူ့နားရောက်လာကာ ဘာ့ကြောင့်ဆိုသည်ကိုမပြောဘဲ လေယာဉ်ပေါ်မှသူ့ကိုဆင်းခိုင်းခဲ့သည်။ ထို့နောက်ဝန်ထမ်းများက သူဝတ်လာသည့် F**k you စာသားပါဘောင်းဘီသည် မသင့်တော်ဟု သူ့ကိုပြောခဲ့သည်။ တဖက်တွင်လည်းဆိုဒါသည် ထိုနေ့က LA တွင် အရေးကြီးသည့်တွေ့ဆုံပွဲတစ်ခုရှိသည့်အတွက် နောက်လေယာဉ်ကို ထပ်မစောင့်နိုင်တော့ပေ။သို့သော် ဘောင်းဘီပြန်လဲပါ့မည်ဟု ပြောခဲ့သည့်တိုင် သူ့ကိုလက်မခံဆဲဖြစ်နေသည့်အတွက် မတတ်နိုင်သည့်အဆုံး ဆိုဒါသည် ဘောင်းဘီကိုချွတ်လိုက်ရန် ဆုံးဖြတ်ခဲ့ပြီး ဝန်ထမ်းများက ထေ့ငေါ့သည့် စကားများပင် ပြောခဲ့ကြသည်။ သူလှည့်ပတ်သွားလာခဲ့သည့် ရှစ်နှစ်အတွင်း ထိုသို့တစ်ခါမှမကြုံခဲ့ဖူး၊ အထူးသဖြင့် လွတ်လပ်စွာ ထုတ်ဖော်ပြောဆိုခွင့်ရှိသည့် နိုင်ငံအဖြစ်ထင်ရှားသည့်နိုင်ငံမျိုးတွင် ထိုသို့ မမျှမတဆက်ဆံခံရမှုမျိုး တစ်ခါမှမကြုံခဲ့ဖူးဟု ဒီဂျေဆိုဒါက ရေးသားခဲ့သည်။ ရှေ့လျှောက် ၎င်းလေကြောင်းလိုင်း နှင့် အဆက်အဆံမလုပ်၊ သပိတ်မှောက်သွားတော့မည်ဖြစ်ပြီး မည်သူမျှ ထိုသို့ထပ်မကြုံရပါစေဟုလည်း ဆိုဒါက တွစ်တာတွင်ရေးသားခဲ့သည်။ ကိုရီးယားအွန်လိုင်းသုံးစွဲသူအများစုကမူ ဒီဂျေဆိုဒါဘက်မှရပ်တည်ကာ “အမေရိကဟာ လွတ်လပ်စွာဖော်ထုတ်လို့ရတဲ့နိုင်ငံ မဟုတ်ဘူးလား၊လူဖြူတွေပဲ အကျုံးဝင်တာလား” ဟု မှတ်ချက်ပေးနေကြသည်။.
