Snoop Dogg အား လိင်ပိုင်းဆိုင်ရာတိုက်ခိုက်မှု စွပ်စွဲထားသည့်...
အမည်မသိအမျိုးသမီးတစ်ဦးက အမေရိကန် ရက်ပ်အဆိုတော် Snoop Dogg အပေါ်လိင်ပိုင်းဆိုင်ရာ တိုက်ခိုက်မှုစွဲချက်များကို ပြန်လည်ရုပ်သိမ်းပေးခဲ့သည်ဟု သိရသည်။ ထိုအမျိုးသမီးက Snoop Dogg ၏ ၂၀၁၃ ခုနှစ်ကပြုလုပ်သည့် ဖျော်ဖြေပွဲများထဲမှ တစ်ခုကို သွားရောက်ခဲ့ပြီးနောက် ၎င်း၏လိင်ပိုင်းဆိုင်ရာ တိုက်ခိုက်ခံခဲ့ရပြီး ရိုက်နှက်ခံခဲ့ရသည်ဟု စွပ်စွဲပြောဆိုထားခြင်းဖြစ်သည်။ လော့စ်အိန်ဂျလိစ်အနီးတွင် ဖေဖော်ဝါရီလ၌ပြုလုပ်ခဲ့သည့် Super Bowl ပွဲတစ်ဝက် ဖျော်ဖြေမှုတွင် Snoop Dogg ပါဝင်ရန် စီစဉ်မထားမီ ထိုအမျိုးသမီးက ၎င်းအား ကယ်လီဖိုးနီးယား ဗဟိုခရိုင်တရားရုံးတွင် တရားစွဲဆိုခဲ့ ပြီးနောက် နှစ်လနီးပါးအကြာ ဧပြီ ၆ ရက်တွင် တရားစွဲဆိုမှုကို ပြန်လည်ရုပ်သိမ်းပေးခဲ့ခြင်း ဖြစ်သည်။ အမည်မသိ ထိုအမျိုးသမီးက သူသည် Snoop Dogg နှင့်အတူ အလုပ်တွဲဖက်လုပ်ကိုင်ခဲ့သည့် အကသမားတစ်ဦး၊ မော်ဒယ်တစ်ဦး၊ အစီအစဉ်တင်ဆက်သူတစ်ဦးနှင့် သရုပ်ဆောင်တစ်ဦးအဖြစ် ထုတ်ဖော်ပြောဆိုထားသည်။ Snoop Dogg ကမူ ထိုအမျိုးသမီးနှင့် အလုပ်တွဲလုပ်ခဲ့ဖူးခြင်းမရှိကြောင်း ပြောကြားခဲ့သည်။ တရားစွဲဆိုမှု ရုပ်သိမ်းချက်တွင် Snoop Dogg ၏ စီးပွားရေးလုပ်ငန်းအပါအဝင် စွဲဆိုမှုတွင်ပါဝင်သော အခြားအဖွဲ့အစည်းများအားလုံးအပေါ် စွဲချက်များကို ပယ်ဖျက်ခဲ့သည်။ “တရားလိုက အမှုကိုပယ်ဖျက်လိုက်တာ မဆန်းပါဘူး။ ဘာလို့လဲဆိုတော့ သူ့ရဲ့ တိုင်တန်းချက်တွေဟာ မှားယွင်းတဲ့စွဲချက်တွေပြည့်နေပြီး ဟာကွက်တွေရှိနေလို့ပါ”ဟု Snoop Dogg ၏ ပြောရေးဆိုခွင့်ရှိသူတစ်ဦးက ပြောကြားခဲ့သည်။ တရားစွဲဆိုသူအမျိုးသမီး၏ ရှေ့နေ မက်ဖင်ကယ်ဘာ့ချ်က ယင်းဖြစ်စဉ်နှင့်ပတ်သက်၍ မှတ်ချက်တစ်စုံတစ်ရာ ပြောကြားခဲ့ခြင်းမရှိပေ။.
