(၅၈) ကြိမ်မြောက် Baeksang Arts ဆုပေးပွဲ ကျင်းပ
တောင်ကိုရီးယားနိုင်ငံ၏ ဂုဏ်သိက္ခာအရှိဆုံး ဆုပေးပွဲများတွင် အပါအဝင်ဖြစ် သည့် (၅၈) ကြိမ်မြောက် Baeksang Arts ဆုပေးပွဲအခမ်းအနားကို မေ ၆ ရက်တွင် အီဆန်းမြို့ရှိ ကိုရီးယားနိုင်ငံတကာပြပွဲစင်တာ (KINTEX) တွင် ပြုလုပ်ကျင်းပခဲ့သည်။ ယင်းဆုပေးပွဲတွင် ရှင်ဒုန်ရပ်၊ ဆူဇီနှင့် ပက်ဘိုဂန်းတို့က အစီအစဉ်တင်ဆက်သူအဖြစ် ဆောင်ရွက်ခဲ့သည်။ ပက်ဘိုဂန်းသည် လွန်ခဲ့သည့်နှစ် ဆုပေးပွဲအချိန်က စစ်မှုထမ်း နေရသည့်အတွက် အစီအစဉ်တင်ဆက်သူအဖြစ် ပါဝင်နိုင်ခဲ့ခြင်းမရှိသောကြောင့် ယခုနှစ်တွင်ကျင်းပသည့် ယင်းဆုပေးပွဲသည် ပက်အတွက် စစ်မှုထမ်းတာဝန်ပြီးဆုံးချိန်ကတည်းက ပထမဆုံးအကြိမ် အနုပညာလှုပ်ရှားမှုဖြစ်လာခဲ့သည်။ ဒါရိုက်တာ ရူဆန်းဝမ်၏ Escape from Mogadishu က ရုပ်ရှင်အပိုင်းတွင် အမြင့်ဆုံးဆုဖြစ်သည့် အထူးဆုကိုရရှိခဲ့ပြီး Squid Game ဇာတ်လမ်းတွဲက ရုပ်သံဇာတ်လမ်းတွဲအပိုင်းတွင် အထူးဆုကိုရရှိခဲ့ကာ ယင်းဇာတ်လမ်းတွဲဒါရိုက်တာ ဟွမ်ဒုန်ဟော့နှင့် တေးဂီတဒါရိုက်တာ ဂျောင်ဂျေအီက အကောင်းဆုံးဒါရိုက်တာဆုနှင့် အကောင်းဆုံး အနုပညာညွှန်ကြားမှုဆုတို့ကို အသီးသီးရရှိခဲ့ကြသည်။ ရုပ်ရှင်အပိုင်းတွင် King Maker ရုပ်ရှင် သရုပ်ဆောင်မင်းသား ဆိုးလ်ဂယောင်းဂူက အကောင်းဆုံးမင်းသားဆုကိုရရှိခဲ့ပြီး In Front of Your Face ရုပ်ရှင်မင်းသမီး လီဟေးယောင်က အကောင်းဆုံးမင်းသမီးဆုကို ရရှိခဲ့သည်။ အကောင်းဆုံး ဒရာမာဇာတ်လမ်းတွဲဆုကို D.P က ရရှိခဲ့ပြီး ယင်းဇာတ်လမ်းတွဲသရုပ်ဆောင်များဖြစ်သည့် ဂျိုဟွန်ချူးလ်နှင့် ဂိုဂယိုဟွမ်တို့က အကောင်းဆုံးဇာတ်ပို့မင်းသားဆုနှင့် အကောင်းဆုံးမျက်နှာသစ်သရုပ်ဆောင် ဆုတို့ကို ရရှိခဲ့သည်။ ထိပ်သီးရုပ်မြင်သံကြားမင်းသားဆုကို 2PM အဖွဲ့ဝင် လီဂျွန်ဟိုက The Red Sleeve ရုပ်ရှင်ဖြင့်ရရှိခဲ့ပြီး ထိပ်သီး ရုပ်မြင်သံကြားမင်းသမီးဆုကို Twenty Five, Twenty One ရုပ်ရှင်ဖြင့် မင်းသမီးကင်တေးရီက ရရှိခဲ့သည်။ ထို့ပြင် TikTop အကျော်ကြားဆုံးအမျိုးသားဆုကို လီဂျွန်ဟိုက ထပ်မံရရှိသွားပြီး Tiktop အကျော်ကြားဆုံးအမျိုးသမီးဆုကို ကင်တေးရီက ထပ်မံရရှိခဲ့သည်။ ယင်းဆုပေးပွဲတွင် ပြဇာတ်ဆုများနှင့် အခြားအနုပညာလောကမှ သက်ဆိုင်ရာကဏ္ဍ အလိုက် ထူးချွန်ဆုများကို အသီးသီးပေးအပ် ချီးမြှင့်ခဲ့သည်။ ယင်းဆုပေးပွဲအခမ်းအနားကို JTBC က တိုက်ရိုက်ထုတ်လွှင့်ပြသခဲ့ပြီး ရုပ်ရှင်၊ ရုပ်မြင်သံကြားနှင့် ပြဇာတ်နယ်ပယ်မှအနုပညာရှင်အများအပြား တက်ရောက်ခဲ့ကြသည်။.
