တွမ်ဟန့်က ဇနီးဖြစ်သူ ခလုတ်တိုက်မိခဲ့ပြီးနောက် ပရိသတ်များကို...
အမေရိကန် သရုပ်ဆောင်မင်းသားကြီး တွမ်ဟန့်နှင့် ၎င်း၏ဇနီးဖြစ်သူ ရီတာဝီလ်ဆန်တို့ နယူးယောက်မြို့ရှိ စားသောက်ဆိုင်တစ်ဆိုင်မှ ထွက်လာချိန်တွင် ပရိသတ်များ ၀ိုင်းအုံလာချိန်၌ ၎င်း၏ဇနီးသည် ရီတာ ခလုတ်တိုက်ခဲ့သောကြောင့် တွမ်ဟန့်က ပရိသတ်များကို ဒေါသတကြီး အော်ဟစ်ပြောဆိုခဲ့သည်ဟု သိရသည်။ တွမ်ဟန့်သည် လက်ရှိတွင် ၎င်းနောက်ဆုံးရိုက်ကူးထားသည့် Elvis အမည်ရှိ ရုပ်ရှင်အတွက် ကြော်ငြာနေပြီး ယင်းရုပ်ရှင်တွင် ၎င်းက ပရက်စလေ၏ မန်နေဂျာ ကိုလိုနယ် တွမ်ပါကာနေရာမှာ သရုပ်ဆောင်ထားသည်။ ဇွန် ၁၅ ရက်က တွမ်ဟန့်တို့ ဇနီးမောင်နှံသည် စားသောက်ဆိုင်မှထွက်ခွာပြီး စောင့်ဆိုင်းနေသည့် ကားရှိရာသို့ လမ်းလျှောက်လာစဉ် ဟန့်နှင့် ရီတာတို့အနီးသို့ ပရိသတ်အများအပြား ချဉ်းကပ်လာပြီး ဆယ်ဖီတွဲရိုက်ရန် တောင်းဆိုခဲ့သည်။ ယင်းပရိသတ်များသည် ရီတာအား ခလုတ်တိုက်စေခဲ့ပြီးနောက် ဟန့်က ယင်းပရိသတ်များအား ဒေါသတကြီး ပြောဆိုအော်ဟစ်နေသည့် ဗီဒီယိုဖိုင်တစ်ဖိုင် Youtube ပေါ်တွင် တက်လာခဲ့သည်။ ယင်းဗီဒီယို၌ လုံခြုံရေးအစောင့်တစ်ဦးသည် ဟန့်နှင့် ရီတာတို့ စားသောက်ဆိုင်မှ ထွက်လာချိန် လူအုပ်ကြားမှ ၎င်းတို့ အဆင်ပြေစွာလမ်းလျှောက်နိုင်ရန် လမ်းရှင်းပေးနေသည်ကို တွေ့မြင်ရသည်။ စောင့်ဆိုင်းနေသော လူအုပ်ကြီးအတွင်းမှ လူအချို့သည် ယင်းစုံတွဲနှင့် ဆယ်ဖီရိုက်ကူးနိုင်ရန် ကြိုးပမ်းနေသည်ကို မြင်တွေ့ရသည်။ သို့သော် ပရိသတ်လူအုပ်ကြီးမှ လူတစ်ချို့က မတော်တဆတွန်းမိခဲ့မှုကြောင့်ဟု ယူဆသောဖြစ်ရပ်ကြောင့် ရီတာ ခလုတ်တိုက်သွားချိန်၌ ရီတာက ပရိသတ်တစ်ဦးအား “ရပ်လိုက်တော့” ဟူ၍ လှည့်ပြီးပြောကြားခဲ့သည်။ ထိုအချိန်တွင် ဟန့်က ထိုလူအုပ်ကြီးထံ မျက်နှာမူပြီး လက်မြှောက်ကာ “ဒါငါ့ဇနီး။ နောက်ဆုတ်နေလိုက်”ဟူ၍ ဆဲရေးတိုင်းထွာသည့်စကားသုံးနှုန်းကာ အော်ဟစ်ပြောဆိုခဲ့သည်။ ထို့နောက် ယင်းစုံတွဲသည် စောင့်ဆိုင်းနေသည့်ကားပေါ်သို့ တက်သွားခဲ့သည်။ လူအုပ်ကြီးတွင်းမှ လူအချို့သည် ချက်ချင်း တောင်းပန်စကား ပြောကြားခဲ့သည်ကို ဗီဒီယိုတွင် ကြားသိခဲ့သည်။ ဟန့်သည် ပရိသတ်တစ်စုံတစ်ယောက်နှင့် ရုပ်ပိုင်းဆိုင်ရာ တိုက်ခိုက်မှုမဖြစ်ပွားခဲ့သော်လည်း သူသည် မကြာသေးမီလများအတွင်း ဇနီးဖြစ်သူကို လူသိရှင်ကြား ကာကွယ်ပေးသည့် ဒုတိယမြောက် ဟောလိဝုဒ်ထိပ်တန်းအနုပညာရှင်ဖြစ်သည်။.
