Park Shin Hye တို့စုံတွဲ မိဘများထံမှ တိုက်ခန်းလက်ဆောင်ရ
Park Shin Hye သည် ရင်သွေးလေး မမွေးဖွားမီ ခင်ပွန်း၏မိဘများထံမှ အထူး လက်ဆောင်တစ်ခုကို ရထားပြီဖြစ်သည်။ ခင်ပွန်းသရုပ်ဆောင်မင်းသား Choi Tae Joon ၏ဖခင်က တိုက်ခန်းလက်ဆောင်ပေး ထားခြင်းဖြစ်ပြီး ထိုတိုက်ခန်းသစ်တွင် သူတို့ ဇနီးမောင်နှံနေကြမည်ဟုဆိုသည်။ ထို့ပြင် တိုက်ခန်းလက်ဆောင်က သူတို့ မွေးလာမည့်ရင်သွေးဦးလေးကို ဂုဏ်ပြုသည့် အထိမ်းအမှတ်လည်းဖြစ်သည်။ ကြည့်ရသလောက် Park Shin Hye သည် ခင်ပွန်း၏မိဘများနှင့် အဆင်ပြေပြေရှိ ပုံရသည်။သတင်းများအရ Park ကို သမီးရင်းသဖွယ် သူတို့ကသဘောထားဆက်ဆံကြပြီး ကိုယ်ဝန်ဆောင်မိခင်အတွက် အားဖြစ်မည့် အစားအစာများလည်း ဖြည့်ဆည်းပေးကြသည်။ ထို့ပြင် ယောက္ခမက မြေးဦးလေးကို အခြားလက်ဆောင်တစ်ခုပါ ပေးထားသေးသည် ဆိုသည့် သတင်းများလည်းရှိသည်။ လက်ထပ်ပြီးနောက် Park ၏သားဦးလေးဖြစ်လာမည့်ကလေးကို ရွှေခြေချင်း လက်ဆောင်ပေးထားပုံရပြီး ၊၎င်းသည် တောင်ကိုရီးယားတွင် မီးဖွားသည့်အခါပြုလုပ်သည့် အစဉ်အလာတစ်ခုဖြစ်သည်။ Park Shin Hye သည် Choi Tae Joon နှင့် ချစ်သူသက်တမ်း လေးနှစ်ကြာပြီးနောက် ၂၀၂၂ ခုနှစ်၊ ဇန်နဝါရီ ၂၂ ရက်တွင် ထိမ်းမြား လက်ထပ်ခဲ့သည်။ လက်ထပ်ပွဲကို ကင်ဘမ်၊ လီဆောဂျင် ၊ IU စသည့် နာမည်ကျော်သရုပ်ဆောင်၊ အဆိုတော်များက တက်ရောက်ဂုဏ်ပြုကြပြီး လက်ထပ်ပွဲနေ့တွင် လူပြောအများဆုံးဖြစ်ခဲ့သည့်အကြောင်းအရာက Heirs ဇာတ်လမ်းတွဲတွင် အတူတွဲသရုပ်ဆောင်ခဲ့သည့် Park အတွက် လီမင်ဟိုက ဂုဏ်ပြုပို့စ်တစ်ခု အွန်လိုင်းတွင် တင်ခဲ့သည့်ကိစ္စဖြစ်သည်။ ၂၀၂၂ ခုနှစ်အတွင်း ထင်ရှားသည့် ဆယ်လီမင်္ဂလာဆောင်များထဲတွင် Park Shin Hye တို့ပွဲလည်းပါသည်။ မင်္ဂလာပွဲတွင် Park ဆင်မြန်းခဲ့သည့် သတို့သမီးဝတ်စုံများက ကမ္ဘာကျော်အမှတ်တံဆိပ် အော်စကာဒီလာ ရန်တာမှဖြစ်ပြီး တတိယမြောက်ဝတ်စုံသည် အမေရိကန်ဒေါ်လာ ၁၄,၀၀၀ မှ ၁၈,၇၀၀ ခန့်အထိတန်ကြေးရှိသည်ဟု သိရသည်။.
