BTS အခမဲ့ဖျော်ဖြေပွဲပြုလုပ်မည့်နေရာအဖြစ်...
၂၀၃၀ ဘူဆန်ကမ္ဘာ့ကုန်စည်ပြပွဲကို အားပေးသည့်အထိမ်းအမှတ်အဖြစ် ကမ်းခြေတောင်တန်းများဖြင့် နာမည်ကျော်ရာ ဘူဆန်မြို့တွင် ကမ္ဘာကျော်ကေပေါ့အဖွဲ့ BTS က အခမဲ့ဖျော်ဖြေပွဲပြုလုပ်မည်ဖြစ်ပြီး ပွဲကျင်းပမည့်နေရာရွေးချယ်ထားမှုနှင့်ပတ်သက်ပြီး ဘူဆန်မြို့တော်ဝန်အား ဝေဖန်ပြောဆိုမှုများ ထွက်ပေါ်နေသည်။ ဖျော်ဖြေပွဲကို အောက်တိုဘာ ၁၅ ရက်တွင် ကျင်းပမည်ဖြစ်ပြီး အခမဲ့ပွဲဖြစ်သည့်အတွက် ပရိသတ်များ ဝမ်းသာရသော်လည်း ပြုလုပ်မည့်နေရာအဖြစ် လဟာပြင်ဆိပ်ကမ်းဧရိယာတစ်ခုကို ရွေးချယ်ထားသည်။ ၂၀၀၂ ဘူဆန်အာရှအားကစားပြိုင်ပွဲအတွက် ဆောက်လုပ်ခဲ့သည့်ကွင်းအပါအဝင် အခြားရွေးချယ်စရာအားကစားကွင်းများစွာ ဘူဆန်တွင် ရှိပါလျက်နှင့် ဘာကြောင့် ၎င်းနေရာကိုမှ ဘူဆန်အစိုးရက ရွေးလိုက်သည်ကို ပရိသတ်များက သိလိုနေကြသည်။ ထိုပွဲသို့လူတစ်သိန်းအထိ တက်ရောက်နိုင်ပြီး သွားလာရေးအတွက် ရထား၊ ဘတ်စ်ကားများပါ အခမဲ့စီစဉ်ပေးထားမည်ဟု ဘူဆန်အစိုးရက ကြေညာထားသည်။ ပွဲကျင်းပမည့်နေရာသည် ထွက်ပေါက်နှစ်ခုသာရှိပြီး လူအင်အားတစ်သိန်းကို အချိန်တိုအတွင်း ထွက်ခွာစေရန်မှာ မလွယ်ကူလှပေ။ အနီးဝန်းကျင်တွင် တည်းခိုစားသောက်ရန်နေရာများ မရှိသည့်အတွက် ရှိုးပွဲလာသူများက အစားအသောက်ပါ တပါတည်းသယ်လာရမည်ဖြစ်သည်။ ပရိသတ်အဝင်ကို မနက် ၉ နာရီတွင် စတင်လက်ခံမည်ဖြစ်ပြီး ပွဲချိန်က ညနေ ၆ နာရီမှစမည်ဖြစ်ကာ ကြားချိန် ၉ နာရီကို အင်မတန်များပြားသည့်လူအုပ်က မည်သို့ဖြတ်သန်းရမည်မှာ စဉ်းစားစရာဖြစ်သည်။ ပွဲသိမ်းချိန်နောက်ကျပါကလည်း ကွင်းအပြင်ရောက်ရန် မိုးသောက်ချိန်အထိ ကြာသွားနိုင်ဖွယ်ရှိသည်။ ပရိသတ်ကိုးသောင်းလာသည့် BTS ၏ လန်ဒန်ဖျော်ဖြေပွဲတွင် သန့်စင်ခန်း ၂၇၀၀ ဆောက်ပေးခဲ့ပြီး ယခုလူတစ်သိန်းစာအတွက် သန့်စင်ခန်းဆယ်ဂဏန်းသာ ဆောက်ပေးမည်ဆိုသည်မှာ အားရစရာမရှိပေ။ ၎င်းဧရိယာအတွင်း မြို့တော်ဝန် Park Hyung Jun နှင့် အပေါင်းအပါများပိုင်မြေနေရာများရှိပြီး ကူးလူးသွားလာမှုများလာကာ မြေစျေးတက်လာလျှင် ၎င်းတို့ပင်အကျိုးခံစားရမည်ဟု အချို့က ထင်မြင်ယူဆနေကြသည်။.
