ပြင်ဦးလွင် တပ်နယ်သို့ နစက ဥက္ကဋ္ဌ သွားရောက်ခဲ့ပြီး...
အလယ်ပိုင်းတိုင်းစစ်ဌာနချုပ်၊ ပြင်ဦးလွင် တပ်နယ်အတွင်း နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် စက်တင်ဘာ ၂၃ ရက်မှ ၂၄ ရက်အထိ သွားရောက်ခဲ့ပြီး နယ်မြေလုံခြုံရေးနှင့် တည်ငြိမ်အေးချမ်းရေးလုပ်ငန်းများကို စနစ်တကျ ဆောင်ရွက်ရန် ပြောကြား ခဲ့ကြောင်း သိရသည်။ အဆိုပါခရီးစဉ်အတွင်း နစကဥက္ကဋ္ဌနှင့်အတူ နစကအဖွဲ့ဝင် ညှိနှိုင်းကွပ်ကဲရေးမှူး(ကြည်း၊ ရေ၊ လေ) ဗိုလ်ချုပ်ကြီး မောင်မောင်အေး၊ ကာကွယ်ရေး ဦးစီးချုပ်(ရေ) ဒုတိယဗိုလ်ချုပ်ကြီး ထိန်ဝင်း၊ ကာကွယ်ရေးဦးစီးချုပ်ရုံးမှ အဆင့် မြင့်တပ်မတော်အရာရှိကြီးများနှင့် တာဝန်ရှိသူများလိုက်ပါခဲ့ကြောင်း သိရသည်။ ထိုသို့သွားရောက်ရာတွင် စစ်တက္ကသိုလ်၊ နဝဒေးခန်းမ၌ တိုင်းမှူး ဗိုလ်မှူးချုပ် ကျော်ကိုထိုက် နှင့် ပြင်ဦးလွင်တပ်နယ်မှူးတို့က နစကဥက္ကဋ္ဌအား ပြင်ဦးလွင်တပ်နယ်အတွင်း လုံခြုံရေးနှင့် နယ်မြေတည် ငြိမ်အေးချမ်းရေးဆိုင်ရာ လုပ်ငန်းများဆောင်ရွက်လျက်ရှိမှုအခြေအနေများ၊ လုံခြုံရေး လုပ်ငန်းများဆောင်ရွက်စဉ် သောင်းကျန်းသူများထံမှ လက်နက်ခဲယမ်းများ သိမ်းဆည်းရမိမှုအခြေအနေများကို ရှင်းလင်းတင်ပြခဲ့ပြီး ရှင်းလင်းတင်ပြမှုအပေါ် နစကဥက္ကဋ္ဌက ပြင်ဦးလွင်တပ်နယ်အနေဖြင့် နယ်မြေလုံခြုံရေးနှင့် တည်ငြိမ် အေးချမ်းရေးလုပ်ငန်းများကို စနစ်တကျ ဆောင်ရွက်သွားရန်လိုကြောင်း၊ တပ်နယ် အတွင်း နယ်မြေစည်းရုံးရေးလုပ်ငန်းများနှင့် နယ်မြေစိုးမိုးရေးလုပ်ငန်း များဆောင်ရွက် ရာတွင်လည်း မိမိတို့ တာဝန်ထမ်းဆောင်ရသည့်နယ်မြေအလိုက် ဒေသ၏ နယ်မြေ ဒေသအခြေအနေများ၊ ဒေသဆိုင်ရာအချက်အလက်များကို ခြေခြေမြစ်မြစ် သိရှိထားရ မည်ဖြစ်ကြောင်း၊ နယ်မြေခံတပ်များနှင့် ဒေသခံများ တစ်သားတည်းဖြစ်နေ ရမည် ဖြစ်ပြီး အပြန်အလှန်ရိုင်းပင်းကူညီခြင်း၊ ပူးပေါင်းဆောင်ရွက်ခြင်းတို့ဖြင့် နယ်မြေ လုံခြုံရေး၊ ဒေသခံများ၏ လုံခြုံရေးကို အတူတကွ ဝိုင်းဝန်းပူးပေါင်းဆောင်ရွက်သွားကြ ရန်လိုကြောင်း ပြောကြားသည်။ ထို့အတူ နစကဥက္ကဋ္ဌသည် စစ်တက္ကသိုလ်ဗိုလ်လောင်းသင်တန်းအမှတ်စဉ်(၆၇) စစ်လက်ရုံးရွေးချယ်ပွဲနှင့် တပ်မတော် နည်းပညာတက္ကသိုလ် ဗိုလ်လောင်းသင်တန်းအမှတ်စဉ်(၂၇) စစ်လက်ရုံးရွေးချယ်ပွဲတို့တွင်လည်း သီးခြားစီ တက်ရောက်၍ ဗိုလ်လောင်းများအား တစ်ဦးချင်းစီတွေ့ဆုံမေးမြန်း၍ စာပေပညာ၊ စစ်ပညာတို့တွင် ဘာသာရပ်အလိုက် ထူးချွန်ထက်မြက်မှု၊ ဝါသနာနှင့် သင်တန်းကာလတစ်လျှောက် ကြိုးစားအားထုတ်မှု ရလာဒ်များ အပေါ်မူတည်၍ ၎င်းတို့နှင့် သင့်လျော်သည့် တပ်မတော်(ကြည်း၊ ရေ၊ လေ) စစ်လက်ရုံး အသီးသီးအတွက် စိစစ် ရွေးချယ်ပေးခဲ့ကြောင်း သိရသည်။ နစကဥက္ကဋ္ဌနှင့် အဖွဲ့ဝင်များသည် စစ်တက္ကသိုလ် အနော်ရထာ တပ်ရင်း ဗိုလ်လောင်း စားရိပ်သာနှင့် တပ်မတော်နည်းပညာတက္ကသိုလ် ပညာတန်ဆောင် ဗိုလ်လောင်း စားရိပ်သာတို့၌ သင်တန်းသားဗိုလ်လောင်းများနှင့်အတူ နေ့လယ်စာ အတူတကွ သုံးဆောင်ပြီး ဗိုလ်လောင်းများအား လိုက်လံနှုတ်ဆက်၍ လိုအပ်ချက် များအား မေးမြန်းဖြည့်ဆည်း ပေးခဲ့ကြောင်း သိရသည်။ ထို့ပြင် နစကဥက္ကဋ္ဌနှင့်အဖွဲ့ဝင်များသည် ပြင်ဦးလွင်မြို့ရှိ နယ်မြေခံ တပ်မတော်ဆေးရုံသို့ ရောက်ရှိကြပြီး နိုင်ငံတော်တည်ငြိမ်ရေး၊ လုံခြုံရေးနှင့် တရား ဥပဒေစိုးမိုးရေး တာဝန်များကိုထမ်းဆောင်စဉ် ထိခိုက်ဒဏ်ရာရရှိခဲ့သည့် အရာရှိ၊ စစ်သည် များအား တစ်ဦးချင်း၏ ထိခိုက်ဒဏ်ရာရရှိမှု၊ ဆေးကုသပေးထားမှုများကို သွားရောက်ကြည့်ရှုခြင်း၊ ပြင်ဦးလွင်တပ်နယ်အတွင်းရှိ တပ်ရင်း၊ တပ်ဖွဲ့များ၊ သင် တန်းကျောင်းများအတွင်း မော်တော်ယာဉ်များဖြင့် လှည့်လည်ကြည့်ရှုစစ်ဆေးခြင်းတို့ ပြုလုပ်ခဲ့ကြောင်းသိရသည်။ ယင်းအပြင် နစကဥက္ကဋ္ဌသည် သုမင်္ဂလာဈေး(ညံတောဈေး) ခြောက်ထပ်အဆင့်မြင့်ဈေးသစ် တည်ဆောက်ရေးစီမံကိန်းသို့ သွားရောက်ကြည့်ရှုစစ်ဆေးမှုများပြုလုပ်ခဲ့ကြောင်း သိရသည်။.
